1 KORINTH 1 - Khasi CL Bible (BSI)

¹ Na u Paul, ïa uba la khot ban long u apostol U Khrist Jisu da ka mon U Blei, bad na u Sosthenes u parabangeit jong ngi —

² Sha ka balang U Blei kaba ha Korinth, ha kito baroh kiba la khot ban long ki briew bakhuid jong U Blei, kiba dei ki jong u ha U Khrist Jisu, lem bad ki briew baroh kylleng kiba mane ïa U Jisu Khrist uba U Trai jong ngi, uba long U Trai jong ki ruh:

³ To U Blei uba long U Kpa jong ngi bad U Jisu Khrist uba U Trai un ai ha phi ïa ka jingaiei bad ïa ka jingsuk.

Ki jingkyrkhu ha U Khrist

⁴ Nga ainguh borabor ïa U Blei jong nga na ka bynta jong phi namar kata ka jingaiei ïa kaba u la ai ha phi da U Khrist Jisu.

⁵ Naba ha U Khrist la pynlong ïa phi kiba man kyrhai ha kiei kiei baroh, kaba kynthup ïa ka jingkren bad ka jingtip baroh.

^6-7 Ka khubor shaphang U Khrist ka la shong skhem ha phi kat haduh ba phim shym duh noh ban pdiang wat tang ïa kawei ka jingkyrkhu, katba phi dang ap khmih lynti ba yn pynpaw ïa U Jisu Khrist uba U Trai jong ngi.

⁸ U ruh un batskhem ïa phi haduh kaba kut, khnang ba phin long kiba khlem shah kynnoh pop ha ka Sngi jong U Jisu Khrist uba U Trai jong ngi.

⁹ U Blei u long uba dei ban shaniah, U Blei uba la khot ïa phi sha ka jingïasyllok bad U Jisu Khrist u khun jong u, uba U Trai jong ngi.

Ki jingïapait ha ka Balang

¹⁰ Da ka bor jong U Jisu Khrist uba U Trai jong ngi nga kyrpad ïa phi baroh, ki parabangeit jong nga, ba phin ïamynjur lang ïa kaei kaba phi ong, khnang ba yn ym don ka jingïapait hapdeng jong phi. To phin ïalong kawei, tang ha kawei ka jingpyrkhat bad kawei ka jingthmu.

¹¹ Naba katto katne ngut ki briew na ka longïing jong ka Khloi ki la ïathuh ïa nga da kaba shai kdar, ko ki parabangeit jong nga, ba don ki jingkajia hapdeng jong phi.

¹² Ai ba ngan buh ha kane ka rukom: Uwei pa uwei na phi u ong ïa kaei kaei kaba ïapher. Uwei u ong, “Nga bud ïa u Paul;” uwei pat, “Nga bud ïa u Apollos;” uwei pat, “Nga bud ïa u Petros;” bad uwei pat, “Nga bud ïa U Khrist.”

¹³ Te ïa U Khrist la phiah ha ki kynhun! Hato dei u Paul uba la ïap halor ka diengphna namar jong phi? Hato la pynbaptis ïa phi kum ki synran jong u Paul?

¹⁴ Nga ainguh ïa U Blei ba ngam shym la pynbaptis ïano ïano na phi lait noh ïa u Krispos bad u Gaïos.

¹⁵ Te, uno uno um lah ban ong, ba la pynbaptis ïa phi kum ki synran jong nga.

¹⁶ (O ho-oid, nga la pynbaptis ruh ïa u Stephanas bad ïa ka longïing jong u; hynrei ngam kynmaw la nga la pynbaptis sa ïano ïano pat.)

¹⁷ U Khrist um shym la phah ïa nga ban pynbaptis. U la phah ïa nga ban ïathuh ïa ka Khubor Babha, bad ban ïathuh ïa ka khlem da pyndonkam ïa ka ktien ha ka jingstad briew, khnang ban pynthikna ba ka jingïap U Khrist halor ka diengphna kan ym pynduh noh ïa ka bor jong ka.

U Khrist uba long ka Bor bad ka Jingstad U Blei

¹⁸ Naba ka khubor shaphang ka jingïap U Khrist halor ka diengphna ka long ka jingibieit ha kito kiba jot noh; hynrei ïa ngi kiba la pynim, ka long ka bor U Blei.

¹⁹ Ka Jingthoh Bakhuid ka ong, “Ngan pynjot noh ïa ka jingstad jong kiba stad bad ngan kyntait sharud ïa ka jingshemphang jong ki riewshemphang.”

²⁰ Kumta te, hangno kata ka buh ïa kiba stad? lane ki riewshemphang? lane ki nongïatainia batbit jong kane ka pyrthei? U Blei u la pyn-i ba ka jingstad jong kane ka pyrthei ka long ka jingibieit!

²¹ Naba U Blei ha ka jingstad jong u, um shym la pynlah ïa ki briew ban ithuh ïa u da ka jingstad jong ki hi. Pynban da kata kaba la khot ka khubor “ba-ibieit” kaba ngi ïalap, U Blei u la ibit ban pynim ïa kito kiba ngeit ïa ka.

²² Ki Jiw ki kwah ïa ki kambah kum ka sakhi, bad ki Grik ki wad ïa ka jingstad.

^23-24 Katba ma ngi, ngi pynbna ïa U Khrist ba la sahnarphna, ka khubor kaba long ka jingpynwit ha ki Jiw bad kaba ibieit ha ki Jentil; hynrei ha kito ïa kiba U Blei u la khot, ki Jiw bad ki Grik ruh, kane ka khubor ka long U Khrist, uba long ka bor U Blei bad ka jingstad U Blei.

²⁵ Naba kaei kaba i kum ka jingibieit U Blei ka long kaba kham stad ban ïa ka jingstad briew, bad kaei kaba i kumba ka long ka jingtlot U Blei ka long kham khlaiñ ban ïa ka bor briew.

²⁶ Mynta to kynmaw aïu phi la long, ko ki parabangeit jong nga, mynba U Blei u la khot ïa phi. Na ka liang kaba kynja briew tang khyndiat na phi, phi la long kiba stad ne kiba khlaiñbor ne kiba don kyrdan kaba halor ha ka imlang sahlang.

²⁷ U Blei u la jied khnang ïa kaei kaba ka pyrthei ka kheiñ ba ka long kaba ibieit khnang ban pynlehrain ïa kiba stad, bad u la jied ïa kaei kaba ka pyrthei ka kheiñ ba ka long kaba tlot khnang ban pynlehrain ïa kiba donbor.

²⁸ U la jied ïa kaei kaba ka pyrthei ka ñiew poh bad ibeiñ, bad ka pyrkhat ba kam long ei ei, khnang ban pynjot ïa kaei kaba ka pyrthei ka pyrkhat ba ka long kaba donkam.

²⁹ Kane ka mut ba ym don uba lah ban sngewsarong ha khmat jong U Blei.

³⁰ Hynrei U Blei u la wallam ïa phi ha U Khrist Jisu, bad U Blei u la pynlong ïa U Khrist ban long ka jingstad jong ngi. Da u, la pynïasuk ïa ngi bad U Blei; ngi long ki briew bakhuid jong U Blei bad la pyllaitluid ïa ngi.

³¹ Te kumta, kumba ka Jingthoh Bakhuid ka ong, “Uno uno uba kwah ban sngewsarong, u dei ban sngewsarong ha kaei kaba U Trai u la leh.”