1 KHRONIKL 9 - Khasi CL Bible (BSI)

Ki briew kiba wan phai na ka jinglongmraw

¹ Ïa baroh ki paid Israel la buh jingkheiñ kat kum ki longïing jong ki, bad ïa kane ka jingtip la buh jingthoh ha Ka Kitab jong ki Syiem ka Israel. Ïa ki paid Judah la pynryngkang par sha Babilon kum ka jingpynshitom ïa ki pop jong ki.

² Kiba la wan phai nyngkong sha la ki jaka ha ki nongbah ki dei ki traishnong Israel, ki lyngdoh, ki Lebi, bad ki nongtrei ha ka Templ.

³ Ki paid na ki jait Judah, Benjamin, Ephraim, bad Manasseh ki leit shong leit sah ha Jerusalem.

^4-6 Don hynriewspah khyndaiphew tylli ki longïing na ka jait Judah kiba shong basah ha Jerusalem. Ki khun ki ksiew jong u Peres u khun jong u Judah, ki don u Uthai kum u nongïalam jong ki, uba dei u khun jong u Ammihud bad u ksiew jong u Omri. Kiwei pat ki kpa tymmen jong u ki kynthup ïa u Imri bad u Bani. Ki khun ki ksiew jong u Shelah u khun jong u Judah, ki don u Asaïah kum u nongïalam jong ki, uba dei u khlieh jong ka longïing jong u. Ki khun ki ksiew jong u Serah u khun jong u Judah, ki don u Jeuel kum u nongïalam jong ki.

^7-8 Kine harum ki dei ki dkhot jong ka jait Benjamin kiba shong basah ha Jerusalem: U Sallu u khun jong u Meshullam, u dei u khun jong u Hodabaïah, u khun jong u Hassenuah U Ibneïah u khun jong u Jeroham U Elah, u khun jong u Ussi bad u ksiew jong u Mikhri U Meshullam u khun jong u Shephataïah, u dei u khun jong u Reuel u khun jong u Ibnijah.

⁹ Don khyndaispah sanphew hynriew tylli ki longïing jong kane ka jait kiba shong basah hangta. Baroh ki rangbah kiba la jer kyrteng haneng ki dei ki khlieh jong ki longïing.

Ki lyngdoh kiba shong basah ha Jerusalem

^10-12 Ki lyngdoh kiba shong basah ha Jerusalem ki long kumne harum: U Jedaïah, u Jehoïarib, bad u Jakhin; U Asaraïah u khun jong u Hilkaïah, (u rangbah synshar bahakhlieh duh ha ka Templ), uba ki kpa tymmen jong u ki kynthup ïa u Meshullam, u Sadok, u Meraïoth, bad u Ahitub U Adaïah u khun jong u Jeroham, uba ki kpa tymmen jong u ki kynthup ïa u Pashhur bad u Malkhijah U Maasai u khun jong u Adiel, uba ki kpa tymmen jong u ki kynthup ïa u Jahserah, u Meshullam, u Meshillemith, bad u Immer.

¹³ Ki lyngdoh kiba dei ki khlieh jong ki longïing ki long baroh shihajar hynñiewspah hynriewphew ngut. Ki long kiba tbit bha ha baroh ka kam ba ki trei ha ka Templ.

Ki Lebi kiba shong basah ha Jerusalem

^14-16 Ki Lebi kiba shong basah ha Jerusalem ki long kumne harum: U Shemaïah u khun jong u Hasshub, uba ki kpa tymmen jong u ki kynthup ïa u Asrikam bad u Hashabaïah, na ka kur Merari U Bakbakkar, u Heresh, u Galal U Mattanaïah u khun jong u Mikah, uba ki kpa tymmen jong u ki kynthup ïa u Sikhri bad u Asaph U Obadaïah, u khun jong u Shemaïah, uba ki kpa tymmen jong u ki kynthup ïa u Galal bad u Jeduthun U Berekhaïah, u khun jong u Asa, bad u ksiew jong u Elkanah, uba shong ba sah ha ka thain kaba dei jong ka shnong Netophah.

Ki nongap ïa ka Templ kiba shong basah ha Jerusalem

¹⁷ Ki nongap ïa ka Templ kiba shong basah ha Jerusalem ki long kumne harum: u Shallum, u Akkub, u Talmon, bad u Ahiman. U Shallum u dei u nongïalam jong ki.

¹⁸ Naduh kata ka por, la ju buh ïa ki dkhot jong ki kur jong ki ha ka jaka rung bashaphang mihngi sha ka Khyrdop Syiem. Mynshuwa ki la ju ïeng ap phira ha ki khyrdop sha ka jaka shong dara jong ki Lebi.

¹⁹ U Shallum, u khun jong u Kore, bad u ksiew jong u Ebiasaph, ryngkat bad ki para dkhot jong ka kur jong u Korah, ki don ka jingkitkhlieh ban ap ha khmat ka jaka rung sha ka Ïingjaiñ Ka Jingdon Ryngkat U Trai, kumba ki kpa tymmen jong ki, ki la leh mynba ki ap ïa ka jaka shong dara jong U Trai.

²⁰ U Phineas u khun jong u Eleasar — ai ba U Trai un long lem bad u! — u la pynïaid ïa ki ha kawei ka por.

²¹ U Sekharaïah u khun jong u Meshelemaïah u long ruh u nongap phira ha khmat ka jaka rung sha ka Ïingjaiñ Ka Jingdon Ryngkat U Trai.

²² Baroh lang, arspah khat-ar ngut ki rangbah la jied kum ki nongap phira ïa ki jaka rung bad ki khyrdop. La buh jingkheiñ kat kum ki nongrit ha kaba ki shong ki sah. Dei u syiem Dabid bad u Samuel u Nongïathuhlypa kiba la buh ïa ki kpa tymmen jong ki ha kine ki kyrdan ba don jingkitkhlieh.

²³ Ma ki bad ki khun ki ksiew jong ki, ki bteng ban ap phira ïa ki khyrdop sha ka Templ.

²⁴ Ka don ka khyrdop kaba phai marpyrshah ha kawei kawei ka phang, shatei, shathie, mihngi, bad sepngi, bad kawei pa kawei ka don la u nongap phira uba hakhlieh duh.

²⁵ Ïa kine ki nongap la ïarap da ki ba-ha-ïing ha-sem jong ki, kiba shong basah ha ki nongrit kiba dei ban ïa-ap kylliang man la ki hynñiew sngi.

²⁶ Ki san ngut ki rangbah nongap bahakhlieh duh ki dei ki Lebi bad ki don ka jingkitkhlieh ba-halor eh. Ki don ruh ka jingkitkhlieh na ka bynta ki kamra ha ka Templ, bad na ka bynta ka jingpynbiang bam hangta.

²⁷ Ki shong ki sah hajan ka Templ, namar ka dei ka kamram jong ki ban ap ïa ka, bad ban plie ïa ki khyrdop man ka step.

Kiwei pat ki Lebi

²⁸ Kiwei pat ki Lebi ki sumar ïa ki khiew ki pliang ba la pyndonkam ha ka jingshakri. Ki khmih bha ïa ki ha ka por ba sei ïa ki shabar bad haba wallam pat ïa ki shapoh man ka por ba pyndonkam ïa ki.

²⁹ Kiwei pat ki sumar ïa kiwei ki tiar ki tar kiba kyntang, bad ïa u 'purew, ka waiñ, ka umphniang Olib, ka jingiwbih, bad ki musla.

³⁰ Hynrei ka jingkitkhlieh ban khleh ïa ki musla ka dei jong ki lyngdoh.

³¹ U Lebi uba kyrteng u Mattithaïah, u khun nyngkong jong u Shallum, uba na ka kur u Korah, u kitkhlieh ban shet ïa ki kpu jingainguh.

³² Ki dkhot jong ka kur u Kohath kito kiba na ka jait Kohath ki kitkhlieh ban pynkhreh ïa u kpu uba kyntang ha ka Templ man la ka Sabbaton.

³³ Katto katne na ki longïing ki Lebi ki don ka jingkitkhlieh na ka bynta ka tem ka put ha ka Templ. Ki khlieh jong kine ki longïing ki shong ki sah ha ki katto katne tylli ki ïing ka Templ bad ki long kiba laitluid na kiwei pat ki kamram namar ki shah khot mynsngi bad mynmiet.

³⁴ Ki rangbah kiba la jer kyrteng haneng ki dei ki khlieh jong ki longïing Lebi, kat kum ki pateng ki kpa tymmen jong ki, ki dei ki nongïalam kiba shong basah ha Jerusalem.

Ki kpa tymmen bad ki khun ki ksiew jong u syiem Saul

³⁵ U Jeiel u la seng ïa ka nongbah Gibeon bad u shongduh hangta. Ka tnga jong u ka kyrteng ka Maakah.

^36-37 U khun nyngkong jong u, u dei u Abdon, bad kiwei pat ki khun shynrang jong u ki dei u Sur, u Kish, u Baal, u Ner, u Nadab, u Gedor, u Ahio, u Sekharaïah, bad u Mikloth u kpa jong u Shimeah.

³⁸ Ki khun ki ksiew jong ki, ki shong ka sah ha Jerusalem, marjan bad kiwei pat ki longïing jong ka kur jong ki.

³⁹ U Ner u dei u kpa jong u Kish, bad u Kish u dei u kpa jong u Saul. U Saul u don saw ngut ki khun shynrang: u Jonathan, u Malkhishua, u Abinadab, bad u Eshbaal.

⁴⁰ U Jonathan u dei u kpa jong u Meribbaal, uba dei u kpa jong u Mikah.

⁴¹ U Mikah u don saw ngut ki khun shynrang: u Pithon, u Melekh, u Tarea, bad u Ahas.

⁴² U Ahas u dei u kpa jong u Jarah, uba dei u kpa jong ki lai ngut ki khun shynrang: u Alemeth, u Asmabeth, bad u Simri. U Simri u dei u kpa jong u Mosa.

⁴³ U Mosa u dei u kpa jong u Binea, u Binea u dei u kpa jong u Rephaïah, u Rephaïah u dei u kpa jong u Eleasah, bad u Eleasah u dei u kpa jong u Asel.

⁴⁴ U Asel u don hynriew ngut ki khun shynrang: u Asrikam, u Bokheru, u Ishmael, u Shearaïah, u Obadaïah, bad u Hanan.