1 KHRONIKL 5 - Khasi CL Bible (BSI)

Ki khun ki ksiew jong u Reuben

¹ Kine ki long ki khun ki ksiew jong u Reuben, uba nyngkong na ki khun shynrang jong u Jakob. (Namar ba u la ïathiah shongkha bad kawei na ki tnga kliar jong u kpa jong u, u la duh noh ïa ki hok kiba dei ki jong u khun nyngkong, bad ïa kito ki hok la ai ha u Joseph.

² Ka dei ka jait Judah, pynban, kaba la long kaba khlaiñ tam bad kaba pynmih u nongsynshar ïa ki jait baroh.)

³ U Reuben, uba nyngkong na ki khun shynrang jong u Jakob, u don saw ngut ki khun shynrang: u Hanokh, u Pallu, u Hesron, bad u Karmi.

^4-6 Kine ki long ki khun ki ksiew jong u Joel pateng la pateng: u Shemaïah, u Gog, u Shimei, u Mikah, u Reaïah, u Baal, bad u Beerah. U Tiglath Pileser, u patsha ka Assyria, u la kem ïa u Beerah, u nongïalam jong ka jait, bad u la pynryngkang par ïa u.

⁷ Ki jingbuh jingthoh jong ka longïing ka kdew ïa kine ki nongïalam kur ha ka jait Reuben: u Jeiel, u Sekharaïah,

⁸ bad u Bela, u khun jong u Asas bad u ksiew jong u Shema, na ka kur Joel. Kane ka kur ka shong ka sah ha Aroer bad hapoh ka thain nangta shaphang shatei sha Nebo bad Baal Meon.

⁹ Ki don shibun ki kynhun masi ha ka ri Gilead, bad kumta ki la dakhol ïa ka ri kat haduh ka phang mihngi ha ka ri shyiap kaba ïar ter ter shaduh ka wah Ïuphratis.

¹⁰ Ha ka por jong u syiem Saul ka jait Reuben ka tur ïaleh ïa ki Hagrit, la pynïap ïa ki ha ka thma, bad ki la dakhol ïa ka ri jong ki ha ka bynta ba sha mihngi jong ka Gilead.

Ki khun ki ksiew jong u Gad

¹¹ Ka jait Gad ka shong ka sah ha ka phang bashatei jong ka jait Reuben ha ka ri Bashan kat haduh ka Salekah.

¹² U Joel u dei u nongseng ïa ka kur kaba kham ha khmat, bad u Shapham ïa kaba ar ka kur kaba kham donkam. U Janai bad u Shaphat ki dei ki nongseng ïa kiwei pat ki kur ha Bashan.

¹³ Kiwei pat ki dkhot jong ka jait ki dei na kine harum ki hynñiew tylli ki kur: u Mikhael, u Meshullam, u Sheba, u Jorai, u Jakan, u Sia, bad u Eber.

¹⁴ Ki dei ki khun ki ksiew jong u Abihail u khun jong u Huri, uba ki kpa tymmen jong u la lapdien kumne harum: u Abihail, u Huri, u Jaroah, u Gilead, u Mikhael, u Jeshishai, u Jahdo, u Bus.

¹⁵ U Ahi, u khun jong u Abdiel bad u ksiew jong u Guni, u dei u khlieh jong kine ki kur.

¹⁶ Ki shong ki sah ha ka thain jong ka Bashan bad Gilead, ha ki shnong hangta bad ha kylleng ki jaka phlang jong ka Sharon.

¹⁷ (Ïa kine ki jingthoh la pynlum pynlang ha ki sngi jong u Jotham u syiem Judah bad ha ki sngi u Jeroboam uba Ar, u syiem Israel.)

Ki shipai jong ki jait kiba sha mihngi

¹⁸ Ha ki jait Reuben, Gad, bad Manasseh ba sha Mihngi la don sawphew saw hajar hynñiewspah hynriewphew ngut ki shipai, kiba la ïoh jinghikai bha ha kaba pyndonkam ïa ki stieh, ki waitlam bad ki ryntieh.

¹⁹ Ki la leit ïaleh thma pyrshah ïa ki jait Hagrit jong ka Jetur, Naphish, bad Nodab.

²⁰ Ki la buh ka jingshaniah ha U Blei bad ki la duwai ha u na ka bynta ka jingïarap, bad U Blei u la jubab ïa ki jingduwai jong ki bad u la pynlong ïa ki ban jop halor ki Hagrit bad ki paralok jong ki.

²¹ Ki la ïohkem na ki nongshun sanphew hajar tylli ki ut, ar lakh sanphew hajar tylli ki langbrot, bad ar hajar tylli ki kada, bad ki la shim shi lakh ngut ki koidi thma.

²² Ki la pynïap bun bah ki nongshun, namar ba ka thma ka la long ka mon U Blei. Bad ki la ïaishong ïaisah ha kata ka thain haduh ka jingshah ringmraw.

Ki briew jong ka Manasseh ba sha mihngi

²³ Ki briew jong ka Manasseh ba sha mihngi ki shongduh ha ka thain jong ka Bashan kat shaduh shatei sha Baal Hermon, Senir bad lum Hermon, bad ka jingbun briew jong ki ka la roi shikatdei eh.

²⁴ Kine harum ki dei ki khlieh jong ki kur jong ki: u Epher, u Ishi, u Eliel, u Asriel, u Jeremaïah, u Hodabaïah, bad u Jahdiel. Baroh ki dei ki shipai kiba pawkhmat eh, ki nongïalam kiba pawnam jong ki kur jong ki.

Ïa ki jait ba sha mihngi la pynryngkang par

²⁵ Hynrei ki briew kim shym ïaineh ha U Blei jong ki kpa tymmen jong ki bad ki la iehnoh ïa u ban mane ïa ki blei jong ki jaitbynriew kiba U Blei u la beh krad na ka ri.

²⁶ Kumta U Blei u la pynlong ïa u Pul, u patsha ka Assyria (ïa uba la tip kum u Tiglath Pileser) ki la wan hiarthma ïa ka ri jong ki. U la pynryngkang par ïa ki jait Reuben, Gad, bad Manasseh ba sha Mihngi bad u la pynshongduh ïa ki junom ha Halah, Habor bad hajan ka Wah Gosan.