1 KHRONIKL 29 - Khasi CL Bible (BSI)

Ki jingai sngewbha ban Tei ïa ka Templ

¹ U Syiem Dabid u pynbna ha baroh kiba ïalumlang, “U Solomon u khun jong nga u dei ma u uba U Blei u la jied, hynrei u dang samla bad dang duna ka jingtbit. Ka kam ban leh ka long kaba khraw, namar kane kam dei ka ïingsyiem na ka bynta ki briew hynrei ka Templ na ka bynta U Trai U Blei.

² Nga la leh katba nga lah ban pynbiang ki tiar ki tar na ka bynta ka Templ — Ka ksiar, ka rupa, ka rnong, ka nar, ki dieng, ki mawkordor, bad ki mawlynnai, ki maw na ka bynta ki jingthaw dur, bad shibun u maw marbl.

³ Nalor kane baroh kaba nga la pynbiang, nga la ai ruh ïa ka rupa bad ka ksiar na ka jingdon jingem jong nga namar ka jingieit jong nga ïa ka Templ jong U Blei.

⁴ Nga la ai palat ïa ka shispah ton ka ksiar nylla bad la jan arspah sawphew ton ka rupa nylla ban pynitynnat ïa ki kynroh jong ka Templ

⁵ bad na ka bynta ki tiar ki tar baroh kiba ki nong-ohdur ki dei ban shna. Mynta mano pat ba mon ban ai kylluid mynsiem sha U Trai?”

⁶ Te ki rangbah kur, ki rangbah synshar jong ki jait, ki nongai hukum jong ka kynhun shipai, bad ki nongpynïaid ïa ka jingdon jingem jong u syiem da la ka mon sngewbha ki ai

⁷ ïa kine harum na ka bynta ka jingtrei ha ka Templ: Palat ban ïa ka shispah hynñiewphew ton ka ksiar, palat ïa ka laispah sawphew ton ka rupa, bad la jan hynriewspah arphew ton ka rnong, bad palat ban ïa ka lai hajar sawspah ton ka nar.

⁸ Kito kiba don ki mawkordor ki la ai ïa ki sha ka jingkynshew jong ka Templ, kaba la khmih da u Jehiel jong ka kur Lebi jong u Gershon.

⁹ Ki paidbah ki la ai da ka mon sngewbha sha U Trai, bad ki kmen ba ki la ai shibun. U Syiem Dabid ruh u la sngewkmen shikatdei eh.

U Dabid u ïaroh ïa U Blei

¹⁰ Hangta ha khmat uta u paidbah baroh, u syiem Dabid u ïaroh ïa U Trai. U ong “A Trai U Blei jong ki kpa tymmen jong ngi, ai ba yn ïaroh ïa me junom la junom!

¹¹ Me long uba khraw bad uba donbor, uba donburom, uba itynnat bad uba iphieng. Kiei kiei baroh ha bneng bad ha khyndew ki dei ki jong me; me dei u syiem, u nongsynshar bahakhlieh duh halor baroh.

¹² Ka spah baroh ka wan na me; me synshar halor kiei kiei baroh da ka jingkhlaiñ bad ka bor jong me, bad me lah ban pynlong ïano ïano uba khraw bad uba khlaiñ.

¹³ Mynta ko Blei jong ngi, ngi ainguh ïa me, bad ngi ïaroh ïa ka kyrteng kaba donburom jong me.

¹⁴ “Pynban ki briew jong nga bad ma nga ngim lah shisha ban ai ei ei ïa me, namar kaei kaei baroh ka dei ka jingai sngewbha jong me, bad ngi la ai biang sha me ïa kaei kaba dei ka jong me hi.

¹⁵ Me tip, A Trai, ba ngi ïaid lyngba ïa ka jingim kum ki kpa tymmen jong ngi ki la leh. Ki sngi jong ngi ki long kum ka syrngiew bad ngin ym lait na ka jingïap.

¹⁶ A Trai, U Blei jong ngi, ngi la wallam lang ïa kane ka spah baroh ban tei ïa ka Templ ban pyndonburom ïa ka kyrteng bakhuid jong me, hynrei kane baroh ka la wan na me bad ka long ka jong me.

¹⁷ Nga tip ba me tynjuh ïa ka dohnud jong uwei pa uwei bad me sngewbha bad ki briew kiba im hok. Ha ka hok bad ka jinglong sngur nga la ai da ka mon sngewbha ïa kane baroh sha me, bad nga la ïohi katno ki briew jong me kiba la ïalumlang hangne ki kmen ban wanrah ki jingainguh sha me.

¹⁸ Ko Trai, U Blei jong u Abraham, u Isaak, bad u Jakob, ki kpa tymmen jong ngi, ki la buh ïa kum kane ka jingmane kaba khlaiñ ha ki dohnud jong ki briew jong me bad ki ïai pynlong ïa ki ban ïaineh ha me.

¹⁹ Ai ha u Solomon u khun jong nga ka jingkwah naduh ka dohnud ban kohnguh ïa kaei kaei baroh kaba me la hukum bad ban tei ïa ka Templ ïa kaba nga la pynlong kine ki jingpynkhreh.”

²⁰ Nangta u Dabid u la hukum ïa u paidbah, “Ïaroh ïa U Trai U Blei jong phi!” Bad kiba la ïalumlang baroh ki la ïaroh ïa U Trai, U Blei jong ki kpa tymmen jong ki, bad ki la pyndem la ki khlieh bad ai burom ïa U Trai bad ruh ïa u syiem.

²¹ Ha ka sngi kaba bud, ki pynïap ïa ki jingri kum ki jingkñia, da kaba pynkyntang ïa ki sha U Trai, bad nangta ki ai ïa ki ha ki briew ban bam. Shuh shuh, ki la kñia shihajar tylli ki masi lyngraw, shihajar tylli ki langbrot shynrang, bad shihajar tylli ki khunlangbrot, ïa kiba ki la thang tylli halor ka duwan. Ki la wanrah ruh ki jingainguh waiñ.

²² Kumta ha kata ka sngi ki la kmen shikatdei katba ki ïabam ïadih ha ka jingdon ryngkat U Trai. Ha ka sien kaba ar ki la thung syiem ïa u Solomon. Ha ka kyrteng jong U Trai ki la pynsleh ïa u kum u nongsynshar jong ki bad ïa u Sadok kum u lyngdoh.

²³ Kumta u Solomon u kiew ïa ka khet u Dabid u kpa jong u ïa kaba U Blei U Trai u la seng. U la long u syiem uba jop, bad ka jaitbynriew Israel baroh ka la kohnguh ïa u.

²⁴ Baroh ki rangbah synshar bad ki shipai, bad wat kiwei pat ki khun shynrang baroh jong u Dabid ki kular ban kohnguh ïa u Solomon kum u syiem.

²⁵ U Trai u la pynlong ïa ka jaitbynriew baroh kawei ban tiengburom ïa u Solomon, bad u la pynlong ïa u uba kham donburom ban ïa uno uno uwei pat u syiem uba la synshar ïa ka Israel.

Ka jingïathuh kyllum ïa ka jingsynshar u Dabid

²⁶ U Dabid u khun jong u Jesse u synshar sawphew snem halor ki Israel baroh.

²⁷ U la synshar ha Hebron hynñiew snem ha Jerusalem laiphew lai snem.

²⁸ U la ïap ha ka rta kaba la tymmen bha, uba la dap kyrhai da ka spah bad ka burom; bad u Solomon u khun jong u, u long syiem ha ka jaka jong u.

²⁹ Ïa ka histori jong u syiem Dabid naduh kaba sdang haduh kaba kut la buh jingthoh ha ki kot buh jingkynmaw jong ki lai ngut ki nongïathuhlypa, u Samuel, u Nathan, bad u Gad.

³⁰ Ki jingthoh ki ïathuh kumno u la synshar, haduh katno u long uba khrawbor, bad ïa kiei kiei baroh kiba la jia ha u, ha ki Israel, bad ha ki hima baroh kiba marjan.