1 KHRONIKL 28 - Khasi CL Bible (BSI)

Ki jingbthah u Dabid shaphang ka Templ

¹ U Syiem Dabid u hukum ïa baroh ki rangbah synshar jong ki Israel ban ïalumlang ha Jerusalem. Kumta baroh ki rangbah synshar jong ki jait, ki rangbah synshar kiba pynïaid ïa ka kam jong ka Hima, ki nongïalam jong ki kur, ki nongpeit ïa ki jingdon jingem bad ki jingri kiba dei jong u syiem bad ki khun shynrang jong u — Shisha ki rangbah synshar ka ïingsyiem, ki shipai kiba lamkhmat, bad ki rangbah badonkam — ki la ïalumlang ha Jerusalem.

² U Dabid u ïeng ha khmat jong ki, bad u ong, “Ko ki para ri jong nga, to shahshkor ïa nga. Nga la kwah ban tei ka ïingshong neh ïa ka Synduk ka Jutang, ka jingïuhkjat jong U Trai U Blei jong ngi. Nga la pynkhreh ban tei ïa ka Templ ban ai burom ïa u,

³ hynrei u la khang ïa nga ban tei ïa ka, namar nga dei u nongïaleh thma bad nga lah pynmih shibun ka snam.

⁴ U Trai U Blei ki Israel, u la jied ïa nga bad ïa ki khun ki ksiew jong nga ban synshar junom ïa ki Israel; u la jied ïa ka jait Judah ban pynmih nongïalam, bad na ka jait Judah u la jied ïa ka ïing u kpa jong nga. Na baroh kata ka longïing ka long ka jingsngewbha jong u ban shim ïa nga bad ban pynlong ïa nga u syiem halor ki Israel baroh.

⁵ U la ai ïa nga shibun ki khun shynrang bad napdeng jong ki baroh u la jied ïa u Solomon ban synshar halor ka Israel, ka hima ka jong U Trai.

⁶ “U Trai u ong ha nga, ‘Dei u Solomon u khun jong me u ban tei ïa ka Templ jong nga. Nga la jied ïa u ban long u khun jong nga, bad nga ngan long u kpa jong u.

⁷ Ngan pynlong ïa ka hima jong u ka ban neh junom lada u ïai kohnguh thikna ïa ki aiñ bad ki hukum jong nga baroh kumba u leh mynta.’

⁸ “Kumta mynta, ko paidbah jong nga, ha khmat U Blei jong ngi bad ha khmat kane ka jingïalang ki Israel baroh, ki paidlang jong U Trai, nga kyntu ïa phi ba phin kohnguh da kaba phikir bha ïa kaei kaei baroh kaba U Trai U Blei jong ngi u la hukum ïa ngi, ba kumta phi lah ban ïai bat kynti ïa kane ka ri kaba bha bad kumta ba phin lah ban ai pateng ïa ka junom ha ki pateng ki ban wan.”

⁹ Bad ha u Solomon u ong, “Ko khun jong nga, nga kyntu ïa me ban ithuh ïa U Blei u kpa jong me, bad ban shakri ïa u da ka dohnud kaba skhem bad da ka jingmut kaba pyndem. U tip ïa baroh ki jingpyrkhat bad ki jingkwah jong ngi. Lada me leit sha u, un pdiang ïa me, hynrei lada me phai lyndet na u, u ruh un iehnoh ïa me junom.

¹⁰ Me dei ban sngewthuh ba U Trai u la jied ïa me ban tei ïa ka Templ bakhuid jong u. Mynta leh ïa kata — bad leh ïa kata da ka jingkut jingmut baskhem.”

¹¹ U Dabid u ai ha u Solomon ïa ka dur pynkhreh jong ka jingtei baroh jong ka Templ, bad ïa ki kamra buh tiar jong ka bad ïa kiwei pat ki kamra bad ïa ka jaka kaba kyntang tam, ha kaba la map ïa ki pop.

¹² U la ai ruh ha u ïa ki dur pynkhreh jong kita baroh kiba u don ha ka jingmut ïa ki phyllaw bad ïa ki kamra sawdong jong ki bad ïa ki kamra buh ïa ki tiar jong ka Templ, bad ïa ki jingai sngewbha ba la pynkyntang sha U Trai.

¹³ U Dabid u la ai ruh ïa ki dur pynkhreh kiba ïadei bad ki jingpynbeit ryntih ïa ki lyngdoh bad ki Lebi, bad pyndep ïa ki kamram jong ki, ban trei ïa ki kam jong ka Templ bad ban sumar ïa baroh ki khiew ki pliang jong ka Templ.

¹⁴ U ai jingbthah ruh katno ka rupa bad ka ksiar kan leit ha kaba shna ïa kita ki khiew ki pliang,

¹⁵ na ka bynta kawei kawei ka sharak bad uwei uwei u diengpynïeng sharak,

¹⁶ na ka bynta ki miej kiba da ka rupa bad na ka bynta kawei kawei ka miej kaba da ka ksiar ha kaba yn ïa ki kpu ban ainguh ïa U Blei.

¹⁷ U la ai jingbthah ruh katno ka ksiar nylla kan leit ha kaba pyndonkam ban shna ïa ki proh, ki pliang, bad ki khiew, bad katno ka rupa bad ka ksiar ha kaba shna ïa ki pliang,

¹⁸ bad katno ka ksiar nylla ha kaba shna ïa ka duwan ha kaba yn thang jingiwbih, bad ha kaba shna ïa ka kali ïapom na ka bynta ki Kherub kiba pyiar la ki thapniang halor Ka Synduk Ka Jutang U Trai.

¹⁹ U Syiem Dabid u ong, “Ïa kane baroh la kynthup ha ka dur pynkhreh kaba la thoh kat kum ki jingbthah kiba U Trai da lade hi u la ai ha nga ban pyntrei.”

²⁰ U Syiem Dabid u ong ha u Solomon u khun jong u, “To long uba sngewskhem bad uba kut jingmut. Sdang ïa ka kam bad wat ai kano kano ruh kan pynsangeh ïa me. U Trai U Blei, uba nga shakri un don bad me. Un ym iehnoh ïa me, hynrei un don ryngkat bad me tad haduh ba men pyndep ïa ka kam kaba dei ban trei ha ka Templ jong u.

²¹ Ïa ki lyngdoh bad ki Lebi la pynbynta kam ba kin leh ha ka Templ. Ki nongtrei kiba don jingtbit ha ki jait kam baroh ki thrang ban ïarap ïa me, bad baroh ki briew bad ki nongïalam jong ki, ki don hapoh ka hukum jong me.”