1 KHRONIKL 27 - Khasi CL Bible (BSI)

Ka rukom pynbeit ïa ki kam shipai bad ki kam Hima Sima

¹ Kane ka long ka thup kyrteng jong ki khlieh jong ki longïing bad ki rangbah kur Israel lem bad ki rangbah synshar jong ki, kiba pynïaid ïa ka kam jong ka hima. Man la u bnai jong ka snem; kawei kawei ka kynhun kaba don arphew saw hajar ngut ka don ha ka kam hapoh u nongïalam ha uta u bnai.

^2-15 Kine harum ki long ki nongïalam na ka bynta uwei uwei bnai: Ha u bnai uba nyngkong: u Jashobeam u khun jong u Sabdiel (u dei u dkhot jong ka kur u Peres, ka bynta jong ka jait Judah) Ha u bnai uba ar: u Dodai, uba mih pateng na u Ahohi (u Mikloth u dei uba hadien jong u ha ka jingai hukum) Ha u bnai uba lai: u Benaïah u khun jong u Jehoïada u lyngdoh; u dei u nongïalam jong “Ki Laiphew ngut” (u Amissabad u khun jong u, u la long u nongïalam ïa kane ka kynhun hadien jong u) Ha u bnai uba saw: u Asahel, u para jong u Joab (u Sebadaïah u khun jong u, u shimti hadien jong u) Ha u bnai uba san: u Shamhuth, uba hiarpateng na u Ishar Ha u bnai uba hynriew: u Ira u khun jong u Ikkesh uba na Tekoa Ha u bnai uba hynñiew: u Heles, u nong Ephraim na Pelon Ha u bnai uba phra: u Sibbekai uba na Hushah (u dei u dkhot jong ka kur Serah, ka bynta jong ka jait Judah) Ha u bnai uba khyndai: u Abieser uba na Anathoth ha ka ri jong ka jait Benjamin Ha u bnai uba shiphew: u Maharai na Netophah (u dei u dkhot jong ka kur Serah) Ha u bnai uba khatwei: u Benaïah uba na Pirathon ha ka ri jong ka jait Ephraim Ha u bnai uba khat-ar: u Heldai uba na Netophah (u dei uba hiarpateng na u Othniel)

Ka jingsynshar ïa ki jait Israel

^16-22 Kane ka long ka thup kyrteng jong ki nongpynïaidkam jong ki jait Israel: Na ka jait Reuben, u nongpynïaidkam u dei Elieser u khun jong u Sikhri. Na ka jait Simeon, u nongpynïaidkam u dei u Shephataïah u khun jong u Maakah. Na ka jait Lebi, u nongpynïaidkam u dei u Hashabaïah u khun jong u Kemuel. Na ka jait Aaron, u nongpynïaidkam u dei u Sadok. Na ka jait Judah, u nongpynïaidkam u dei u Elihu, uwei na ki hynmen jong u Syiem Dabid. Na ka jait Issakhar, u nongpynïaidkam u dei u Omri u khun jong u Mikhael. Na ka jait Sebulun, u nongpynïaidkam u dei u Ishmaïah u khun jong u Obadaïah. Na ka jait Naphtali, u nongpynïaidkam u dei u Jeremoth u khun jong u Asriel. Na ka jait Ephraim, u nongpynïaidkam u dei u Hoshea u khun jong u Asasaïah Na ka jait Manasseh ba sha sepngi, u nongpynïaidkam u dei u Joel u khun jong u Pedaïah. Na ka jait Manasseh ba sha mihngi, U Iddo u khun jong u Sekharaïah. Na ka jait Benjamin, u nongpynïaidkam u dei u Jaasiel u khun jong u Abner. Na ka jait Dan, u nongpynïaidkam u dei u Asarel u khun jong u Jeroham.

²³ U syiem Dabid um shym shim jingkheiñ ïa kito kiba hapoh arphew snem, namar ka kular jong U Trai ban pynroi ïa ki paid Israel kat ka jingbun ki khlur ha ka sahit bneng.

²⁴ U Joab, u khun jong ka Seruïah, u la sdang ban shim jingkheiñ, hynrei um shym dep ïa ka. U Blei u pynshitom ïa ki Israel namar kane ka jingshim jingkheiñ, kumta ka jingdon briew bathikna ym shym la buh jingthoh ha ki jingbuh jingthoh jong u syiem Dabid.

Ki nongpynïaid ïa ki jingdon jingem u syiem

^25-31 Kane ka dei ka thup kyrteng jong kito kiba pynïaid ïa ka jingdon jingem jong u syiem: Ki kamra buh tiar u syiem: U Asmabeth u khun jong u Adiel. Ki kamra buh tiar paidbah: U Jonathan u khun jong u Ussaïah. Ka jingtrei lyngkha: U Esri u khun jong u Khelub. Ka bri sohwaiñ: U Shimei uba na Ramah. Ka kamra buh waiñ: U Sabdi uba na Shepham. Ki dieng Olib bad ki dieng Sykomore (ha ki kjat lum ba sha sepngi): U Baal Haman uba na Geder. Ka jaka buh umphniang Olib: U Joash. Ki masi ha ka Pyntha Sharon: U Shirtai uba na Sharon. Ki masi ha ki them: U Shaphat u khun jong u Adlai. Ki ut: U Obil, u nong Ishmael. Ki kada: U Jehdeïah uba na Meronoth. Ki langbrot bad ki blang: U Jasis, u nong Hagrit.

Ki nongaibuit jong u Dabid

³² U Jonathan, u kñi jong u Syiem Dabid, u long u nongaibuit batbit bad u riewshemphang. Ma u bad u Jehiel u khun jong u Hakhmoni ki dei peit ïa ka jingpynnang pynstad ïa ki khun shynrang jong u syiem.

³³ U Ahithophel u long u nongaibuit ïa u syiem, bad u Hushai u nong Arkhit u long u paralok bad u nongïasyllok jong u syiem.

³⁴ Hadien ba u Ahithophel u la ïap, u Abiathar bad u Jehoïada u khun jong u Benaïah ki long ki nongaibuit. U Joab u dei u rangbah ai hukum ïa ka kynhun shipai u syiem.