1 KHRONIKL 26 - Khasi CL Bible (BSI)

Ki nongap phira ïa ka Templ

¹ Kine ki long ki jingai kam ïa ki Lebi kiba shakri kum ki nongap phira ïa ka Templ. Na ka kur jong u Korah la don u Meshelemaïah u khun jong u Kore, na ka longïing jong u Asaph.

^2-3 U don hynñiew ngut ki khun shynrang, kiba la jer ter ter kat kum ka rta: u Sekharaïah, u Jediael, u Sebadaïah, u Jathniel, u Elam, u Jehohanan bad u Eliehoenai.

^4-5 U don ruh u Obed Edom, uba U Blei u la kyrkhu da kaba ai ha u phra ngut ki khun shynrang, kiba la jer ter ter kat kum ka rta: u Shemaïah, u Jehosabad, u Joah, u Sakhar, u Nethanel, u Ammiel, u Issakhar, bad u Peullethai.

^6-7 U Shemaïah, u khun nyngkong jong u Obed Edom, u don hynriew ngut ki khun shynrang: u Othni, u Rephael, u Obed, u Elsabad, u Elihu, bad u Semakhaïah. Ki dei ki rangbah kiba donkam ha ka kur jong ki namar ka jingtbit palat jong ki; ki ar ngut kiba khatduh, ki long kiba don ka sap bakyrpang.

⁸ Ka longïing jong u Obed Edom ka pynmih hynriewphew ar ngut ki rangbah kiba tbit bha na ka bynta kane ka kam.

⁹ Ka longïing jong u Meshelemaïah ka pynmih khatphra ngut ki rangbah kiba tbit.

¹⁰ Na ka kur jong u Merari la don u Hosah, uba don saw ngut ki khun shynrang: u Shimri, (u kpa jong u, u la pynlong nongïalam ïa u wat la um dei u khun nyngkong),

¹¹ U Hilkaïah, u Tebalaïah, bad u Sekharaïah. Ha baroh ki ïadon khatlai ngut ki dkhot jong ka longïing jong u Hosah kiba dei ki nongap phira ïa ka Templ.

¹² Ïa ki nongap phira jong ka Templ la pynïabynta ha ki kynhun kynhun kat kum ki longïing, bad la pynkhamti ïa ki kam ha ka Templ kumba long lem kiwei pat ki Lebi.

¹³ Kawei pa kawei ka longïing, la ka heh ne ka rit, ka kynting sbai ban tip ïa kano ka khyrdop ka kitkhlieh.

¹⁴ U Shelemaïah u ïoh ïa ka khyrdop kaba shaphang mihngi, bad u Sekharaïah u khun jong u, u briew uba ai ki jingmut kiba bha na ka por sha ka por, u ïoh ïa ka khyrdop kaba shaphang shatei.

¹⁵ U Obed Edom u ïoh ïa ka khyrdop kaba shaphang shathie, bad ki khun jong u ki hap peit ïa ka kamra buh tiar.

¹⁶ U Shuppim bad u Hosah ki ïoh ïa ka khyrdop kaba shaphang sepngi bad ka khyrdop Shallekheth ha ka surok kaba na neng. Ïa ka jingap phira la pynbynta ha ki por ba la buh, kawei hadien kawei pat.

¹⁷ Shaphang mihngi, don hynriew ngut ki nongap phira man la ka sngi; shaphang shatei, bad shaphang shathie, saw ngut saw ngut la buh na ka bynta ka kamra buh tiar.

¹⁸ Hajan ka jingtei kaba shaphang sepngi, don saw ngut ki nongap harud lynti bad ar ngut ha kata ka jingtei hi.

¹⁹ Kane ka long ka jingbate kam ïa ki nongap phira kiba na ka kur u Korah bad na ka kur u Merari.

Kiwei pat ki kamram ha ka Templ

²⁰ Kiwei pat ki para Lebi jong ki, ki peit ïa ka ïing jingkynshew jong ka Templ bad ki kamra buh tiar na ka bynta ki jingai sngewbha kiba la pynkyntang sha U Blei.

²¹ U Ladan, uwei na ki khun shynrang jong u Gershon, u dei u kpa tymmen jong shibun ki kynhun longïing, kynthup ïa ka longïing jong u Jehiel u khun jong u.

²² Ki ar ngut kiwei pat ki khun shynrang jong u Ladan; u Setham bad u Joel, ki dei peit ïa ki ïing jingkynshew bad ïing buh tiar jong ka Templ.

²³ Ïa ki kamram la pynkhamti ha ki khun ki ksiew jong u Amram, u Ishar, u Hebron, bad u Ussiel.

²⁴ U Shebuel, uba na ka kur u Gershon, u khun jong u Moses, u dei u rangbah synshar bahakhlieh duh uba kitkhlieh ïa ki ïing jingkynshew jong ka Templ.

²⁵ Lyngba u Elieser u para jong u Gershom u don ka jingïadei bad u Shelomith. U Elieser u dei u kpa jong u Rehabaïah, uba dei u kpa jong u Jeshaïah, u kpa jong u Joram, u kpa jong u Sikhri, u kpa jong u Shelomith.

²⁶ U Shelomith bad ki dkhot ka longïing jong u ki dei peit ïa ki jingai sngewbha baroh ba la pynkyntang sha U Blei da u syiem Dabid, ki khlieh jong ki longïing, ki nongïalam jong ki kur, bad ki rangbah ai hukum ïa ka kynhun shipai.

²⁷ Ki shim katto katne na ki jinglute ba ki ïohknieh ha ka thma bad pynkyntang ïa ki ban pyndonkam ha ka Templ.

²⁸ U Shelomith bad ka longïing jong u, ki dei peit ïa baroh kiei kiei kiba la pynkyntang ban pyndonkam ha ka Templ, kynthup ruh ïa ki jingai sngewbha kiba la wanlam da u Samuel, u nongïathuhlypa, da u syiem Saul, da u Abner u khun jong u Ner, bad da u Joab u khun jong ka Seruïah.

Ki kamram jong kiwei pat ki Lebi

²⁹ Napdeng kiba hiarpateng na u Ishar, ïa u Khenanaïah bad ki khun shynrang jong u la buh ban peit ïa ki kam synshar khadar: Kaba buh jingthoh bad kaba bishar ïa ki paid Israel.

³⁰ Napdeng ki khun ki ksiew jong u Hebron, u Hashabaïah bad shihajar hynñiewspah ngut ki ba-ha-ïing jong u, baroh ki briew kiba tbit, la buh ban peit ïa ka kam synshar ha baroh ki kam niam bad ki kam hima sima ha Israel kaba shaphang sepngi jong ka wah Jordan.

³¹ U Jeraïah u dei u nongïalam jong ki khun ki ksiew jong u Hebron. Ha ka snem kaba sawphew ba u Dabid u la long syiem, la don ka jingtohkit shaphang ka pateng longïing jong ki khun ki ksiew jong u Hebron, bad la shem ba ki shipai bapawkhmat kiba na kane ka longïing la lap ba ki shong ki sah ha Jaser ha ka ri Gilead.

³² U syiem Dabid u jied ar hajar hynñiewspah ngut ki rangbah kiba tbit jong ki longïing na ki kur jong u Jeraïah bad u buh ïa ki ban peit ïa ki kam niam bad ki kam hima sima ha Israel kaba shaphang mihngi jong ka wah Jordan — ki ri jong ki Reuben, ki Gad, bad ki Manasseh ba sha Mihngi.