1 KHRONIKL 25 - Khasi CL Bible (BSI)

Ki nongput nongtem ha ka Templ

¹ U syiem Dabid bad ki nongïalam jong ki Lebi ki la jied ïa kine ki kur jong ki Lebi ban ïalam ïa ka jingmane: u Asaph, u Heman, bad u Jeduthun. Ki dei ban pynbna ïa ki khubor jong U Blei, ïa kiba la synran da ki sur ki duitara bad ki shakuriaw. Kane ka dei ka thup kyrteng jong ki briew kiba la jied ban ïalam ïa ka jingmane, lem bad ka jait jingshakri kaba kawei pa kawei ka kynhun kan pyndep:

² Ki saw ngut ki khun shynrang jong u Asaph: u Sakkur, u Joseph, u Nethanaïah, bad u Asharelah. Kine ki hap ha ka jingpynïaid jong u Asaph, uba pynbna ïa ki khubor jong U Blei man ka por ba u syiem u hukum.

³ Ki hynriew ngut ki khun shynrang jong u Jeduthun: u Gedalaïah, u Seri, u Jeshaïah, u Shimei, u Hashabaïah, bad u Mattithaïah. Hapoh ka jingpynïaid u kpa jong ki, ki la pynbna ïa ki khubor jong U Blei, ba la synran da ki sur jong ki duitara, bad ki rwai ïaroh bad ainguh ïa U Trai.

⁴ Ki khatsaw ngut ki khun shynrang jong u Heman: u Bukkaïah, u Mattanaïah, u Ussiel, u Shebuel, u Jerimoth, u Hananaïah, u Hanani, u Eliathah, u Giddalti, u Romamti Eser, u Joshbekashah, u Mallothi, u Hothir, bad u Mahasioth.

⁵ U Blei u la ai ha u Heman, u nongïathuhlypa jong u syiem, ïa kine ki khatsaw ngut ki khun shynrang bad ruh lai ngut ki khun kynthei, kumba u la kular, khnang ban pynkupbor ïa u Heman.

⁶ Baroh ki khun shynrang jong u, ki tem ïa ki shakuriaw bad ki duitara hapoh ka jingpynïaid u kpa jong ki, ban synran ïa ka jingmane ha ka Templ. Bad u Asaph, u Jeduthun bad u Heman ki don hapoh ki hukum na u syiem.

⁷ Baroh kine ki arphew saw ngut ki rangbah ki long kiba tbit; bad ki para Lebi jong ki, ki long ki nongput nongtem kiba la ïoh jinghikai. Baroh ki ïadon arspah phraphew phra ngut.

⁸ Bad tip ïa la ki jong ki kamram, baroh ki ïakynting sbai, la ki dei kiba dang samla ne kiba la rangbah, kiba tbit lane kiba dang pyrshang.

^9-31 Ïa kine ki arspah phraphew phra ngut ki rangbah la pynbynta kat kum ki longïing ha ki arphew saw tylli ki kynhun kiba khat-ar ngut, bad u nongïalam uba peit ïa kawei kawei ka kynhun. Kane ka dei ka jingbuhbeit ha kaba ki don ha ka jingtrei: 1. U Joseph na ka longïing jong u Asaph. 2. U Gedalaïah. 3. U Sakkur. 4. U Seri. 5. U Nethanaïah. 6. U Bukkaïah. 7. U Asharelah. 8. U Jeshaïah. 9. U Mattanaïah. 10. U Shimei. 11. U Ussiel. 12. U Hashabaïah. 13. U Shebuel. 14. U Mattithaïah. 15. U Jerimoth. 16. Hananaïah. 17. U Joshbekashah. 18. U Hanani. 19. U Mallothi. 20. U Eliathah. 21. U Hothir. 22. U Giddalti. 23. U Mahasioth. 24. U Romamti Eser.