1 KHRONIKL 23 - Khasi CL Bible (BSI)

¹ Haba u Dabid u la tymmen bha, u thung ïa u Solomon u khun jong u kum u syiem halor ki Israel.

Ka kam jong ki Lebi

² U Syiem Dabid u lumlang ïa ki nongïalam baroh jong ki Israel, bad ïa baroh ki lyngdoh bad ki Lebi.

³ U shim jingkheiñ ïa baroh ki shynrang Lebi kiba la don laiphew snem lane tam. Baroh ki don laiphew phra hajar ngut.

⁴ U syiem u buh arphew saw hajar ngut na ki ban pynïaid ïa ka kam ha ka Templ, hynriew hajar ngut ban buh jingthoh bad ban bishar ïa ki kam ïakajia,

⁵ saw hajar ngut ban ap phira, bad saw hajar ngut ban ïaroh ïa U Trai da kaba pyndonkam ïa ki jingtem jingput ba la pynbiang da u syiem na ka bynta kane ka jingthmu.

⁶ U Dabid u pynbynta ïa ki Lebi ha ki lai kynhun kat kum ki kur jong ki: Gershon, Kohath, bad Merari.

⁷ U Gershon u don ar ngut ki khun shynrang: u Ladan bad u Shimei.

⁸ U Ladan u don lai ngut ki khun shynrang: u Jehiel, u Setham, bad u Joel,

⁹ kiba long ki khlieh jong ki kur kiba hiarpateng na u Ladan. (U Shimei u don lai ngut ki khun shynrang: u Shelomoth, u Hasiel, bad u Haran.)

^10-11 U Shimei u don saw ngut ki khun shynrang: u Jahath, u Sina, u Jeush, bad u Beraïah, kat kum ka rta jong ki. U Jeush bad u Beraïah kim shym don bun ngut ki khun ki ksiew; kumta la ñiew ïa ki kum kawei ka kur.

¹² U Kohath u don saw ngut ki khun shynrang: u Amram, u Ishar, u Hebron, bad u Ussiel.

¹³ U Amram, u khun nyngkong jong u, u dei u kpa jong u Aaron bad u Moses. (Ïa u Aaron bad ki khun ki ksiew jong u la pynkyrpang ban sumar junom ïa ki tiar ki tar kiba khuid, ban thang jingiwbih ha ka jingmane ïa U Trai, ban shakri ïa u, bad ban kyrkhu ïa ki briew ha ka kyrteng jong u.

¹⁴ Hynrei ïa ki khun shynrang jong u Moses, u briew jong U Blei, la kynthup lang hapdeng ki Lebi.)

¹⁵ U Moses u don ar ngut ki khun shynrang, u Gershom bad u Elieser.

¹⁶ U nongïalam napdeng ki khun shynrang jong u Gershom u dei u Shebuel.

¹⁷ U Elieser u don tang uwei u khun, u Rehabaïah, hynrei u Rehabaïah u don shibun ki khun ki ksiew.

¹⁸ U Ishar, u khun uba ar jong u Kohath, u don u khun, u Shelomith, u khlieh jong ka kur.

¹⁹ U Hebron, u khun uba lai jong u Kohath, u don saw ngut ki khun shynrang: u Jeraïah, u Amaraïah, u Jehasiel, bad u Jekameam.

²⁰ U Ussiel, u khun uba saw jong u Kohath, u don ar ngut ki khun shynrang, u Mikah bad u Isshaïah.

²¹ U Merari u don ar ngut ki khun shynrang, u Mahli bad u Mushi. U Mahli ruh u don ar ngut ki khun shynrang, u Eleasar bad u Kish,

²² hynrei u Eleasar u la ïap khlem don khun shynrang; u don tang ki khun kynthei. Ki khun kynthei jong u ki shongkurim ïa ki bakha jong ki, ki khun u Kish.

²³ U Mushi u don lai ngut ki khun shynrang: u Mahli, u Eder, bad u Jeremoth.

²⁴ Kine ki long ki khun ki ksiew jong u Lebi, kat kum ki kur bad ki longïing, bad ïa uwei pa uwei na ki la buh jingthoh da ka kyrteng. Uwei pa uwei na ki khun ki ksiew, uba arphew snem ka rta ne tam, u ïoh ka bynta ha ka kam ha ka Templ jong U Trai.

²⁵ U Dabid u ong, “U Trai U Blei ki Israel u la ai ka jingsuk ha la ki briew, bad u hi un shong junom ha Jerusalem.

²⁶ Kumta ki Lebi kim donkam shuh ban kit ïa ka Ïingjaiñ Ka Jingdon Ryngkat U Trai bad ïa ki tiar baroh ïa kiba la pyndonkam ha ka jingmane.”

²⁷ Kat kum ki jingbthah kiba khatduh jong u Dabid, ïa baroh ki Lebi la buh jingthoh ba kin shakri haba ki la dap arphew snem ka rta,

²⁸ bad la shaniah ha ki ïa kine ki kam: ban ïarap ïa ki lyngdoh kiba hiarpateng na u Aaron bad ïa ka jingmane ha ka Templ, ban sumar ïa ki phyllaw bad ïa ki kamra jong ka, bad ban sumar khuid ïa kata baroh kaba kyntang;

²⁹ ban kitkhlieh ha kaba peit ïa u kpu ba la ainguh sha U Blei, ïa u 'purew ba la ju pyndonkam ha ki jingainguh, ïa ki kpu stang kiba la shet khlem thiat, ïa ki jingainguh kiba shu syang, ïa u 'purew ba la khleh lang bad ka umphniang Olib, ban thew ban woh ïa ki jingainguh ha ka Templ.

³⁰ Bad ban ïaroh bad pyndonburom ïa U Trai man ka step bad man ka janmiet,

³¹ bad ha man ba thang ïa ki jingainguh ba la ai sha U Trai ha ka Sabbaton, ha ka Jingkhawai Niam Bnai Thymmai, bad ha kiwei kiwei ki Jingkhawai Niam. La thaw ïa ki jingpynbeit ryntih da kaba kdew ïa ka jingdon ki Lebi kiba la pynkhamti ban leh ïa kane ka kam man ka por.

³² La ai ha ki ka jingkitkhlieh ban sumar ïa ka Ïingjaiñ Ka Jingdon Ryngkat U Trai bad ïa ka Templ, bad ban ïarap ïa ki ba-ha-ïing jong ki, ki lyngdoh kiba hiarpateng na u Aaron, ha ka jingmane ha ka Templ.