1 KHRONIKL 22 - Khasi CL Bible (BSI)

¹ Kumta u Dabid u ong, “Kane ka dei ka jaka ha kaba ka Templ jong U Trai U Blei kan don. Hangne ka don ka duwan ha kaba ki paid Israel ki dei ban ai ki jingainguh thang.”

Ki jingpynkhreh ban tei ïa ka Templ

² U Dabid u ai hukum ïa baroh ki nongwei baroh kiba shong basah ha Ri Israel ban ïalumlang, bad u pyntrei ïa ki. Katto katne na ki, ki shna ïa ki mawkynroh ban tei ïa ka Templ.

³ U pynbiang shibun ka nar ban shna preg bad ki nar ban pyndait ïa ki khyrdop dieng, bad shibun ka rnong haduh ba ym don ba lah ban thew ïa ka.

⁴ U pynbeit ïa ki briew ka Tyros bad Sidon ban wanlam sha u shibun ki dieng Kedar tylli.

⁵ U Dabid u pyrkhat, “Ka Templ ba u Solomon u khun jong nga un tei ka dei ban long kaba ishongkun bad donnam ha ka pyrthei. Hynrei u dang samla bad um pat ju mlien, kumta nga dei ban pynkhreh lypa na ka bynta jong ka.” Kumta u Dabid u la pynbiang lypa shibun ki tiar shuwa ba un ïap.

⁶ U la phah ïa u Solomon u khun jong u bad hukum ïa u ban tei ïa ka Templ U Trai, U Blei ki Israel.

⁷ U Dabid u ong ha u, “Ko khun jong nga, nga kwah ban tei ïa ka Templ ban pyndonburom ïa U Trai U Blei jong nga.

⁸ Hynrei U Trai u ong ïa nga, ba nga la pynïap shibun eh ki briew bad ïaleh shibun ki thma. Bad kumta, namar ba nga la pynmih shibun ka snam, un ym shah ïa nga ban tei ïa ka Templ na ka bynta jong u.

⁹ La katta ruh, u la pynlong ka jingkular bad nga. U ong, ‘Phin sa don u khun jong u ban synshar ha ka jingsuk, namar ba ngan ai ha u ka jingsuk na ki nongshun jong u baroh. Ka kyrteng jong u kan long u Solomon, namar ha ka jingsynshar jong u ngan ai ha ki Israel ka jingsuk bad ka jingshongshngain.

¹⁰ Un tei ïa ka Templ na ka bynta jong nga. Un long u khun jong nga bad ngan long u kpa jong u. Ka longïing syiem jong u kan synshar ïa ka Israel junom.’ ”

¹¹ U Dabid u bteng, “Mynta, ko khun jong nga, ai ba U Trai U Blei jong me un long ryngkat bad me, bad ai ba un bat ïa ka kular jong u ban pynlah ïa me ban pyndep ha kaba tei ïa ka Templ na ka bynta jong u.

¹² Bad ai ba U Trai U Blei jong me un ai ha me ka jingtip bad ka jingstad ba kumta me lah ban synshar ïa ka Israel kat kum ki Hukum jong u.

¹³ Lada me kohnguh ïa baroh ki aiñ kiba U Trai u la ai ha u Moses na ka bynta ki Israel, me lah ban jop. Kut jingmut bad long skhem, bad wat shah ïa kano kano ban pyntieng ïa me.

¹⁴ Na ka bynta ka Templ, da ki jingpyrshang jong nga, nga la lum palat ïa lai hajar sawspah ton ka ksiar bad palat ïa laiphew saw hajar ton ka rupa ban pyndonkam ha kaba tei ïa ka. Nalor kata, la don bun bah ka rnong bad ka nar. Nga la pynkhreh ruh ïa ka dieng bad u maw, hynrei me dei ban pynïoh shuh shuh.

¹⁵ Me don bun ki nongtrei. Ki don ki rangbah ki ban trei ha ki par maw, bad ki don ki misteri maw bad misteri dieng, bad shibun ki nongtrei kti ha ki jait kam baroh ba ki lah ban trei ha ka ksiar, ka rupa, ka rnong bad ka nar.

¹⁶ Mynta sdang noh ïa ka kam, bad to U Trai un long ryngkat bad me.”

¹⁷ U Dabid u la hukum ïa baroh ki nongïalam Israel ban ïarap ïa u Solomon.

¹⁸ U ong, “U Trai U Blei jong phi u la don ryngkat bad phi bad u la ai ha phi ïa ka jingsuk ha baroh ki liang. U shah ba ngan jop ïa ki briew baroh kiba ju shong ha kane ka ri, bad mynta ki don hapoh jong phi bad ha U Trai.

¹⁹ Mynta, shakri ïa U Trai U Blei jong phi ïa ka dohnud bad ka mynsiem jong phi baroh. Sdang noh ban tei ïa ka Templ, khnang ba phi lah ban buh ha ka ïa ka Synduk ka Jutang U Trai bad ïa baroh kiwei pat ki tiar bakyntang ba ju pyndonkam ha kaba mane ïa u.”