1 KHRONIKL 21 - Khasi CL Bible (BSI)

U Dabid u pynlong ka jingkheiñbriew

¹ U Soitan u la kwah ban wallam jingjynjar ha ki paid Israel, kumta u la pynlong ïa u Dabid ban rai ban shim ka jingkheiñbriew.

² U Dabid u la ai ki hukum ïa u Joab bad ïa kiwei pat ki rangbah pynïaidkam, “Khie leit lyngba ka Israel, na kawei ka tduh jong ka ri sha kawei pat ka tduh, bad ñiew ïa ki briew. Nga kwah ban tip haduh katno ngut ki ïadon.”

³ U Joab u jubab, “To U Trai un pynroi bun ïa ki paid Israel shispah shah ban ïa kaba ki long mynta! Syiem Kynrad, ki baroh ki dei ki shakri jong phi. Balei phi kwah ban leh ïa kane bad pynkit pop ïa ka jaitbynriew baroh kawei?”

⁴ Hynrei u syiem u pynkohnguh ïa u Joab ban leh ïa ka hukum jong u. U Joab u mihnoh, u la leit lyngba ka ri Israel baroh kawei, bad nangta u wan phai pat sha Jerusalem.

⁵ U la ai jingkheiñ ha u Dabid ïa ka jingdon baroh lang jong ki rangbah kiba bit ïa ka kam shipai: Khatwei lakh ngut ha Israel, bad saw lakh hynñiewphew hajar ngut ha Judah.

⁶ Namar u Joab um pdiang ïa ka hukum jong u syiem, um shym la shim jingkheiñ ïa ki jait Lebi bad Benjamin.

⁷ La pynsngewsih ïa U Blei da kaei kaba la dep leh, kumta u la pynshitom ïa ki Israel.

⁸ U Dabid u ong ha U Blei, “Nga la leh ïa ka pop kaba shyrkhei eh ha kaba leh ïa kane! Sngewbha map ïa nga. Nga la leh bieit.”

⁹ Nangta U Trai u ong ha u Gad, u nongïathuhlypa jong u Dabid,

¹⁰ “Khie leit bad ïathuh ha u Dabid ba nga ai ha u lai tylli ki jingjied. Ngan leh ïa kano kano kaba u jied.”

¹¹ U Gad u la leit sha U Dabid, u ïathuh ha u ïa kaei kaba U Trai u la ong, bad u kylli, “Kano men jied?

¹² Lai snem ka jingkyrduh bam? Lane, lai bnai kaba phet krad na ki nongshun jong me? Lane lai sngi ha kaba U Trai u tur ïaleh ïa me da ka waitlam bad phah ka jingïapthem halor ka ri jong me, da kaba pyndonkam ïa u angel jong u ban wallam ka jingïap ha kylleng ka Israel? Kaei ka jubab ba ngan ai ha U Trai?”

¹³ U Dabid u jubab ïa u Gad, “Nga don ha ka khim khait! Hynrei ngam kwah ba yn pynshitom ïa nga da ki briew. Ai ba U Trai da lade hi un long uta u ban pynshitom ïa nga, namar u long uba dap da ka jingisynei.”

¹⁴ Kumta U Trai u la phah ïa ka jingïapthem ha ki paid Israel, bad hynñiewphew hajar ngut na ki, ki la ïap.

¹⁵ Nangta u phah ïa u angel ban pynjot thiaw ïa ka Jerusalem; hynrei u kylla ïa kaba u mut bad u ong ha u angel, “Keiñ noh! Katto ka la biang!” U angel u ïeng hajan ka jaka shoh kew jong u Araunah, u nong Jebus.

¹⁶ Haba u Dabid u ïohi ïa u angel uba ïeng ha shiteng suiñ, u da bat ïa la ka waitlam ha la ka kti, uba la pynkhreh ban pynjot thiaw ïa ka Jerusalem. Nangta u Dabid bad ki nongïalam jong ki paidbah — baroh na ki, kiba la phong ki jaiñ khain — ki dem pynrit, bad la ki khlieh kiba kynduh ha madan.

¹⁷ U Dabid u la duwai, “A Blei, nga long ma nga uta uba la leh bakla. Nga dei uta uba la hukum ban kheiñ briew. Kine ki paidbah bapli ki la leh aïu? A Trai, U Blei jong nga, pynshitom ïa nga bad ïa ka longïing jong nga, bad pyllait ïa la ki briew.”

¹⁸ U angel U Trai u ong ïa u Gad ban hukum ïa u Dabid ban leit bad tei ïa ka duwan ha U Trai ha ka jaka shoh kew jong u Araunah.

¹⁹ U Dabid u kohnguh ïa ka hukum jong U Trai bad u leit, kumba u Gad u la ong ïa u.

²⁰ Hangta ha ka jaka shoh kew u Araunah bad saw ngut ki khun shynrang jong u ki dang shoh kew, bad haba ki la ïohi ïa u angel, ki khun shynrang ki la mareh bad rieh.

²¹ U Araunah mar ïa-ïohi ba u Syiem Dabid u wan, u la iehnoh ïa ka jaka shoh kew bad u dem rit, bad la ka khlieh kaba kynduh ha madan.

²² U Dabid u ong ha u, “Die noh ha nga ïa ka jaka shoh kew jong me, ba kumta nga lah ban tei ka duwan ïa U Trai, ban pynsangeh ïa ka jingïapthem. Ngan siewdor pura ïa ka.”

²³ “Shim ïa ka, Syiem Kynrad,” u Araunah u ong, “bad leh ïa ka katba phi sngewbit. Hangne ki don ki masi dab ban thang kum ka jingainguh ha ka duwan, bad hangne ki don ki lyntang shoh kew ban pyndonkam kum ka diengthang, bad u kew ban ai kum ka jingainguh. Nga ai ïa ki baroh ha phi.”

²⁴ Hynrei u Syiem u jubab, “Em, ngan siew ha me ïa ka dor ba-pura. Ngan ym ai kum ka jingainguh ha U Trai ïa kaei kaba dei ka jong me, da kaei kaba shu ïoh ei.”

²⁵ Bad u la siew ïa u Araunah hynriewspah ki sbai ksiar na ka bynta ka jaka shoh kew.

²⁶ U la tei hangta ïa ka duwan ha U Trai bad u la ai ki jingainguh thang bad ki jingainguh ïasyllok. U la duwai, bad U Trai u la jubab ïa u da kaba phah ïa ka ding na bneng ban thang ïa ki jingainguh halor ka duwan.

²⁷ U Trai u ong ïa u angel ban buh noh sharud ïa ka waitlam jong u, bad u angel u kohnguh.

²⁸ U Dabid u ïohi ba da kane U Trai u la jubab ïa ka jingduwai jong u, kumta u la ai ki jingkñia halor ka duwan ha ka jaka shoh kew jong u Araunah.

²⁹ Ka Ïingjaiñ Ka Jingdon Ryngkat jong U Trai kaba u Moses u la thaw ha ka ri khlaw, bad ka duwan ha kaba la thang ïa ki jingkñia ka dang don ha ka jaka mane ha Gibeon ha kane ka por;

³⁰ hynrei u Dabid um shym lah ban leit shata ban mane ïa U Blei, namar u la sheptieng ïa ka waitlam jong u angel jong U Trai.