1 KHRONIKL 20 - Khasi CL Bible (BSI)

U Dabid u jop ïa ka Rabbah

¹ Ha ka pyrem kaba bud, ha ka por jong ka snem kaba ki syiem ki ju leit ïaleh thma, u Joab u ïalam ïa ka kynhun shipai bad hiarthma ïa ka ri jong ki Ammon; u syiem Dabid, pat u sah ha Jerusalem. Ki kerkut ïa ka nongbah Rabbah, ki tur ïaleh, bad pynjot ïa ka.

² U Molekh, u bleithaw jong ki Ammon u don ka pansngiat ksiar kaba khia kumba laiphew saw kilo. Ha ka don u mawlynnai, ïa uba u Dabid u shim bad buh ha la ka jong ka pansngiat. U rah ruh shibun ka jinglute na ka nongbah.

³ U rah ïa ki briew jong ka nongbah bad pyntrei ïa ki ha ki jaka ot dieng, jaka shna mohkhiew bad sdie. U leh kumjuh ïa ki briew jong kiwei ki shnong ka ri Ammon. Nangta ma u bad ki rangbah jong u ki wan phai sha Jerusalem.

Ki thma pyrshah ïa ki ramhah ka Philistia

⁴ Hadien kata, ka thma ka khie biang bad ki Philistia ha Geser. Kane ka jia haba u Sibbekai na Hushah u pynïap ïa u ramhah uba kyrteng u Sippai, bad ïa ki Philistia la jop.

⁵ Ka don sa kawei ka thma bad ki Philistia, bad u Jair u khun jong u Elhanan u pynïap ïa u Lahmi, uba shi para bad u Goliath na Gath, uba u sum jong u, u don u dieng thung sum uba ka jingrben jong u ka long kat u khung jong u nongthain jaiñ.

⁶ Kawei pat ka thma ka jia ha Gath, ha kaba don u ramhah uba don hynriew tylli ki shympriah kti ha kawei kawei ka kti bad hynriew tylli ki shympriah kjat ha kawei kawei ka kjat. U long uba hiarpateng na ki ramhah mynhyndai.

⁷ U ïeng pyrshah ïa ki Israel, bad u Jonathan, u khun jong u Shammah uba shi para bad u Dabid, u pynïap ïa u.

⁸ Kine ki lai ngut kiba la shah pynïap ha u Dabid bad ki rangbah jong u, ki long kiba hiarpateng na ki ramhah ha Gath.