1 KHRONIKL 19 - Khasi CL Bible (BSI)

U Dabid u jop ïa ki Ammon bad ki Syria

¹ Hadien katto katne por u Nahash u syiem ka Ammon u la ïap, bad u Hanun u khun jong u, u long syiem.

² U syiem Dabid u ong, “nga dei ban pyn-i ïa ka jinglong paralok bashisha ïa u Hanun, kumba u kpa jong u, u Nahash u la leh ïa nga.” Kumta u Dabid u phah ki nonglamktien ban pynpaw ïa ka jingsngewlem jong u. Haba ki la poi ha Ammon bad ïakynduh ïa u syiem Hanun,

³ ki nongïalam jong ki Ammon ki ong ïa u syiem, “Hato phi pyrkhat ka long na ka bynta ka burom i pa jong phi ba u Dabid u phah ïa kine ki rangbah ban pynpaw ïa ka jingsngewlem ha phi? Kam long kumta! U phah ïa ki hangne kum ki nongsyntiat ban khmih ïa ka ri khnang ba un jop ïa ka!”

⁴ U Hanun u kem ïa ki nonglamktien jong u Dabid bad u khi ïa ki 'ñiuhtmoh jong ki, bad ot ïa ki jaiñphong jong ki ha ki syngkai, bad phah noh ïa ki.

⁵ Ki la sngewlehrain shikatdei ban leit phai sha ïing. Haba u Dabid u ïohsngew ïa kaei kaba jia, u phah ktien sha ki ba kin sah ha Jerikho bad ban ym wan phai tad haduh ba ki 'ñiuhtmoh jong ki, ki da san biang.

⁶ U syiem Hanun bad ki Ammon ki sngewthuh ba ki la pynlong ïa u Dabid u nongshun jong ki, kumta ki siew laiphew saw hajar kilo ka rupa ban wai ki kali ïapom bad ki nongñiah kali ïapom na ka Mesopotamia bashaneng bad na ki jylla Syria jong ka Maakah bad Sobah.

⁷ Ki laiphew ar hajar tylli ki kali ïapom kiba ki wai bad ka kynhun shipai u syiem Maakah ki wan sher dara hajan ka Medeba. Ki Ammon ruh ki wan na baroh ki nongbah jong ki bad ki long kiba la kloi ban ïaleh.

⁸ Haba u Dabid u ïohsngew ïa kaei kaba jia, u phah ïa u Joab ryngkat bad ka kynhun shipai baroh kawei.

⁹ Ki Ammon ki ïaid bad ki pynskhem ïa ki jaka jong ki ha ka khyrdop sha Rabbah, ka nongbah jong ka ri jong ki, bad ki syiem kiba la wan ban ïarap, ki apthap ha ki rudnong.

¹⁰ U Joab u ïohi ba ki shipai nongshun kin tur ïaleh ïa u na sha khmat bad na shadien, kumta u jied ki shipai Israel bakynsai tam bad pynap da kaba pynphai khmat ïa ki shaphang ki Syria.

¹¹ U buh ïa kiba sah na ki shipai jong u hapoh ka jingai hukum uba shi para bad u Abishai, uba pynap ïa ki shipai da kaba phai khmat sha ki Ammon.

¹² U Joab u ong ïa u, “Lada phi ïohi ba ki Syria ki jop ïa nga, wan bad ïarap ïa nga, bad lada ki Ammon ki jop ïa phi, ngan leit ban ïarap ïa phi.

¹³ To long khlaiñ bad long shlur! To ngin ïaleh tyngeh na ka bynta ki briew jong ngi bad na ka bynta ki nongbah jong U Blei jong ngi. Bad to ai ba yn pyndep ïa ka mon U Trai.”

¹⁴ U Joab bad ki rangbah jong u ki tur shaphrang ban ïaleh bad ki Syria ki phet ïap.

¹⁵ Haba ki Ammon ki ïohi ba ki Syria ki phet ïap, ki phet ïap na u Abishai bad ki kynran sha ka nongbah. Nangta u Joab u leit phai noh sha Jerusalem.

¹⁶ Ki Syria ki sngewthuh ba ki la shahjop ha ki Israel, kumta ki la wallam shipai na ki jylla Syria kiba naphang mihngi jong ka wah Ïuphratis bad buh ïa ki hapoh ka jingai hukum u Shobakh, u rangbah ai hukum jong ka kynhun shipai u syiem Hadadeser jong ka Sobah.

¹⁷ Haba u Dabid u ïohsngew ïa kata, u lumlang ïa ki shipai Israel, u jam sha shiliang ka Jordan bad u buh ïa ki ha ka jaka ba phai khmat ïa ki Syria.

¹⁸ Ka jingïaleh ka sdang, bad ki Israel ki pynher krad ïa ka kynhun shipai Syria sha la ka jaka. U Dabid bad ki rangbah jong u ki pynïap hynñiew hajar ngut ki nongñiah kali ïapom jong ki Syria bad sawphew hajar ngut ki shipai ïaid kjat. Ki pynïap ruh ïa u Shobakh, u rangbah ai hukum ki Syria.

¹⁹ Haba ki syiem kiba hap hapoh u Hadadeser ki sngewthuh ba ki la shahjop ha ki Israel, ki pynlong ka jingïasuk bad u Dabid bad ki kylla long ki raïot jong u. Ki Syria kim ju mon shuh ban ïarap ïa ki Ammon.