1 KHRONIKL 18 - Khasi CL Bible (BSI)

Ki jingjop thma u Dabid

¹ Hadien katto katne por, u syiem Dabid u tur ïaleh biang ïa ki Philistia bad u jop ïa ki. U shim noh na ka jingpynïaid jong ki ïa ka nongbah Gath bad ki nongrit ba don sawdong jong ka.

² U jop ruh ïa ki Moab kiba kylla long ki raïot jong u bad siew khajna sha u.

³ Nangta u Dabid u tur ïaleh ïa u syiem Hadadeser jong ka jylla Sobah jong ka Syria, kaba hajan ka ri Hamath, namar u Hadadeser u la pyrshang ban jop ïa ka ri kaba shaphang shaneng ka Ïuphratis.

⁴ U Dabid u ïohknieh shihajar tylli ki kali ïapom jong u, hynñiew hajar ngut ki nongshong kulai, bad arphew hajar ngut ki shipai ïaid kjat. U buh ki kulai kat ban biang na ka bynta shispah tylli ki kali ïapom bad u pyndkoh noh ïa kiwei pat.

⁵ Haba ki Syria jong ka Damaskos ki phah ïa ka kynhun shipai ban ïarap ïa u syiem Hadadeser, u Dabid u tur ïaleh ïa ka bad u pynïap arphew hajar ngut ki rangbah.

⁶ Nangta u pynïeng ki ïingjaiñ shipai ha ka ri jong ki, bad ki kylla long ki raïot jong u bad ki siew khajna sha u. U Trai u ai jingjop ïa u Dabid ha kylleng.

⁷ U Dabid u kurup ïa ki ryntieh ksiar ba la rah da ki rangbah synshar jong u Hadadeser bad u rah ïa ki sha Jerusalem.

⁸ U kurup ruh bun bah ka rnong na Tibhath bad Kun, ki nongbah ba synshar u Hadadeser. (U Solomon hadien u pyndonkam ïa kane ka rnong ha kaba thaw ïa ka pung-um, ki rishot, bad ki khiew rong na ka bynta ka Templ.)

⁹ U Toi u syiem ka Hamath u ïohsngew ba u Dabid u la jop ïa ka kynhun shipai baroh kawei jong u Hadadeser.

¹⁰ Kumta u phah ïa u Joram u khun jong u ban leit khublei bad ai burom ïa u na ka bynta ka jingjop jong u ïa u Hadadeser, ïa uba u Toi u la ïaleh thma bunsien. U Joram u wallam ki jingai sngewbha ba la thaw da ka ksiar, ka rupa bad ka rnong.

¹¹ U syiem Dabid u pynkyntang ïa ki na ka bynta ka jingmane, ryngkat bad ïa ka rupa bad ka ksiar ba u la kurup na ki jaitbynriew kiba u la jop — ki Edom, ki Moab, ki Ammon, ki Philistia bad ki Amalek.

¹² U Abishai, u khun jong ka Seruïah, u jop ïa ki Edom ha ka Them Mluh bad pynïap khatphra hajar ngut na ki.

¹³ U pynïeng ki ïingjaiñ shipai ha baroh ka ri Edom, bad ki briew hangta ki kylla long ki raïot jong u Syiem Dabid. U Trai u ai jingjop ïa u Dabid ha kylleng.

¹⁴ U Dabid u synshar ha baroh ka Israel bad u pynthikna ba ïa ki briew jong u yn lehbha bad lehhok borabor.

¹⁵ U Joab, uba shi para bad u Abishai u long u nongïalam jong ka kynhun shipai; u Jehoshaphat u khun jong u Ahilud u khmih halor ki jingbuh jingthoh;

¹⁶ u Sadok u khun jong u Ahitub bad u Ahimelekh u khun jong u Abiathar ki long ki lyngdoh; u Seraïah u long u sekretari ka ïingbishar;

¹⁷ u Benaïah u khun jong u Jehoïada u khmih halor ka kynhun ap phira jong u Dabid; ki khun shynrang jong u Dabid ki bat ïa ki kyrdan ba-halor ha ka jingshakri ïa u.