1 KHRONIKL 17 - Khasi CL Bible (BSI)

Ka khubor u Nathan ha u Dabid

¹ U syiem Dabid mynta u shong ha ka ïingsyiem jong u. Ha kawei ka sngi u phah khot ïa u Nathan u nongïathuhlypa bad ong ha u, “Hangne nga shong ha ka ïing ba la thaw da ki dieng Kedar, hynrei ïa ka Synduk ka Jutang U Trai la buh ha ka ïingjaiñ!”

² U Nathan u jubab, “Leh kat kaba don ha ka jingmut jong phi, namar U Blei u long ryngkat bad phi.”

³ Hynrei ha kata ka miet U Blei u ong ha u Nathan,

⁴ “Leit bad ïathuh ha u shakri jong nga u Dabid ba nga ong ha u, ‘Mem dei uta u ban tei ïa ka templ na ka bynta jong nga ba ngan shong.

⁵ Naduh ka por ba nga la pyllait ïa ki paid Israel na Ijipt haduh mynta, ngam shym la shong ha ka templ; nga la shong borabor ha ki ïingjaiñ bad kynriah na kawei ka jaka sha kawei pat.

⁶ Ha ki jingïaid lynti jong nga bad ki paid Israel, ngam ju kylli ïano ïano na ki nongïalam kiba nga la thung balei kim shym la thaw ïa nga ka templ ba la shna da ki dieng Kedar.’

⁷ “Kumta ong ha u shakri jong nga u Dabid ba nga, U Trai Badonbor Baroh, nga ong ha u, ‘nga la shim ïa me na kaba sumar ïa ki langbrot ha ki jaka phlang bad pynlong ïa me u nongsynshar jong ki briew jong nga ki Israel.

⁸ Nga la long ryngkat bad me shano shano ba me leit, bad nga la jop ïa baroh ki nongshun jong me katba me ïaid shaphrang. Ngan pynlong ïa me uba pawnam kum ki nongïalam bakhraw tam ka pyrthei.

^9-10 Nga la jied ka jaka na ka bynta ki briew jong nga ki Israel bad nga la pynshong pynsah ïa ki hangta, ha kaba kin shongduh shah banbeiñ shuh. Naduh ba ki la rung ha kane ka ri, ki la shah tur ïaleh pyrshah ha ki briew kiba runar, hynrei kane kan ym jia shuh. Nga kular ban jop ïa baroh ki nongshun jong me bad ban ai ha me ki nonghiarpateng.

¹¹ Ynda me ïap bad tep ïa me bad ki kpa tymmen jong me, ngan pynlong syiem ïa uwei na ki khun jong me bad ngan pynlong ïa ka hima jong u kaba khlaiñ.

¹² Un dei ma u, u ban tei ka templ ïa nga, bad ngan pynthikna ba ka longïing syiem jong u kan ïai bteng junom.

¹³ Ngan long u kpa jong u bad un long u khun jong nga, ngan ym weng noh ïa ka jingkyrshan jong nga na u kumba nga la leh ïa u Saul, ïa uba nga la weng khnang ba me lah ban long syiem.

¹⁴ Ngan buh ïa u ban long halor ki briew jong nga bad ka hima jong nga junom. Ka longïing syiem jong u kan ym kut noh.’ ”

¹⁵ U Nathan u la ïathuh ha u Dabid ïa baroh kat kaba U Blei u la pynpaw ha u.

Ka jingduwai sngewnguh jong u Dabid

¹⁶ Hadien kata, u Dabid u rung shapoh ka Ïingjaiñ Ka Jingdon Ryngkat U Trai, u shong bad u duwai, “Ngam long uba dei hok ïa kaei kaba me la lah leh na ka bynta jong nga, ko Trai U Blei, lane ka longïing jong nga.

¹⁷ Pynban mynta me ïai leh shuh shuh; me la pynlong ki kular na ka bynta ki khun ki ksiew jong nga ha ki snem ki ban wan, bad me, ko Trai U Blei, me la lah pynlong ïa nga kum u briew uba khraw.

¹⁸ Aïu ngan ong shuh ha me! Me tip bha ïa nga, bad pynban me pyndonburom ïa nga, u shakri jong me.

¹⁹ Ka long ka mon bad ka jingthmu jong me ban leh ïa kane ha nga bad ban pyn-i ha nga ïa ka jingkhraw jong nga ha ki por ki ban sa wan.

²⁰ Ko Trai, ym don uwei pat kum ma me; ngi tip borabor ba me long tang ma me marwei U Blei.

²¹ Ym don kawei pat ka jaitbynriew ha ka pyrthei kum ki Israel, ïa kaba me la pyllait im na ka jinglongmraw ban pynlong ïa ki ka jaitbynriew jong me. Kiei kiei ki bakhraw bad baphylla kiba me la leh na ka bynta jong ki, ki pynphriang ïa ka nam jong me kylleng sawdong ka pyrthei. Me la pyllait im ïa ki briew jong me na Ijipt bad pynher krad ïa kiwei ki jaitbynriew katba ki briew jong me ki nang tur shaphrang.

²² Me la pynlong ïa ki Israel ki briew jong me junom, bad me, ko Trai, me la long U Blei jong ki.

²³ “Bad mynta, ko Trai, to pyndep na ka bynta ka por baroh ïa ka kular jong me ïa nga bad ki khun ki ksiew jong nga, bad to leh ïa kaei kaba me thmu ban leh.

²⁴ Ka nam jong me kan khraw, bad ki briew kin ong junom, ‘U Trai Bakhrawbor baroh u long U Blei ha Israel.’ Bad men pynneh ïa ka longïing syiem jong nga ha ki por baroh.

²⁵ Nga don ka jingshlur ban duwai ïa kane ka jingduwai ha me, U Blei jong nga, namar me la pynpaw ïa kane ha nga, u shakri jong me, bad ba me la ong ïa nga ba men pynlong syiem ïa kiba hiarpateng na nga.

²⁶ Ma me, A Trai, me long U Blei, bad me pynlong ïa kane ka jingkular baphylla ha nga.

²⁷ Nga kyrpad ïa me ban kyrkhu ïa ki khun ki ksiew jong nga khnang ba kin ïai lehkmen ha ka jinglehbha jong me. Ma me, A Trai, me la kyrkhu ïa ki, bad ka jingkyrkhu jong me kan neh bad ki junom.”