1 KHRONIKL 16 - Khasi CL Bible (BSI)

¹ Ki la rah ïa ka Synduk ka Jutang sha ka ïingjaiñ kaba u Dabid u la lah pynkhreh bad buh ïa ka hapoh. Nangta ki ai ïa ki jingkñia bad ki jingainguh ïasyllok sha U Blei.

² Hadien ba u Dabid u la pyndep ban ai ïa ki jingkñia, u kyrkhu ïa ki paidbah ha ka kyrteng U Trai bad sam jingbam ïa ki baroh.

³ U ai ha uwei pa uwei u shynrang bad ha kawei pa kawei ka kynthei ha Israel ïa u kpu bad ka dohthang bad katto katne ki soh Khajur.

⁴ U Dabid u thung katto katne ki Lebi ban ïalam ïa ka jingmane ïa U Trai, U Blei ki Israel, ha khmat ka Synduk ka Jutang, da ki jingrwai bad ki jingïaroh ïa u.

⁵ Ïa u Asaph la thung nongïalam bad ïa u Sekharaïah kum u nongïarap. La thung ïa u Jeiel, u Shemiramoth, u Jehiel, u Mattithaïah, u Eliab, u Benaïah, u Obed Edom bad u Jeiel ban tem ki duitara. U Asaph un pynsawa ki shakuriaw,

⁶ bad ar ngut ki lyngdoh, u Benaïah bad u Jahasiel kin put ïa ki turoi borabor ha khmat ka Synduk ka Jutang.

⁷ Ka long naduh kata ka por ba u Dabid u la ai nyngkong eh ha u Asaph bad ki para Lebi jong u ïa ka jingkitkhlieh na ka bynta ki jingrwai ïaroh ïa U Trai.

Ka jingrwai ïaroh

⁸ Ai ki jingnguh sha U Trai, pynbna ïa ka jingkhraw jong u; Ïathuh ha ki jaitbynriew ïa kaei kaba u la leh.

⁹ Rwai ka jingïaroh ïa U Trai; ïathuh ïa ki jingphylla kiba u la leh.

¹⁰ To kmen ba ngi long ki jong u; ai ba baroh kiba mane ïa u kin lehkmen!

¹¹ Leit sha U Trai na ka bynta ka jingïarap, bad mane khlem kut.

^12-13 Ma phi kiba hiarpateng na u Jakob, u shakri jong U Blei, kiba hiarpateng na u Israel, ïa uba U Blei u la jied, kynmaw ïa ki kambah kiba U Blei u la leh bad ki jingbishar kiba u la ai.

¹⁴ U Trai u long U Blei jong ngi; ki hukum jong u ki long na ka bynta ka pyrthei baroh.

¹⁵ Wat klet ïa ka jutang U Blei, kaba u la pynlong ban neh junom,

¹⁶ ka jutang kaba u la pynlong bad u Abraham, ka jingkular kaba u la pynlong bad u Isaak.

¹⁷ U Trai u la pynlong ka jutang bad u Jakob, ka jutang ka ban neh junom.

¹⁸ “Ngan ai ha phi ïa ka ri Kanaan,” u ong. “Kan long ka jingïohkynti jong phi hi.”

¹⁹ Ki briew jong U Blei ki long khyndiat, ki long ki nongwei ha ka ri Kanaan.

²⁰ Ki ïaidwir na kawei ka ri sha kawei pat, na kawei ka hima sha kawei pat.

²¹ Hynrei U Blei um shym la shah ïano ïano ban banbeiñ ïa ki; ban ïada ïa ki, u la maham ïa ki syiem;

²² “Wat pynmynsaw ïa ki shakri ba la jied jong nga; wat ktah ïa ki nongïathuhlypa jong nga.”

²³ Rwai ha U Trai, baroh ka pyrthei! Pynbna man ka sngi ïa ka khubor babha ba u la pynim ïa ngi.

²⁴ Pynbna ïa ka burom jong u ha ki jaitbynriew, ïa ki kam bakhrawbor ha ki briew.

²⁵ U Trai u long uba khraw bad uba eh dei ban ïaroh; ïa u dei ban ai ka burom palat ban ïa kiwei ki blei baroh.

²⁶ Ki blei jong kiwei ki jaitbynriew baroh ki long tang ki bleithaw, hynrei U Trai u thaw ïa ki bneng.

²⁷ Ka burom bad ka jinglong syiem ki ker sawdong ïa u, ka bor bad ka jingkmen ki dap ïa ka Templ jong u.

²⁸ Ïaroh ïa U Trai, baroh ki jaitbynriew ka pyrthei, ïaroh ïa ka burom bad ka bor jong u.

²⁹ Ïaroh ïa ka kyrteng badonburom U Trai; wallam ka jingainguh bad wan sha ka Templ jong u. To dem ha khmat Uba Khuid haba u wanpaw;

³⁰ to kyiuh ha khmat jong u, ko ka pyrthei baroh! Ïa ka pyrthei la pynskhem ha la ka jaka bad ym lah pynkhih shuh.

³¹ To kmen, ko pyrthei bad sahit bneng! Ïathuh ïa ki jaitbynriew ba U Trai u long u syiem.

³² Kyrhuh, ko duriaw, bad baroh ki jingthaw ha phi; to kmen, ko ki madan, bad baroh kiba don ha phi!

³³ Ki dieng ha ki khlaw kin pyrta da ka jingkmen haba U Trai un wan ban synshar ïa ka pyrthei.

³⁴ Ai ka jingnguh sha U Trai, namar u long uba bha; ka jingieit jong u ka long bymjukut.

³⁵ To ong ha u, “Pynim ïa ngi, A Blei U Nongpynim jong ngi; lumlang ïa ngi baroh; pyllait ïa ngi na ki jaitbynriew, khnang ba ngin sngewnguh bad ïaroh ïa ka kyrteng bakhuid jong me.”

³⁶ Ïaroh ïa U Trai, U Blei ki Israel! Ïaroh ïa u mynta bad junom! Nangta baroh u paidbah u ong, “Amen,” bad ïaroh ïa U Trai.

Ka jingmane ha Jerusalem bad Gibeon

³⁷ U syiem Dabid u buh pynskhem ïa u Asaph bad ïa ki para Lebi ha ka kam kaba ïadei bad ka jingmane ba pynlong ha ka jaka ba la buh ïa ka Synduk ka Jutang. La buh ïa ki ban pyndep ïa ki kamram jong ki hangta man ka sngi.

³⁸ U Obed Edom u khun jong u Jeduthun bad ki hynriewphew phra ngut ki rangbah jong ka kur jong u kin ïarap ïa ki. Ïa u Hosah bad u Obed Edom la buh ban ap phira ïa ki khyrdop.

³⁹ U Sadok u lyngdoh bad ki para lyngdoh jong u pat, ki peit ïa ka jingmane ïa U Trai ha ka jaka mane kaba ha Gibeon.

⁴⁰ Man ka step bad man ka janmiet kin thang tylli ïa ki jingkñia ha ka duwan kat kum ba la thoh ha ka Hukum kumba U Trai u la ai ïa ki Israel.

⁴¹ Hangta bad ki la don u Heman bad u Jeduthun bad kiwei ïa kiba la jied kyrpang ban rwai ki jingrwai ïaroh ha U Trai na ka bynta ka jingieit bymjukut jong u.

⁴² Ïa u Heman bad u Jeduthun ruh la buh ban peit ïa ki turoi bad ki shakuriaw bad kiwei ki jingtem ba pyndonkam ha ka por ba rwai ïa ki jingrwai ïaroh. Ïa ki dkhot jong ka kur u Jeduthun, la buh ban ap phira ïa ki khyrdop.

⁴³ Hadien kata baroh ki leit noh sha la ïing, bad u Dabid u la leit sha la ïing ban pynlut katto katne por bad ka longïing jong u.