1 KHRONIKL 15 - Khasi CL Bible (BSI)

Ka jingpynkhreh ban pynkynriah ïa ka Synduk ka Jutang

¹ Na ka bynta ban pyndonkam ïa lade, u Dabid u tei ïa ki ïing ha ka nongbah u Dabid. U la pynkhreh ruh ïa ka jaka na ka bynta ka Synduk ka Jutang jong U Blei bad u pynïeng ka ïingjaiñ ïa ka.

² Nangta u ong, “Tang ki Lebi ki lah ban bah ïa ka Synduk ka Jutang, namar dei tang ma ki ïa kiba U Blei u la jied ban bah ïa ka bad ban shakri ïa u junom.”

³ Kumta u Dabid u phah khot ïa baroh ki paid Israel sha Jerusalem khnang ban wanrah ïa ka Synduk ka Jutang sha ka jaka kaba u la pynkhreh ïa ka.

⁴ Nangta pat u phah khot lang ïa ki khun ki ksiew u Aaron bad ïa ki Lebi.

⁵ Na ka kur Lebi jong u Kohath la wan u Uriel, uba dei peit halor ki shispah arphew ngut ki dkhot jong ka kur jong u;

⁶ Na ka kur u Merari la wan u Asaïah, uba dei peit ïa ki arspah arphew ngut;

⁷ na ka kur u Gershon, u Joel, uba dei peit ïa ki shispah laiphew ngut;

⁸ na ka kur Elisaphan, u Shemaïah, uba dei peit ïa ki arspah ngut;

⁹ na ka kur u Hebron, u Eliel, uba dei peit ïa ki phraphew ngut;

¹⁰ bad na ka kur u Ussiel, u Amminadab, uba dei peit ïa ki shispah khat-ar ngut.

¹¹ U Dabid u khot shapoh ïa ki lyngdoh, u Sadok bad u Abiathar bad ïa ki hynriew ngut ki Lebi, u Uriel, u Asaïah, u Joel, u Shemaïah, u Eliel, bad u Amminadab.

¹² U ong ha ki Lebi, “Phi long ki nongïalam ïa ki kur Lebi. Pynkhuid ïa lade bad ïa ki para Lebi jong phi, ba phin lah ban wanrah ïa ka Synduk ka Jutang jong U Trai U Blei ki Israel sha ka jaka kaba nga la pynkhreh na ka bynta jong ka.

¹³ Namar phim shym don hangta mynba la bah ïa ka ha ka sien kaba nyngkong, U Trai U Blei jong ngi u la pynshitom ïa ngi ba ngim shym mane ïa u kumba ka la dei ïa ngi ban leh.”

¹⁴ Kumta ki lyngdoh bad ki Lebi ki la pynkhuid ïa lade khnang ban ïoh pynkynriah ïa ka Synduk ka Jutang jong U Trai U Blei ki Israel.

¹⁵ Ki Lebi ki rah ïa ka ha ki dieng tylli halor ki tyrpeng jong ki, kumba U Trai u la hukum lyngba u Moses.

¹⁶ U Dabid u hukum ïa ki nongïalam jong ki Lebi ban pynkhamti ha ki kynhun Lebi bapher bapher ban rwai bad ban tem ki jingtem jong ka jingkmen ha ki duitara bad ki shakuriaw.

^17-21 Na ki kur nongrwai ki jied ïa kine ki rangbah ban tem ïa ki shakuriaw rnong: u Heman u khun jong u Joel, u ba-ha-ïing jong u Asaph u khun jong u Berekhaïah, bad u Ethan u khun jong u Kushaïah, na ka kur Merari. Ban ïarap lem ïa ki, ki jied ïa kine ki Lebi ban tem ïa ki duitara kiba syiang sur: u Sekharaïah, u Jaasiel, u Shemiramoth, u Jehiel, u Unni, u Eliab, u Maaseïah, bad u Benaïah. Ban tem ïa ki duitara kiba jem sur ki jied ïa kine ki Lebi: u Mattithaïah, u Eliphelehu, u Mikneïah, u Asasaïah, bad ki nongap phira ka Templ, u Obed Edom bad u Jeiel.

²² Na ka bynta ka jingtbit ha ki sur jingtem, ïa u Khenanaïah la jied ba un peit halor ki Lebi kiba long ki nongtem nongput.

^23-24 U Berekhaïah bad u Elkanah, lem bad u Obed Edom bad u Jehaïah, ki la long ki nongap ba la jied ban ap phira ïa ka Synduk ka Jutang. Ki lyngdoh — u Shebanaïah, u Joshaphat, u Nethanel, u Amasai, u Sekharaïah, u Benaïah, bad u Elieser la jied ban put ïa ki turoi ha shuwa ka Synduk ka Jutang.

Ka jingpynkynriah ïa ka Synduk ka Jutang sha Jerusalem

²⁵ Kumta u Syiem Dabid, ki nongïalam ki Israel, bad ki rangbah shipai ki leit sha ka ïing u Obed Edom ban shim ïa ka Synduk ka Jutang, bad da ka jinglehkmen kaba khraw.

²⁶ Ki la kñia hynñiew tylli ki masi lyngraw bad hynñiew tylli ki langbrot, ban pynthikna ba U Blei un ïarap ïa ki Lebi kiba rah ïa ka Synduk ka Jutang.

²⁷ U Dabid u kup da ka jaiñ linen bani, bad kumjuh ruh ki nongtem nongput, u Khenanaïah u nongïalam jong ki, bad ki Lebi kiba rah ïa ka Synduk. U Dabid u phong ruh ïa ka ephod ba la suh da ka linen.

²⁸ Te baroh ki Israel ki synran ïa ka Synduk ka Jutang haduh Jerusalem ryngkat bad ki jingrisa jong ka jingkmen, ki sur jong ki turoi, ki ronsing, bad ki shakuriaw, bad ki jingtem ha ki duitara.

²⁹ Katba dang wanrah ïa ka Synduk sha ka nongbah, ka Mikhal, ka khun u Saul, ka khmih na ka jingkhangïit bad ka la ïohi ïa u Syiem Dabid ba u shad bad kynthih da ka jingkmen, bad ka la i ngiah ïa u.