1 KHRONIKL 14 - Khasi CL Bible (BSI)

Ki kam jong u Dabid ha Jerusalem

¹ U Hiram u syiem ka Tyros u phah ïa ka kynhun shalan mar sha u Dabid; u pynbiang ïa u ki dieng Kedar tylli bad ki misteri maw bad ki misteri dieng ban tei ïa ka ïingsyiem.

² Bad kumta u Dabid u sngewthuh shai ba U Trai u la pynskhem ïa u kum u syiem ka Israel bad ba u pynlong ïa ka hima jong u ban manbha na ka bynta ki briew jong u.

³ Hangta ha Jerusalem, u Dabid u shongkurim shibun ki tnga bad u don bun ki khun shynrang bad kynthei.

^4-7 Kine harum ki long ki khun ba la kha ïa u ha Jerusalem: u Shammua, u Shobab, u Nathan, u Solomon, U Ibhar, u Elishua, u Elpelet, u Nogah, u Nepheg, u Japhia, u Elishama, u Beeliada, bad u Eliphelet.

Ka jingjop ïa ki Philistia

⁸ Haba ki Philistia ki ïohsngew ba la pynlong ïa u Dabid u syiem halor ka ri Israel baroh kawei, ka kynhun shipai jong ki ka leit wad ban kem ïa u. Te u Dabid u tur shaphrang ban ïakynduh ïa ki.

⁹ Ki Philistia ki poi ha ka Them Rephaim bad sdang ban lute.

¹⁰ U Dabid u kylli na U Blei, “Hato ngan tur ïaleh ïa ki Philistia? Hato men ai ha nga ïa ka jingjop?” U Trai u jubab, “Ho-oid, tur ïaleh! Ngan ai ïa me ka jingjop!”

¹¹ Kumta u Dabid u tur ïaleh ïa ki ha Baal Perasim bad u jop ïa ki. U ong, “U Blei u la pyndonkam ïa nga ban thom ïa ki shipai jong ki nongshun kum ka jingshlei um.” Kumta ïa kata ka jaka la khot ka Baal Perasim.

¹² Mynba ki Philistia ki la phet ïap, ki la ieh ïa ki bleithaw jong ki shadien, bad u Dabid u ai hukum ban thang ïa kita.

¹³ Shen ki Philistia ki wan phai sha ka ri them bad ki sdang ban lute biang ïa ka.

¹⁴ Sa shisien u Dabid u kylli na U Blei, uba jubab, “Wat tur ïaleh ïa ki nangne, hynrei leit sawdong bad pynkhreh ban tur ïaleh ïa ki na kawei pat ka liang, najan ki dieng Balsam.

¹⁵ Haba me ïohsngew ïa ka jingsawa ka jingïaid ha kliar ki dieng Balsam, te tur ban ïaleh, namar ngan ïaid shaphrang sha khmat jong me ban pynliem ïa ka kynhun shipai ki Philistia.”

¹⁶ U Dabid u la leh ïa kaei kaba U Blei u la hukum, bad kumta u beh ban pynher krad ïa ki Philistia na Gibeon lynter lynti sha Geser.

¹⁷ Ka nam u Dabid ka saphriang kylleng, bad U Trai u pynlong ïa ki hima baroh ban sheptieng ïa u.