1 KHRONIKL 13 - Khasi CL Bible (BSI)

La pynkynriah ïa ka Synduk ka Jutang na Kiriath Jearim

¹ U Syiem Dabid u ïamir jingmut bad ki rangbah pynïaidkam baroh jong ki kynhun kiba shihajar ngut bad ki kynhun kiba shispah ngut.

² Nangta u pynbna sha baroh ki paid Israel, “Lada phi ai ïa ka jingmynjur jong phi bad lada ka dei ka mon U Trai U Blei jong ngi, to ai ba ngin ïaphah nonglamktien sha kiwei pat ki para ri jong ngi bad sha ki lyngdoh bad ki Lebi ha ki shnong jong ki, bad ïathuh ïa ki ban ïalumlang hangne bad ngi.

³ Nangta ngin leit bad shim ïa ka Synduk ka Jutang U Blei, ïa kaba la leh bymsuidñiew mynba u Saul u long syiem.”

⁴ Ki paidbah ki la sngewbha ïa kata ka jingai jingmut bad ki la ïamynjur.

⁵ Kumta u Dabid u lumlang ïa ki paid Israel na baroh kawei ka ri, naduh khappud Ijipt ha ka phang shathie sha Khim Hamath ha ka phang shatei, khnang ban wallam ïa ka Synduk ka Jutang na Kiriath Jearim sha Jerusalem.

⁶ U Dabid bad ki paidbah ki leit sha ka nongbah Baalah, kata ka dei ka Kiriath Jearim, ha ka ri Judah, ban wallam ïa ka Synduk ka Jutang U Blei, kaba don ka kyrteng jong U Trai uba shong halor ki Kherub.

⁷ Na ka ïing u Abinadab ki wanrah ïa ka Synduk ka Jutang bad ki pynkit ïa ka ha ka kali kaba thymmai. U Ussah bad u Ahio ki sumar ïa kata ka kali,

⁸ katba u Dabid bad ki paidbah baroh ki ïashad da ka bor baroh ban ainguh ïa U Blei. Ki rwai bad ki tem ïa ki jingtem — ki duitara, ki ksing, ki shakuriaw, bad ki turoi.

⁹ Katba ki dang wan sha ka jaka shoh kew ha Khidon, u masi u jynthut, bad u Ussah u kner ïa la ka kti bad u kyrshan ïa ka Synduk ka Jutang.

¹⁰ Hangta hi U Trai u la bitar lep ïa u Ussah bad u pynïap ïa u namar ba u ktah ïa ka synduk. U ïap hangta ha khmat U Blei,

¹¹ bad kumta ïa kata ka jaka la khot ka Peres Ussah naduh kata ka por. U Dabid u la bitar namar U Trai u la pynshitom ïa u Ussah ha ka jingbitar.

¹² Te u Dabid u la sheptieng ïa U Blei bad u ong, “Kumno ngan lah ban shim ïa ka Synduk ka Jutang bad nga mynta?”

¹³ Kumta u Dabid um shym leit rah shuh ïa ka sha Jerusalem. Pynban, u ieh ïa ka ha ka ïing jong u briew uba kyrteng u Obed Edom, u traishnong ka nongbah Gath.

¹⁴ Ka don hangta haduh lai bnai, bad U Trai u kyrkhu ïa ka longïing u Obed Edom bad baroh kiei kiei kiba dei ki jong u.