1 KHRONIKL 12 - Khasi CL Bible (BSI)

Ki nongbud banyngkong jong u Dabid na ka jait Benjamin

¹ U Dabid u shong ha Siklag, sha kaba u la leit ban phet rieh na u syiem Saul. Hangta la synran da kiba bun ki shipai kiba tbit, kiba lah ban shaniah,

² ki dkhot na ka jait Benjamin, kaba dei ka jait jong u Saul. Ki lah ban siat ïa ki khnam bad kawang maw da ka kti kamon ne da ka kti kadiang.

^3-7 Ki don hapoh ka jingpynïaid jong u Ahieser bad u Joash, ki khun u Shemaah, uba na Gibeah. Kine ki shipai ki long: U Jesiel bad u Pelet, ki khun jong u Asmabeth U Berakah bad u Jehu na Anathoth U Ishmaïah na Gibeon, u shipai bapawnam bad uwei na ki nongïalam napdeng ki “Laiphew ngut” U Jeremaïah, u Jahasiel, u Johannan, bad u Josabad, kiba na Gederah U Elusai, u Jerimoth, u Bealaïah, u Shemaraïah, bad u Shepataïah kiba na Hariph U Elkanah, u Isshaïah, u Asarel, u Joeser, bad u Jashobeam, na ka kur u Korah U Joelah bad u Sebadaïah, ki khun jong u Jeroham, kiba na Gedor.

Ki nongbud jong u Dabid na ka jait Gad

⁸ Kine ki long ki kyrteng jong ki shipai bapawnam bad ba la tbit na ka jait Gad kiba pynïasoh bad ki kynhun shipai jong u Dabid mynba u la don ha ka kut ha ri shyiap. Ki long kiba tbit bha ban pyndonkam ïa ki stieh bad ki sum, kiba don ka durkhmat ba-itriem kum jong ki sing bad kiba stet kum ki khiat ha ki lum.

^9-13 La ñiew ïa ki kumne harum kat kum ka jingtbit: U Eser, u Obadaïah, u Eliab, u Mishmannah, u Jeremaïah, u Attai, u Eliel, u Johanan, u Elsabad, u Jeremaïah, bad u Makhbannai.

¹⁴ Na kine ki rangbah na ka jait Gad ki don ki rangbah pynïaidkam ba la kham slem ha ka jingai hukum ïa ki shihajar ngut, bad kiwei ki dei ki rangbah pynïaidkam kiba kham hadien ha ka jingai hukum ïa ki shispah ngut.

¹⁵ Ha u bnai banyngkong jong kawei ka snem, ka por haba ka wah Jordan ka shlei um, ki jam sha shiliang ka wah, kaba pynsakma ïa ki briew kiba shong basah ha ki jaka them kiba shong ha mihngi bad ha sepngi jong ka wah.

Ki nongbud na ki jait Benjamin bad Judah

¹⁶ Shisien ka kynhun ki rangbah na ki jait Benjamin bad Judah ki la leit sha ka kut ha kaba u Dabid u don.

¹⁷ U Dabid u leit ïakynduh ïa ki bad u ong, “Lada phi la wan kum ki paralok ban ïarap ïa nga, nga pdiang sngewbha ïa phi hangne. Ïasoh bad ngi! Hynrei lada phi mut ban die ïa nga ha ki nongshun jong nga, wat la ngam shym la pyrshang ban pynmynsaw ïa phi, U Blei jong ki kpa tymmen jong ngi un tip ïa kata bad un pynshitom ïa phi.”

¹⁸ U Mynsiem U Blei u wan ha uwei na ki, u Amasai, uba hadien u long u nongai hukum jong ki “Laiphew ngut”, bad u pyrta, “Ko Dabid u khun jong u Jesse, ngi long ki jong phi! Ka Jingjop ka long ïa phi bad ïa kito kiba ïarap ïa phi! U Blei u don ha ka liang jong phi.” U Dabid u pdiang sngewbha ïa ki bad u pynlong ïa ki, ki rangbah pynïaidkam ha ka kynhun shipai jong u.

Ki nongbud na ka jait Manasseh

¹⁹ Katto katne ngut ki shipai na ka jait Manasseh ki la leit sha ka liang u Dabid katba u dang tur shaphrang lem bad ki Philistia ban ïaleh ïa u Syiem Saul. Ha ka jingshisha um shym ïarap ïa ki Philistia, naba ki syiem jong ki, ki la sheptieng ïoh u shetkylla ïa ki sha u Saul u kynrad ba-mynshuwa jong u, kumta ki phah biang ïa u sha Siklag.

²⁰ Kine ki long ki shipai na ka jait Manasseh kiba la leit pynïasoh ha ka liang u Dabid mynba u dang wan phai: u Adnah, u Josabad, u Jediael, u Mikhael, u Josabad, u Alihu, bad u Sillethai. Ha Manasseh ki don ha baroh tang ki kynhun shipai kiba shihajar ngut ki rangbah.

²¹ Ki la shakri ïa u Dabid kum ki rangbah pynïaidkam ha ka kynhun shipai jong u, namar baroh na ki, ki long ki shipai kiba pawkhmat bha. Hadien ki la long ki rangbah pynïaidkam ha ka kynhun shipai Israel.

²² La jan man ka sngi ki riewthymmai ki pynïasoh ïa lade ha ki kynhun shipai u Dabid, kumta ka kynhun shipai jong u ka la nang heh.

Ka thup kyrteng ki kynhun shipai jong u Dabid

^23-37 Mynba u Dabid u dang don ha Hebron, kiba bun ki shipai ba la ïoh jingtbit ki pynïasoh ha ka kynhun shipai jong u ban ïarap ïa u ban long u syiem ha ka jaka u Saul, kumba U Trai u la kular. Ka jingbun jong ki ka long kumne: Ki Judah: hynriew hajar phraspah ngut ki rangbah kiba la kieng atiar bha da ki stieh bad ki sum; Ki Simeon: hynñiew hajar shispah ngut ki rangbah; Ki Lebi: saw hajar hynriewspah ngut ki rangbah; Ki nongbud jong u Jehoïada, uba hiarpateng na u Aaron: lai hajar hynñiewspah ngut; Ki ba-ha-ïing jong u Sadok, u nongïaleh ba dang khynraw: arphew ar ngut ki rangbah bakynsai; Ki Benjamin (ka jait jong u Saul): lai hajar ngut ki rangbah (kiba bun ki paid Benjamin ki ïaineh bad u Saul); Ki Ephraim: arphew hajar phraspah ngut ki rangbah bapawnam ha la ki kur ba ki don; Ki Manasseh na sepngi: khatphra hajar ngut ki rangbah ba la jied bad leit pynlong syiem ïa u Dabid; Ki Issakhar: arspah ngut ki nongïalam, lem bad ki rangbah hapoh ka jingai hukum jong ki (kine ki nongïalam ki tip aïu ba ki Israel ki dei ban leh bad ka por kaba biang bha ban leh ïa kata); Ki Sebulun: sanphew hajar ngut ki rangbah ba lah ban shaniah bad baïaineh kiba long kiba la kloi ban ïaleh, kiba la ïoh jinghikai kaba biang ban pyndonkam ïa ki tiar ïaleh thma; Ki Naphtali: shihajar ngut ki nongïalam, lem bad laiphew hynñiew hajar ngut ki rangbah ba la kieng atiar da ki stieh bad ki sum; Ki Dan: arphew phra hajar hynriewspah ngut ki rangbah ba la pyntbit; Ki Asher: sawphew hajar ngut ki rangbah kiba la kloi ban leit thma; Ki Jait sha mihngi jong ka Jordan — ki Reuben, ki Gad, bad ki Manasseh ba don ha mihngi: shi lakh arphew hajar ngut ki rangbah ba la ïoh jinghikai ban pyndonkam ïa ki jait tiar ïaleh baroh.

³⁸ Baroh kine ki shipai, kiba la kloi ban leit thma, ki leit sha Hebron, da ka jingkut jingmut ban pynlong ïa u Dabid u syiem jong ki Israel baroh. Baroh kiwei pat ki paid Israel ki ïahap jingmut lang kawei ha kane ka jingthmu.

³⁹ Ki pynlut por lai sngi hangta bad u Dabid, ki da ïabam ïadih sngewbha ïa kaba kiwei pat ki Israel ki la pynkhreh na ka bynta jong ki.

⁴⁰ Na sha jngai bah na shaphang shatei jong ki jait Issakhar, Sebulun, bad Naphtali, ki briew ki wanrah ïa ki kada, ki ut, ki khashor, bad ki muid ba la pynkit kyrhai da ki jingbam — u 'purew, ki soh Dumbur, ki soh Khajur, ka waiñ, bad ka umphniang Olib. Ki wallam ruh ïa ki masi bad ki langbrot ban pynïap bad ban bam. Kane baroh ka long ka jingpynpaw ïa ka jingkmen kaba ka ri baroh kawei ka mad.