1 KHRONIKL 11 - Khasi CL Bible (BSI)

U Dabid u long u syiem ka Israel bad ka Judah

¹ Ki paid Israel baroh ki leit sha u Dabid ha Hebron bad ki ong ha u, “Ngi dei ka doh ka snam jong phi hi.

² Mynshuwa, wat mynba u Saul u dang long u syiem, dei ma phi uba la ïalam ïa ki paid Israel sha ka thma, bad U Trai U Blei jong phi u la kular ïa phi ba phin ïalam ïa ki briew jong u bad ban long u nongsynshar jong ki.”

³ Kumta baroh ki tymmen ki san jong ki Israel ki wan sha u syiem Dabid ha Hebron. U pynlong ka jingïateh lok kaba kyntang bad ki, ki pynsleh ïa u, bad u la long u syiem ka Israel, kumba U Trai u la kular lyngba u Samuel.

⁴ U syiem Dabid bad baroh ki Israel ki leit bad tur ïaleh ïa ka nongbah Jerusalem. Ha kata ka por la tip ïa ka kum ka Jebus, bad ki nong Jebus, ki traishnong jong kata ka ri, ki dang sah hangta.

⁵ Ki nong Jebus ki ong ïa u Dabid ba un nym ïohrung shapoh ka nongbah, hynrei u Dabid u ïohknieh ïa ka kut Seïon jong ki, bad la tip ïa ka kum ka “Nongbah u Dabid”.

⁶ U Dabid u ong, “U briew uba nyngkong ban pynïap ïa u nong Jebus un long u rangbah ai hukum jong ka kynhun shipai!” U Joab uba ka kmie jong u ka dei ka Seruïah, u ïalam ban tur ïaleh bad u la long u rangbah ai hukum.

⁷ Namar ba u Dabid u leit ban shong hapoh ka kut, la khot ïa ka, ka “Nongbah u Dabid”.

⁸ U tei pat ïa ka nongbah, da kaba sdang na ka jaka ba la pyndap khyndew kaba don shaphang mihngi jong u lum, bad u Joab u pynïoh pat ïa ka bynta basah jong ka nongbah.

⁹ U Dabid u la nang khrawbor, namar ba U Trai Badonbor Baroh u don ryngkat bad u.

Ki shipai bapawnam jong u Dabid

¹⁰ Kine ki dei ki shipai bapawnam jong u Dabid. Ryngkat lang bad kiwei de ki paid Israel, ki la ïarap ïa u ban long syiem, kumba U Trai u la kular, bad ki pynneh skhem ba ka hima jong u kan long kaba khlaiñ.

¹¹ Uba nyngkong u dei u Jashobeam na ka kur Hakhmon, u nongïalam jong ki “Lai ngut”. U ïaleh da la u sum pyrshah ïa ki laispah ngut ki rangbah bad u pynïap ïa ki baroh tang ha kawei ka thma.

¹² Nangta napdeng ki “Lai ngut” don sa u Eleasar u khun jong u Dodo, na ka kur Ahoh.

¹³ Une u don lem ha ka liang u Dabid ban ïaleh pyrshah ïa ki Philistia ha ka thma Pas Dammim. U la don ha lyngkha Barli mynba ki Israel ki la sdang ban phet ïap,

¹⁴ kumta ma u bad ki rangbah jong u ki ïeng hapdeng jong ka lyngkha bad ki la ïaleh ïa ki Philistia. U Trai u la ai jingjop ïa u.

¹⁵ Ha kawei ka sngi lai ngut na ki laiphew ngut ki shipai kiba ha khmat eh ki leit hiar sha u mawsiang ha kaba u Dabid u sah hajan ka krem Adullam, katba shi kynhun ki Philistia ki dang shong dara ha ka Them Rephaim.

¹⁶ Ha kata ka por u Dabid u don ha u lum ba la ker kynroh, bad shi kynhun ki Philistia ki la ïohknieh ïa ka Bethlehem.

¹⁷ U Dabid u sngew kynmaw ïing bad u ong, “A ban da don uba wanrah umdih na ka pukri kaba harud ka khyrdop Bethlehem!”

¹⁸ Ki lai ngut ki shipai bapawnam ki tur da ka bor lyngba ka jaka shong dara jong ki Philistia, ki tong ïa ka um na ka pukri, bad ki wanrah sha u Dabid. Hynrei um treh ban dih ïa ka; pynban u theh noh ïa ka kum ka jingainguh sha U Trai

¹⁹ bad u ong, “Ngam lah da lei lei ban dih ïa ka! Kan long kum ban dih ïa ka snam jong kine ki rangbah kiba la kheiñduh ïa la ka jingim!” Te u kyntait ban dih ïa ka. Kine ki long ki kam shlur jong ki lai ngut ki shipai bapawnam.

²⁰ U Abishai u para jong u Joab u dei u nongïalam jong ki “Laiphew ngut kiba pawnam”. U ïaleh da la u sum pyrshah ïa ki laispah ngut ki rangbah bad u pynïap ïa ki, bad u la kylla long uba pawnam hapdeng ki “Laiphew ngut”.

²¹ U long uba pawnam tam na ki “Laiphew ngut” bad u la long u nongïalam jong ki, hynrei um shym la long uba pawnam kum kita ki “Lai ngut”.

²² U Benaïah u khun jong u Jehoïada na Kabseel u long u shipai bapawnam; u la leh shibun ki kam shlur, kaba kynthup ïa ka jingpynïap ïa ki ar ngut ki rangïapom bakhraw ka Moab. Shisien ha ka sngi ba hap ïor u la leit shapoh ka krem bad hangta u pynïap ïa uwei u sing.

²³ U la pynïap ruh ïa u nong Ijipt, u briew uba jrong ka rynïeng kumba ar mitar, uba bat da u sum uba heh bha. U Benaïah u tur sha u da u diengduh, u knieh kynthet ïa u sum na ka kti uta u nong Ijipt, bad da uta hi u sum u pynïap ïa u.

²⁴ Kita ki long ki kam shlur jong u Benaïah, uba long uwei na ki “Laiphew ngut”.

²⁵ U long uba palat liam napdeng ki “Laiphew ngut”, hynrei um shym kot kat kita ki “Lai ngut”. U Dabid u aiti ha u ban peit halor ki nongap phira jong u.

^26-47 Kine ki dei kiwei pat ki shipai kiba kham paw: U Asahel, u para jong u Joab U Elhanan u khun jong u Dodo na Bethlehem U Shammoth na Harod U Heles na Pelet U Ira u khun jong u Ikkesh na Tekoa U Abieser na Anathoth U Sibbekai na Hushah U Ilai na Ahoh U Maharai na Netophah U Heled u khun jong u Baanah na Netophah U Ithai u khun jong u Ribai na Gibeah ha Benjamin U Benaïah na Pirathon U Hurai na ki them hajan Gaash U Abiel na Arbah U Asmabeth na Bahurum U Elaïahba na Shaalbon U Hashem na Gison U Jonathan u khun jong u Shagee na Harar U Ahiam u khun jong u Sakhar na Harar U Eliphal u khun jong u Ur U Hepher na Mekherah U Ahijah na Pelon U Hesro na Karmel U Naarai u khun jong u Esbai U Joel u para u Nathan U Mibhar u khun jong u Hagrit U Selek na Ammon U Naharai, u nongkit atiar jong u Joab, na Beeroth U Ira bad u Gareb na Jattir U Uriah u nong Hit U Sabad u khun jong u Ahlai U Adina u khun jong u Shisa (u dkhot ba kham paw na ka jait Reuben, ryngkat bad ka kynhun jong u hi kaba don laiphew ngut ki shipai) U Hanan u khun jong u Maakah U Joshaphat na Mithan U Ussia na Ashterah U Shamma bad u Jeiel, ki khun u Hotham, na Aroer U Jediael bad u Joha, ki khun u Shimri, na Tis U Eliel na Mahabah U Jeribai bad u Joshabaïah, ki khun jong u Elnaam U Ithmah na Moab U Eliel, u Obed, bad u Jaasiel na Sobah.