1 KHRONIKL 10 - Khasi CL Bible (BSI)

Ka jingïap jong u syiem Saul

¹ Ki Philistia ki ïaleh thma pyrshah ïa ki Israel halor u lum Gilboa. Shibun na ki Israel ki la shah pynïap hangta bad kiba sah na ki, kynthup ïa u syiem Saul bad ki khun shynrang jong u, ki la phet ïap.

² Hynrei ki Philistia ki la kem ïa ki, bad ki la pynïap ïa lai ngut na ki khun shynrang jong u Saul, u Jonathan, u Abinadab, bad u Malkhishua.

³ U Saul u don hapdeng ka jingïaleh kaba jur bha, bad u la shah siat da u khnam ha u nongshun bad u la mynsaw jur.

⁴ U ong ha u samla nongrah atiar jong u, “Sei ïa ka waitlam jong me bad dung ïap ïa nga, ban ym shah ba kine ki Philistia ki bym don blei kin ïuhbeiñ halor jong nga.” Hynrei uta u samla u la khynñiuh tyngeh ban leh ïa ka. Kumta u Saul u sei ïa la ka waitlam bad u rynsied ïa lade ha ka.

⁵ Haba u samla u ïohi ba u Saul u la ïap, u ruh u rynsied ïa lade ha la ka waitlam bad u ïap.

⁶ Da kumta u Saul bad lai ngut ki khun shynrang jong u baroh ki la ïap lang bad ym don uba na ki khun ki ksiew jong u kiba ïoh ban synshar.

⁷ Haba ki Israel kiba shong basah ha ka Them Jesreel ki la ïohsngew ba ka kynhun shipai ka la phet ïap, bad ba u Saul bad ki khun shynrang jong u ki la ïap, ki iehnoh ïa la ki shnong bad ki phet ïap. Nangta ki Philistia ki wan bad ki shong ha ki.

⁸ Ha ka sngi kaba bud hadien ka thma, ki Philistia ki leit bad lute ïa ki metïap, bad ki lap ïa ki met jong u Saul bad ki khun shynrang jong u ba ki don halor u Lum Gilboa.

⁹ Ki khrai ïa ka khlieh jong u Saul, ki law noh ïa ki jingkieng atiar jong u, bad ki phah ïa ki nonglamktien kylleng ka ri Philistia ban leit ïathuh ïa ka khubor babha sha ki bleithaw jong ki bad sha ki briew jong ki.

¹⁰ Ki buh ïa ki atiar jong u ha kawei na ki templ jong ki bad wah ïa ka khlieh jong u ha ka templ jong u Dagon u blei jong ki.

¹¹ Haba ki briew jong ka Jabesh ki ïohsngew ïa kaei ba ki Philistia ki la leh ïa u Saul,

¹² ki rangbah bashlur tam ki leit bad shim ïa ki metïap jong u Saul bad jong ki khun jong u, bad ki wanrah ïa ki sha Jabesh. Ki tep ïa ki hangta hapoh u dieng Sning, bad ki shahjingit hynñiew sngi lynter.

¹³ U Saul u la ïap namar ka jingbymïaineh jong u ha U Trai. Um shym la kohnguh ïa ki hukum U Trai; u pyrshang ban wad jingshai da kaba kylli na ki mynsiem jong kiba la ïap, ha ka jaka ba un kylli na U Trai.

¹⁴ Kumta U Trai U pynïap ïa u, bad u ai synshar noh ïa ka hima sha u Dabid u khun jong u Jesse.