1 ÏOANNIS 5 - Khasi CL Bible (BSI)

Ka jingjop jong ngi ïa ka pyrthei

¹ Uno uno uba ngeit ba U Jisu u long U Messaïah, u long u khun U Blei; bad uno uno uba ieit ïa u kpa, u ieit ïa u khun jong u ruh.

² Kane ka long kumno ngi tip ba ngi ieit ïa ki khun U Blei: Ka long da kaba ieit ïa U Blei bad kohnguh ïa ki hukum jong u.

³ Naba ka jingieit jong ngi ïa U Blei, ka mut ba ngi kohnguh ïa ki hukum jong u. Bad ki hukum jong u kim long kiba eh katta katta ïa ngi,

⁴ namar man u khun U Blei u lah ban jop noh thiaw ïa ka pyrthei. Bad ngi ïoh ïa ka jingjop halor ka pyrthei lyngba ka jingngeit jong ngi.

⁵ Uei uba lah ban jop ïa ka pyrthei? Tang u briew uba ngeit ba U Jisu u long U Khun U Blei.

Ka jingsakhi ïa U Jisu Khrist

⁶ U Jisu Khrist u long uta uba la wan da ka um jong ka jingpynbaptis jong u bad ka snam jong ka jingïap jong u. U la wan ym tang da ka um, hynrei, da ka um bad ka snam ruh. Bad U Mynsiem da lade hi u phla ba kane ka long kaba shisha, namar U Mynsiem u long ka jingshisha.

^7-8 Ki don lai ki sakhi: U Mynsiem, ka um bad ka snam; bad kine baroh lai ki ai ïa kajuh ka jingphla.

⁹ Ngi ngeit ïa ka jingphla jong u briew; hynrei ka jingphla U Blei ka long kaba kham khlaiñ, bad u la ai ïa kane ka jingphla shaphang U Khun jong u.

¹⁰ Kumta uno uno uba ngeit ha U Khun U Blei u don ïa kane ka jingphla ha ka dohnud jong u hi; hynrei uno uno u bymngeit ha U Blei, la pynlong ïa u, uba lamler, namar um shym la ngeit ïa kaei kaba U Blei u la ong shaphang U Khun jong u.

¹¹ Ka jingphla ka long kane: U Blei u la ai ha ngi ïa ka jingim bymjukut, bad kane ka jingim ka don ka tyllong jong ka ha U Khun jong u.

¹² Uno uno uba don U Khun, u don ïa kane ka jingim; uno uno u bym don U Khun U Blei, um don ka jingim.

Ka jingim bymjukut

¹³ Nga thoh ha phi ïa kane ba phin tip ba phi don ka jingim bymjukut — phi kiba ngeit ha U Khun U Blei.

¹⁴ Ngi don ka jingshlur ha khmat U Blei, namar ngi sngewskhem ba u ïohsngew ïa ngi lada ngi kyrpad ïa u na ka bynta kano kano kaba long kat kum ka mon jong u.

¹⁵ U ïohsngew ïa ngi man ba ngi kyrpad ïa u; bad namar ba ngi tip ba kane ka long kaba shisha, ngi tip ruh ba u ai ha ngi ïa kaei kaba ngi kyrpad na u.

¹⁶ Lada phi ïohi ïa la u parabriew ba u leh ïa ka pop ka bym ïalam sha ka jingïap, phi dei ban duwai ha U Blei, u ban ai ha u ïa ka jingim. Kane ka ïadei ïa kito kiba ki pop jong ki, kim ïalam sha ka jingïap. Hynrei ka don ka pop kaba ïalam sha ka jingïap, bad ngam ong ba phi dei ban duwai sha U Blei shaphang kata.

¹⁷ Baroh ki jingleh bymdei ki long ka pop, hynrei ka don ka pop ka bym ïalam sha ka jingïap.

¹⁸ Ngi tip ba ym don uno uno napdeng ki khun U Blei uba ïai leh pop, naba U Khun U Blei u sumar ïa u, bad u Basniew um lah ban pynmynsaw ïa u.

¹⁹ Ngi tip ba ngi long ki jong U Blei, wat la ka pyrthei baroh kawei ka don hapoh ka jingsynshar jong u Basniew.

²⁰ Ngi tip ba U Khun U Blei u la wan bad u la ai ha ngi ïa ka jingshemphang, khnang ba ngin ithuh ïa U Blei uba shisha. Ngi im ha U Blei uba shisha — ha U Jisu Khrist U Khun jong u. Une u long U Blei uba shisha, bad kane ka long ka jingim bymjukut.

²¹ Ko ki khun jong nga, to phin ri kyndong ïa lade na ki blei ba-thala!