1 ÏOANNIS 4 - Khasi CL Bible (BSI)

U Mynsiem bashisha bad U mynsiem lamler

¹ Ko ki paralok ba-ieit jong nga, wat ngeit ïa baroh kiba kam ba ki don U Mynsiem, hynrei, to phin da tynjuh ïa ki ban shem lada u mynsiem ba ki don u wan ne em na U Blei. Naba shibun ki nongïathuhlypa balamler ki la leit kylleng sawdong.

² Kane ka long kumno phin lah ban ithuh la u long U Mynsiem jong U Blei: Uno uno uba pdiang ba U Jisu Khrist u la wan kum u briew, u don U Mynsiem uba wan na U Blei.

³ Hynrei uno uno uba len ïa kane shaphang U Jisu, um don U Mynsiem na U Blei. U mynsiem ba u don, u long na u Nongshun jong U Khrist; phi la ïohsngew ba un wan, bad mynta u la da don hangne ha ka pyrthei.

⁴ Hynrei ma phi, phi long ki jong U Blei, ko ki khun jong nga, bad phi la jop ïa ki nongïathuhlypa balamler, namar U Mynsiem uba don ha phi, u long uba kham donbor ban ïa u mynsiem ha kito kiba long na ka pyrthei.

⁵ Kito ki nongïathuhlypa balamler, ki kren shaphang kiei kiei ki jong ka pyrthei, bad ka pyrthei ka shahshkor ïa ki, namar ki long ki jong ka pyrthei.

⁶ Hynrei ngi, ngi long ki jong U Blei. Uno uno uba ithuh ïa U Blei, u shahshkor ïa ngi; uno uno u bym long u jong U Blei, um shahshkor ïa ngi. Kane te, ka long kumno ngi lah ban ïathuh ïa ka jingïapher hapdeng U Mynsiem ka jingshisha bad u mynsiem ka jinglamler.

U Blei u long ka jingieit

⁷ Ko ki paralok ba-ieit, to ngin ïa-ieit iwei ïa iwei, namar ka jingieit ka wan na U Blei. Uno uno uba ieit, u long u khun jong U Blei bad u ithuh ïa U Blei.

⁸ Uno uno u bym ieit, um ithuh ïa U Blei, naba U Blei u long ka jingieit.

⁹ Bad U Blei u la pyn-i ïa ka jingieit jong u ïa ngi da kaba phah ïa la U Khun ba marwei sha ka pyrthei, khnang ba ngin ïoh ïa ka jingim da u.

¹⁰ Kane ka long kaei kaba ka jingieit ka long: Kam dei ba ngi la ieit ïa U Blei, hynrei, ba u la ieit ïa ngi bad u la phah ïa la U Khun ban long ka lynti ha kaba map ïa ki pop jong ngi.

¹¹ Ko ki paralok ba-ieit, lada kane ka long kumno U Blei u la ieit ïa ngi, te ma ngi, ngi dei ban ïa-ieit iwei ïa iwei pat.

¹² Ym don uno uno uba la ïohi ïa U Blei mynno mynno ruh, hynrei, lada ngi ïa-ieit iwei ïa iwei pat, U Blei u im hapoh jong ngi, bad ïa ka jingieit jong u la pynjanai noh ha ngi.

¹³ Ngi sngewskhem ba ngi im ha U Blei bad ba u im hapoh jong ngi, namar ba u la ai ha ngi ïa U Mynsiem jong u.

¹⁴ Bad ngi la ïohi bad ïathuh ha kiwei ba U Kpa u la phah ïa la U Khun ban long U Nongpynim jong ka pyrthei.

¹⁵ Lada uno uno u pynbna ba U Jisu u long U Khun U Blei, u im ha U Blei bad U Blei u im hapoh jong u.

¹⁶ Bad ma ngi da lade ngi tip bad ngeit ïa ka jingieit kaba U Blei u don na ka bynta jong ngi. U Blei u long ka jingieit, bad uno uno uba im ha ka jingieit, u im bad U Blei bad U Blei u im hapoh jong u.

¹⁷ Ïa ka jingieit la pynjanai noh ha ngi, ba ngin don ka jingshlur ha ka Sngi ka Jingbishar; bad ngin don ïa ka namar ka jingim jong ngi ha kane ka pyrthei ka long kumjuh kum ka jong U Khrist.

¹⁸ Ym don ka jingsheptieng ha ka jingieit; ka jingieit kaba janai ka beh noh ïa ka jingsheptieng baroh. Kumta te, ïa ka jingieit ym shym la pynjanai ha uno uno uba sheptieng, namar ka jingsheptieng ka don jingïadei bad ka jingpynshitom.

¹⁹ Ngi ieit namar U Blei u la ieit shuwa ïa ngi.

²⁰ Lada uno uno u ong ba u ieit ïa U Blei, hynrei u isih ïa la u parabriew, u long uba lamler. Naba um lah ban ieit ïa U Blei, ïa uba um shym ïohi, lada um ieit ïa la u parabriew ïa uba u ïohi.

²¹ Ka hukum kaba U Khrist u la ai ha ngi ka long kane: Uno uno uba ieit ïa U Blei u dei ban ieit ïa la u parabriew ruh.