1 ÏOANNIS 3 - Khasi CL Bible (BSI)

Ki khun jong U Blei

¹ Ha khmih haduh katno U Kpa u la ieit ïa ngi! Ka jingieit jong u ka long kaba khraw katta katta ba ïa ngi la khot ki khun U Blei — bad kumta, ha ka jingshisha, ngi long. Dei kane ba balei ka pyrthei kam ithuh ïa ngi: Kam pat la ithuh ïa U Blei.

² Ko ki paralok ba-ieit jong nga, mynta ngi long ki khun U Blei, hynrei kam pat da shai aïu ngin sa long. Hynrei ngi tip ba ynda U Khrist un paw, ngin ïoh long kum ma u, namar ngin ïohi ïa u kumba u long da shisha.

³ Uwei pa uwei uba don ïa kane ka jingkyrmen ha U Khrist, u ri khuid ïa lade, kumba U Khrist u long uba khuid.

⁴ Uno uno uba leh pop, u long ba la pynrem ha kaba pynkheiñ ïa ka hukum U Blei, namar ka pop ka dei ka jingpynkheiñ ïa ka hukum.

⁵ Phi tip ba U Khrist u la paw ban bah noh ïa ki pop, bad kam don kano kano ka pop ha u.

⁶ Kumta uwei pa uwei uba long ha U Khrist, um ïai leh pop; hynrei uno uno uba ïai leh pop, um pat shym la ïohi ïa u lane ithuh ïa u.

⁷ To wat ai ba uno uno un shukor ïa phi, ko ki khun jong nga! Uno uno uba leh ïa kaei kaba dei, u long uba hok, kumba U Khrist u long uba hok.

⁸ Uno uno uba ïai leh ïa ka pop, u long jong u Soitan, namar u Soitan u la leh pop naduh kaba mynnyngkong eh. U Khun U Blei u la paw na ka bynta kane hi ka daw, ban pynjot noh ïa kaei kaba la leh da u Soitan.

⁹ Uno uno uba long u khun jong U Blei, um ïai leh pop, naba ka jinglong blei batynrai jong U Blei hi ka don ha u; bad namar U Blei u long u Kpa jong u, um lah ban ïai bteng ban leh pop.

¹⁰ Kane ka long ka jingïapher kaba shai kdar hapdeng ki khun U Blei bad ki khun u Soitan: Uno uno u bym leh ïa kaei kaba dei lane u bym ieit ïa la u hynmen u para um long u khun U Blei.

Ieit iwei ïa iwei

¹¹ Ka khubor kaba phi la ïohsngew naduh kaba mynnyngkong hi ka long kane: Ngi dei ban ïa-ieit iwei ïa iwei pat.

¹² Ngim dei ban long kum u Kain; u la long jong u Basniew bad u la pynïap ïa u Abel, u para jong u. Balei u Kain u la pynïap ïa u? Namar kiei kiei kiba u la leh da lade hi ki la long ki bym dei, hynrei kiei kiei kiba u para jong u, u la leh ki la long kiba dei.

¹³ Phi wat sngewlyngngoh, ko ki para jong nga, lada ki briew jong ka pyrthei ki isih ïa phi.

¹⁴ Ngi tip ba ngi la iehnoh ïa ka jingïap bad ngi la wan noh sha ka jingim; ngi tip ïa ka namar ba ngi ieit ïa la ki hynmen ki para. Uno uno u bym ieit, u dang don hi hapoh ka bor jong ka jingïap.

¹⁵ Uno uno uba isih ïa la u hynmen u para u long u nongpynïap briew, bad phi tip ba u nongpynïap briew um pat ïoh ka jingim bymjukut ha u.

¹⁶ Kane ka long kumno ngi tip kaei ka jingieit: U Khrist u la aiti ïa la ka jingim na ka bynta jong ngi. Ngi ruh, namarkata, ngi dei ban ai ïa la ki jingim na ka bynta ki parabriew!

¹⁷ Lada u briew uba riewspah u ïohi ïa la u parabriew ha ka jingkyrduh, pynban, u khang khyrdep ïa la ka dohnud pyrshah ïa la u parabriew, kumno u lah ban kam ba u ieit ïa U Blei?

¹⁸ Ko ki khun jong nga, ka jingieit jong ngi kam dei ban long tang da ki ktien bad ka jingkren; ka dei ban long ka jingieit kaba shisha, kaba pynpaw ïa lade da ka kam.

Ka jingshlur ha khmat U Blei

¹⁹ Kane, te, ka long kumno ngin tip ba ngi long ki jong ka jingshisha; kane ka long kumno ngin sngewskhem ha khmat U Blei.

²⁰ Lada ka jingïatiplem jong ngi ka pynrem ïa ngi, ngi tip ba U Blei u kham khraw ban ïa ka jingïatiplem jong ngi bad ba u tip ïa kiei kiei baroh.

²¹ Bad kumta, ko ki paralok ba-ieit jong nga, lada ka jingïatiplem kam pynrem ïa ngi, ngi don ka jingshlur ha khmat U Blei.

²² Ngi ïohpdiang na u ïa kano kano kaba ngi pan, namar ba ngi kohnguh ïa ki hukum jong u bad ngi leh ïa kaei kaba pynsngewbha ïa u.

²³ Kaei kaba u hukum ka long ba ngi ngeit ha U Jisu Khrist, U Khun jong u bad ngi ïa-ieit iwei ïa iwei, kumba U Khrist u la hukum ïa ngi.

²⁴ Uno uno uba kohnguh ïa ki hukum jong U Blei, u ïaisah ha U Blei bad U Blei u ïaisah ha u. Bad dei namar U Mynsiem uba U Blei u la ai ha ngi, ngi tip ba U Blei u ïaisah ha ngi.