1 ÏOANNIS 2 - Khasi CL Bible (BSI)

U Khrist u Nongïarap jong ngi

¹ Nga thoh ïa kane ha phi, ko ki khun jong nga, khnang ba phin ym leh pop; hynrei lada uno uno u leh pop, ngi don uwei uba ïasaid bad U Kpa na ka bynta jong ngi — U Jisu Khrist, uta uba hok.

² Bad U Khrist hi u long ka lynti da kaba yn ïohmap ïa ki pop jong ngi, bad ym tang ïa ki pop jong ngi, hynrei ruh ïa ki pop jong ki briew baroh.

³ Lada ngi kohnguh ïa ki hukum jong U Blei, te ngi sngewskhem ba ngi ithuh ïa u.

⁴ Lada uno uno u ong ba u ithuh ïa u, hynrei um kohnguh ïa ki hukum jong u, kum uta u briew u long u nongshukor bad ym don ka jingshisha ha u.

⁵ Hynrei uno uno uba kohnguh ïa ka ktien jong u, u long uta uba ïa ka jingieit ïa U Blei la pynjanai da shisha. Dei da kane ba kumno ngi lah ban sngewskhem ba ngi long ha U Blei:

⁶ Uno uno uba ong ba u ïaisah ha U Blei u dei ban im kumba U Jisu Khrist u la im.

Ka Hukum bathymmai

⁷ Ko ki paralok ba-ieit jong nga, kane ka hukum kaba nga thoh sha phi kam long kaba thymmai; ka long ka hukum kaba rim, kata kaba phi la ïoh naduh kaba mynnyngkong eh. Ka hukum barim ka long ka khubor kaba phi la lah ïohsngew.

⁸ Pynban, ka hukum kaba nga thoh mynta sha phi ka long kaba thymmai, namar ka jingshisha jong ka, ka la paw ha U Khrist bad kumjuh ruh ha phi. Naba ka jingdum ka la jah noh, bad ka jingshai kaba shisha ka la da tyngshaiñ.

⁹ Uno uno uba ong ba u don ha ka jingshai, pynban u isih ïa la u hynmen u para, u don ha ka jingdum haduh kane hi ka kynta.

¹⁰ Uno uno uba ieit ïa la u hynmen u para u ïaid ha ka jingshai, bad kumta ym don kaei kaei ha u ka ban pynlong ïano ïano pat ban leh pop.

¹¹ Hynrei uno uno uba isih ïa la u hynmen u para u don ha ka jingdum; u ïaid ha ka bad um tip shano u leit, namar ka jingdum ka la pynmatlah ïa u.

¹² Nga thoh sha phi, ko ki khun jong nga, namar ïa ki pop jong phi la map na ka bynta U Khrist.

¹³ Nga thoh sha phi, ko ki kpa, namar phi ithuh ïa u uba la long naduh kaba mynnyngkong. Nga thoh sha phi, ko ki khun samla, namar phi la jop noh thiaw ïa Uta u Basniew.

¹⁴ Nga thoh sha phi, ko ki khun jong nga, namar phi ithuh ïa U Kpa. Nga thoh sha phi, ko ki kpa, namar phi ithuh ïa u, uba la don naduh kaba mynnyngkong. Nga thoh sha phi, ko ki khun samla, namar phi long kiba khlaiñ; ka ktien U Blei ka ïaisah ha phi, bad phi la jop noh thiaw ïa Uta u Basniew.

¹⁵ To wat ieit ïa ka pyrthei, lymne ïa kaei kaei kaba dei jong ka pyrthei. Lada phi ieit ïa ka pyrthei, kata ka long ba phim ieit ïa U Kpa.

¹⁶ Baroh kiei kiei kiba dei jong ka pyrthei — kaei kaba ka malade bapop ka brai, kaei kaba ki briew ki ïohi bad kwah, bad baroh kiei kiei kiba ha ka pyrthei kiba ki briew ki sngewsarong — ym don na kane kaba wan na U Kpa; baroh ka wan na ka pyrthei.

¹⁷ Ka pyrthei bad kaei kaei baroh kaba don ha ka, kaba ki briew ki kwah kan sa jah noh; hynrei kito kiba leh ïa ka mon U Blei kin im junom.

U nongshun jong U Khrist

¹⁸ Ko ki khun jong nga, kaba kut ka la jan! La ïathuh ha phi ba u Nongshun jong U Khrist un sa wan; bad mynta ki nongshun babun jong U Khrist ki la lah paw, bad kumta ngi tip ba kaba kut ka la jan.

¹⁹ Kine ki briew da shisha kim don ha ka jingïasyllok jong ngi, bad kata ka long balei ba ki la iehnoh ïa ngi; lada ki la don ha ka jingïasyllok bad ngi, kin jin da la sah bad ngi. Hynrei ki mihnoh, ba kan paw shai ba ym don napdeng jong ki kiba dei shisha ki jong ngi.

²⁰ Hynrei ma phi, phi la lah don ïa U Mynsiem Bakhuid ba la theh ha phi da U Khrist, bad kumta phi baroh phi tip ïa ka jingshisha.

²¹ Nga thoh sha phi, namarkata, ym namar ba phim tip ïa ka jingshisha; pynban, ka long namar ba phi da tip ïa ka, bad phi tip ruh ym don ka lamler kaba ju mihnoh na ka jingshisha.

²² Uei te uba lamler? U dei uno uno uba ong ba U Jisu um dei U Messaïah. Kum uta u briew, u long u Nongshun jong U Khrist — u kyntait ïa U Kpa bad ïa U Khun ruh.

²³ Naba uno uno uba kyntait ïa U Khun u kyntait ruh ïa U Kpa; uno uno uba pdiang ïa U Khun u don ïa U Kpa ruh.

²⁴ To sngewskhem, te, ban sumar ha ki dohnud jong phi ïa ka khubor ba phi la ïohsngew naduh mynnyngkong. Lada phi sumar ïa kata ka khubor, te phin ïaisah borabor ha U Khun bad ha U Kpa.

²⁵ Bad kane ka long kaei kaba U Khrist hi da lade u la kular ban ai ha ngi — ka jingim bymjukut.

²⁶ Nga thoh ïa kane sha phi shaphang kito kiba pyrshang ban shukor ïa phi.

²⁷ Hynrei na ka bynta jong phi, U Khrist u la theh noh ïa la U Mynsiem ha phi. Katba U Mynsiem jong u, u dang ïaisah ha phi, phim donkam ïano ïano ban hikai ïa phi. Naba U Mynsiem jong u, un hikai ïa phi shaphang kiei kiei baroh, bad kaei kaba u hikai ka long kaba shisha, ym kaba lamler. Namarkata, to kohnguh ïa ki jinghikai U Mynsiem bad ïaisah ha U Khrist.

²⁸ Ho-oid, ko ki khun jong nga, to ïaisah ha u, khnang ba ynda u wanpaw, ngin long kiba dap da ka jingshlur bad ngim donkam ban rieh ha ka jinglehrain na u ha ka Sngi kaba u wan.

²⁹ Phi tip ba U Khrist u long uba hok; phi dei ban tip, namarkata, ba uei uei baroh uba leh ïa kaei kaba dei u long u khun U Blei.