1 ÏOANNIS 1 - Khasi CL Bible (BSI)

U Ktien ka Jingim

¹ Ngi thoh sha phi shaphang U Ktien ka jingim, uba la don naduh kaba mynnyngkong eh. Ngi la ïohsngew ïa u, bad ngi la ïohi ïa u da la ki khmat; ho-oid, ngi la ïohi ïa u, bad ki kti jong ngi ki la ïohktah ïa u.

² Haba ïa une u jingim la pynpaw, ngi la ïohi ïa u; kumta ngi kren shaphang jong u bad ngi ïathuh ïa phi shaphang ka jingim bymjukut kaba la don bad U Kpa bad ba la pynithuh ha ngi.

³ Ïa kaei kaba ngi la ïohi bad la ïohsngew ngi pynbna ha phi ruh, khnang ba phin ïasnoh bad ngi ha ka jingïasyllok kaba ngi don bad U Kpa lem bad U Jisu Khrist U Khun jong u.

⁴ Ngi thoh ïa kane khnang ba ka jingkmen jong ngi kan long kaba dap pura.

U Blei u long ka jingshai

⁵ Mynta ka khubor ïa kaba ngi la ïohsngew na U Khun jong u bad pynbna ha phi ka long kane: U Blei u long ka jingshai bad ha u ka jingdum kam don satia.

⁶ Lada, namarkata, ngi ong ba ngi don ka jingïasyllok bad u, pynban, ha kajuh ka por ngi ïaid ha ka jingdum, ngi lamler da ki ktien jong ngi bad ha ki kam jong ngi.

⁷ Hynrei, lada ngi ïaid ha ka jingshai — kumba ma u, u long ha ka jingshai — te ngi don ka jingïasyllok paralok hi, bad ka snam U Jisu, U Khun jong u, ka pynkhuid ïa ngi na ka pop baroh.

⁸ Lada ngi ong ba ngim don pop, ngi shukor ïa lade, bad ka jingshisha kam don ha ngi.

⁹ Hynrei lada ngi phla ïa ki pop jong ngi ha U Blei, un bat ïa la ka kular bad un leh ïa kaei kaba dei: Un map ïa ngi ïa ki pop jong ngi bad un pynkhuid ïa ngi na ki kam bymman baroh.

¹⁰ Lada ngi ong ba ngim shym la leh pop, ngi pynlong ïa U Blei ba u lamler bad ka ktien jong u kam don ha ngi.