Yohanes 6 - Abun Scripture

Yefun Yesus syo sugit nai yetu ge ribu mek

¹ Kam yo tak o, Yefun Yesus mu mo Em Galilea deta. Em Galilea ne, ye kendo gum dik yo o do Em Tiberias.

² Yefun Yesus si An bi pakon mu ne sa, yé mwa boribot An, we yé mwa ne me suk gato Yefun Yesus ben gato kadum Yefun Allah bi suktinggi. Yé mwa ne yeket mo gato Yefun Yesus ben ye gato i ne ge.

³ Sane Yefun Yesus si bi pakon mu it mo banbo dik yo, ete án sino kem not mone.

⁴ Tomgane karowa ye Yahudi bi Kam Sye Waiket it.

⁵ Yefun Yesus kem mone, An sokbot nden neya sa, An me yé mwa teker ma mone. An ndo mo Filipus do, ”Men so sugit mo u wa yé mwa more git ne?” (

⁶ Yefun Yesus dakai jam suk gato bergan An ben, sarewo An dakai ndobot Filipus subere An jam suk gato Filipus ki ne sor re.)

⁷ Filipus ki nai Yefun Yesus do, ”Men mu so roti su sugum tepsu men ben suk mu kom aina munggwo, ete men nai bi sugum ne yo, sugum mwa ne bere yo tep wa men so roti wa yé mwa ré sino git nde. Deyo ku wokgan sor re, deyo yo ku nde.”

⁸ Yefun Yesus bi pakon dik yo o, Andreas, gato Simon Petrus bi nji ne, an ki nai Yefun Yesus do,

⁹ ”Pa yebris dik yo anare, an bi an bi roti koi mek si bi boge ge we. Sarewo sugit wokgan ré tepsu yé mwa ré sa u ne?”

¹⁰ Yefun Yesus ki nai An bi pakon do, ”Nin syogat yé mwa ne kem ga.” Mo pe ne, es sor re kom, es mwa. Sane yé mwa kem mone it, yebris gato kem mone karowa ge ribu mek.

¹¹ Yefun Yesus nai roti gato pa yebris gwat ne, An nai sa, An ki do, ”Ndo mo Nan, Yefun Allah wa sugit gato Nan syo nai men ré.” Orete Yefun Yesus syobot yé mwa gato kem mone git sino. Orete An nai boge ne dom. Yefun Yesus ki do, ”Ndo mo Nan, Yefun Allah wa boge gato Nan syo nai men ré.” Orete An syobot yé mwa ne git sino. Yé mwa ne git sane sor yé on ge kai.

¹² Yé on ge sa, Yefun Yesus ki nai An bi pakon do, ”Nin sum sugit koita, nin bare sugit wokgan yo wé dom nde.”

¹³ Sane Yefun Yesus bi pakon sum sugit napta kadit roti gum mumek gato yé mwa mone git ne. Án sum ete bok mo yu sye musyu dik sop we ses kai.

¹⁴ Yé mwa mone me Yefun Allah bi suktinggi bor mo suk gato Yefun Yesus ben mone sa, án ki do, ”Sangge yenabi gato Yefun Allah tom su men do, bere An syogat ma mo bur ré, ana gare it.”

¹⁵ Yefun Yesus jam do, yé mwa mone iwa ma ete syaugat Yefun Yesus jom án sino tepsu yeraja. Sarewo Yefun Yesus bari re, sane Yefun mu kadit án mu mo banbo mo nden. Yefun Yesus wadigan kem dor mone.

Yefun Yesus muket gwes bot em rom deyu

¹⁶ Kam dek it, Yefun Yesus bi pakon is kadit banbo, mu mo em de.

¹⁷ Orete pakon ne it mo kwem wa án mu mo Kapernaum mo em deta. Sugane ndendu it, sarewo Yefun Yesus yo ma ku án nde tó.

¹⁸ Nofuf kas nggi ete ben em bak frek.

¹⁹ Án do mbros kwem ko gan kadit em de, or án me Yefun Yesus ma karowa án. Yefun Yesus muket gwes bot em rom deyu. Pakon me Yefun Yesus ma sa, án kwabom kro ndo nde.

²⁰ Sarewo Yefun Yesus ki nai án do, ”Nin nyu nde! Ji anare.”

²¹ Sane pakon iwa bes An it mo kwem mit. Yefun Yesus it mo kwem mit-i, sugane kwem syek mo nden-i, mo pe gato án sino mu mone.

Yé meret Yefun Yesus

²² Bi ik o, yé mwa gato kem mo em deta ne, án napakom do, kwem dik sor nor mone, ete Yefun Yesus yo si An bi pakon mu nde. An bi pakon anato mu sor re.

²³ Orete kwem bok yo kadit kota Tiberias ma kom mone. Kwem ne nor karowa nat gato yé mwa git roti gato Yefun Yesus ki ndo mo Yefun Allah wa ne, ete syo nai án git ne.

²⁴ Yé mwa ne me do, Yefun Yesus si An bi pakon yo mone o nde sa, yé mwa ne it mo kwem bok gane mu mo Kapernaum wa syeret Yefun Yesus mone.

Yefun Yesus anato tepsu sugit gato ben yetu mbau gesyos

²⁵ Yé mu kom mo em deta ne, ete yé ku Yefun Yesus mone sa, yé ne ndo mo An do, ”Yeguru, Nan ma more su kam u ne?”

²⁶ Yefun Yesus ki nai yé ne do, ”Suk gato Ji ki ré suksangge anare, nin meret Ji mo gato Ji kadum Yefun Allah bi suktinggi bor nde, wo nin meret Ji, we nin ku sugit wa nin git sane sor nin on ge sor re.

²⁷ Nin ben suk it yo, nin meret sugit gato bergan kwik kadit nin nde re. Wo nin ben suk it yo, nin meret sugit gato kem nam, gato ben nin mbau gesyos. Bere Yetu bi Pa to Ji ré syo sugit ne nai nin re, we Ji bi Ai Yefun Allah bes Ji gum kok subere Ji kak os ndo wa nin kem gesyos re.”

²⁸ Orete yé mwa ne ndo mo Yefun Yesus do, ”Men ben suk sato suma anato tepsu Yefun Allah mit ne?”

²⁹ Yefun Yesus ki nai yé ne do, ”Suk gato Yefun Allah iwa nin ben anato nin onyar kem mo Ye gato Yefun Allah syogat ma mo bur ré.”

³⁰ Sane yé ne ki nai An do, ”Sane Nan ben suk sato suma bor wa men me subere men onyar kem mo Nan ne? Suma anato bere Nan ben ne? Bere Nan ben suk tepsu suk gato bor suga nyim tuya,

³¹ men bi amui kem mo pe gato kwe yo kom mo nde, ete án git sugit gato gum do ’manna.’ Tepsu yé krom mo Yefun Allah bi sukdu do, ’An syo sugit is kadit gu ma wa yé git.’ ”

³² Sane Yefun Yesus ki nai yé mwa mone do, ”Suk gato Ji ki ré suksangge anare, Musa anato syo sugit gato is kadit gu nai nin nde re. Sarewo Ji bi Ai anato syo sugit gato sangge kadit gu nai nin ne,

³³ we Yefun Allah bi sugit-i anato Ye gato is kadit gu ma mo bur ré. Ye ne ben yetu mo bur ré mbau.”

³⁴ Sane yé mwa ne ki nai Yefun Yesus do, ”Yenggras, Nan syo sugit ne nai men petok sor.”

³⁵ Yefun Yesus ki nai án do, ”Ji ré anato tepsu sugit gato ben yetu mbau. Ye gato ma mo Ji yo, an yo on de o nde. Ye gato onyar kem mo Ji yo, an yo sosa o nde sor to kapyo mato kapyo.

³⁶ Sarewo Ji ki nai nin mó re, sare do, nin da me Ji su nin gro re, wo nin yo onyar kem mo Ji nde.

³⁷ Yé mwa gato Ji bi Ai syo nai Ji, bere án sino ut mo Ji. Ye to ma ut mo Ji yo, Ji yo syun ge dik yo wé dom nde.

³⁸ We Ji is kadit gu ma mo bur ré wa Ji ben Ji bi Ai bi suk-i gato An imo, we An anato syogat Ji ma more. Ji yo ben Ji dakai bi suk-i nde.

³⁹ Ji bi Ai gato syogat Ji ma more, An mit i do, yé sino gato An syo nai Ji ne, Ji mewa subere ge dik yo ges mo nde, ge dik yo gwet nde, wo Ji jom án pe sor, ete su kam gato bur ré kru yo, bere Ji sun án sino.

⁴⁰ Sane dom, Ji bi Ai mit i do, yé mwa ne sino gato me An bi Gan to Ji ré, ete án onyar kem mo Ji yo, án kem ndo to kapyo mato kapyo. Bere su kam gato bur ré kru yo, Ji sun án mbau satu. Suk gato Ji bi Ai imo anane it.”

⁴¹ Yefun Yesus ki bi sukdu-i saresa, ye Yahudi duwer Yefun mo sukdu gato An ki sare do, ”Ji anato tepsu sugit gato is kadit gu ma.”

⁴² Ye Yahudi ne ki do, ”Ye ré, An anato Yusuf bi pa, gato gum do Yesus fe! Men jam An bi im si bi ai re. Ben sa u anato An ki do, An is kadit gu ma ne?”

⁴³ Orete Yefun Yesus ki nai ye Yahudi do, ”Nin duwer yu mo sukdu ne o nde.

⁴⁴ Ji bi Ai gato syogat Ji ma mo bur ré, An tik ye mit anato ye jammo Ji, ondeyo ye yo jammo Ji nde. Ye gato jammo Ji, suga bur ré kru it yo, bere Ji sun ye ne mbau satu.

⁴⁵ Yenabi krom mo Yefun bi sukdu do, ’Bere Yefun Allah duno yé mwa ne sino.’ Yé mwa ne sino gato jam sukduno kadit Ji bi Ai ete benbot, bere ye ne ma mo Ji.

⁴⁶ Yefun Allah da duno yetu, wo yetu yo me Ji bi Ai mo nde. Ji, gato ma kadit Yefun Allah sa, Ji dakai sor ete me Yefun Allah re.

⁴⁷ Suk gato Ji ki ré suksangge anare, ye gato onyar kem mo Ji it yo, ye ne kem ndo to kapyo mato kapyo.

⁴⁸ Ji dakai anato tepsu sugit gato ben yetu mbau.

⁴⁹ Tomga nyim tuya nin bi amui git sugit gato gum do ’manna,’ mo pe gato kwe yo kom mo nde. Án git, orete ri ma án kwop re.

⁵⁰ Sarewo ye gato git sugit gato is kadit gu ma ré yo, ye ne yo kwop nde.

⁵¹ Ji dakai anato tepsu sugit gato is kadit gu ma ré. Sugit ré ben yetu mbau. Ye to git sugit ré yo, ye ne kem gesyos it, an mbau to kapyo mato kapyo. Sugit gato Ji bi wa ben yetu mo bur ré mbau anato Ji dakai ku.”

⁵² Ye Yahudi jam suk gato Yefun Yesus ki ne sa, án duwer yu, án ot is yu, án ki do, ”Ben sa u anato Ye ré syo An ku wa men git ne?”

⁵³ Yefun Yesus ki nai án do, ”Suk gato Ji ki ré suksangge anare, nin yo git Yetu bi Pa ku, ete nin da Yetu bi Pa dé nde yo, bere nin kem ndo sisu sangge nde.

⁵⁴ Ye to git Ji ku si da Ji dé yo, ye ne kem gesyos. Or o bur ré kru it yo, bere Ji sun ye ne mbau satu.

⁵⁵ Ji ku anato sugit gato ben yetu mbau sisu sangge. Ji dé anato syur gato ben yetu mbau sisu sangge.

⁵⁶ Ye to git Ji ku si da Ji dé yo, ye ne si Ji tepsu yedik petok sor. Ji dom si ye ne tepsu yedik.

⁵⁷ Ji bi Ai gato ben yetu mbau syogat Ji ma more. Sane tepsu Ji mbau mo An, ye to git Ji ku, bere mbau mo Ji dom.

⁵⁸ Sane Ji dakai anato sugit gato is kadit gu ma. Sugit ré yo tepsu sugit gato nin bi amui git ne nde. Nin bi amui git sugit gato gum do manna, sarewo án kwop re. Wo ye to git sugit ré yo, ye ne mbau to kapyo mato kapyo.”

⁵⁹ Yefun Yesus duno nje mo nu ari mo kota Kapernaum, An ki sukdu mwa subot An dakai tepsu sugit gato ben yetu mbau ne nai nje mone jam.

Sukdu gato ben men kem ndo to kapyo mato kapyo

⁶⁰ Pakon ge bok yo jam Yefun Yesus bi sukdu-i ne or wé, ete pakon ne ki do, ”An bi sukdu-i yé teker wa men jambot. Je u anato nggiwa an nai sukdu ne, ete an grem mo an mit ne? Yo mo nde!”

⁶¹ Yefun Yesus dakai jam do, An bi pakon duwer yu mo sukdu gato An ki ne. Sane Yefun Yesus ki nai án do, ”Te, nin maskwa Ji mo sukdu gato Ji ki ne bado?

⁶² Nin sokme Yetu bi Pa to Ji ré it satu mo gu, mu mo pe gato Ji ma kadit ne yo, bere nin sa u ne?

⁶³ Yefun Allah Gen anato ben yetu mbau. Men yetu dakai sor yo nggiwa men ben men mbau nde. Sukdu gato Ji ki nai nin ne anato sukdu gato ma kadit Yefun Allah Gen. Sane sukdu ne anato ben nin mbau.

⁶⁴ Sarewo nin deyo bariwa jammo sukdu ne.” (Kadit ketke ne it, Yefun Yesus jam ye gato bere bariwa jammo An bi sukdu-i si ye gato bere tepsu yeketut gato meret os wa gwat yeko ma wa but An.)

⁶⁵ Yefun Yesus ki o do, ”Nin deyo bariwa jammo Ji bi sukdu-i anato suga nyim Ji ki nai nin do, Ji bi Ai kak yé bi sukjimnut anato yé ne jammo Ji, ondeyo ye yo jammo Ji nde.”

⁶⁶ Sane su kam gane it, Yefun Yesus bi pakon mwa mu brek kadit An, pakon ne yo simo An o nde.

⁶⁷ Orete Yefun Yesus ndo mo An bi pakon ge musyu dik sop we ne do, ”Nin waii iwa mu kadit Ji dom bado?”

⁶⁸ Simon Petrus ki nai An do, ”Men mu mo je u o ne? Nan bi sukdu-i sor anato kak os wa men kem ndo to kapyo mato kapyo.

⁶⁹ Men onyar kem mo Nan it. Men jam do, Nan anato Ye gato Yefun Allah bes ete syogat ma more wa Nan ben An bi suk-i.”

⁷⁰ Yefun Yesus ki do, ”Sane, Ji anato bes nin tepsu Ji bi pakon ge musyu dik sop we fe? Sarewo nin ge dik yo tepsu biris.”

⁷¹ Yefun Yesus ki subot Yudas, gato Simon Iskariot bi pa anane. Kapre Yudas sok mo pakon ge musyu dik sop we ne, Yudas anato tepsu yeketut gato bere gwat os wa yeko ma but Yefun ne.