Wahyu 17 - Abun Scripture

Nggon gato ben siri mwa wai o re

¹ Malaikat ge dik kadit malaikat ge mufit gato jom mbem mufit ne ma ki nai ji do, ”Nan ma me nggon pasye gato ben siri mwa wai o re. Bere ji kadum sukye gato nggon ne ku nai nan me. Nggon ne tepsu kota sye gato ye nggo mo syur bok yo de.

² Yekwesu bok ne sino mo bur ré ben siri su nggon ne re. Nggon ne tik yetu mwa mo bur ré mit anato yé mwa ne iwa ben suk siri su nggon ne. Nggon ben sato syo nau nai yé mwa ne da, ete yé mwa ne yenau su.”

³ Orete Yefun Allah Gen pet mo ji, ete malaikat ne gwat ji mu mo nat gato kwe yo kom mo nde. Mone ji sokme nggon ge dik yo kem mo suge doketke gato kaim er te ne yu. Suge ne su mufit, suti musyu dik mó. Mo suge ne kaim ye krom gum bok yo mó. Sukdu gato ye krom mo suge kaim ne sino bi sukjimnut wa kabor Yefun Allah.

⁴ Nggon ne it san te si san er gato bi sugum sye. Ye mbrau nggon ne su emas e, jok gato bi sugum sye sisu mutiara. Nggon ne jom mok emas. Ben sato suksiri mwa gato ibit ndo nde sisu sukibit mwa neya gato nggon ne ben ne, ye sye tepsu syur mo mok ne ses. Nggon ne mit iwa da syur mo mok ne bu, nggon ne mit iwa sukibit kas petok sor.

⁵ Mo nggon ne git det ye krom mom gum mó. Mom gum bi sukjimnut ne, ji jam nde re, Yefun Allah gurik kadit men yetu sino re. Ye krom mo nggon git det ne sare do, ”Kota Babel gato ye bes gum kok, kota gato kadum os wa nggon anato nggon ben siri mwa mo peyo-peyo, sukibit mwa gato bor mo bur ré bi i-ke kem mo kota ne.”

⁶ Ji sokme nggon ne. Nggon ne ben sato da yé gato onyar kem mo Yefun Yesus ne dé, ete nggon ne yenau su. Yé gato ye gu kwop mo suk gato án ben tepsu Yesus Kristus mit ne, nggon ne ben sato da án dé, ete nggon ne yenau su. Ji sokme nggon ne sa, ji yeket ndo nde.

⁷ Orete malaikat gane ki nai ji do, ”Nan yeket wa suma ne? Nggon ne si suge doketke gato su mufit si suti musyu dik ne, nggon ne it mo suge ne yu ete mu sino. Suga nyim ye gurik sukdu subot nggon ne si suge ne, sarewo ré yo, ji ki rer nai nan jam it.

⁸ Suge doketke gato nan me ré, suga nyim sa, mbau, wo ré yo, yo mbau o nde. Bergan suge ne syesyar kadit kwoye sye mo bur desnak ne ma nim mo bur ré o. {Orete bere Yesus Kristus gu suge ne kwop wé,} suge ne bere ibit or re. Suga nyim sa, suge ne mbau, wo ré ne, yo mbau o nde, sarewo bere suge ne mbau satu o re. Sane anato yetu gato gum yo sok mo Yefun Allah bi Buku Yegesyos nde, bere yeket mone. Yefun fro Buku ne su kam gato An yo ut bur ré nde tó. Bere yé mwa gato kem mo bur ré, gato gum yo sok mo Buku ne nde yo, bere yé mwa ne yeket suge ne re.

⁹ Yé gato bi sukjimnut ko bere jam sukdu subot suge ne rer re. Suge su mufit ne tepsu bobuk mufit gato nggon ne kem mó. Suge su mufit ne tepsu yeraja ge mufit dom.

¹⁰ Yeraja ge mumek kwop wé re, ge dik yo jom nje su ré, ge dik yo o yo bor nde tó, wo bere an bor tó. Yeraja dowari ne do bor it yo, bere an jom nje wikgan sor re.

¹¹ Suge doketke gato suga nyim ne mbau, wo su ré yo mbau o nde, bere mbau satu o, ete ma tepsu yeraja kedomunggwo. Suge ne tepsu yeraja dik yo mo yeraja mufit ne dom. Bere Yesus Kristus gu an kwop wé, suge ne bere ibit re.

¹² Suge suti musyu dik ne tepsu yeraja ge musyu dik yo o gato yo jom yetu nde tó, sarewo yeraja ge musyu dik ne bere ku suktinggi wa jom yetu. Yeraja ge musyu dik ne si suge doketke ne sino jom yetu kom mo jam dik sor re.

¹³ Yeraja ge musyu dik ne bere ben suk su sukjimnut dik sor, bere yeraja ge musyu dik ne sino syo án bi suktinggi gato án jom nje su ne nai suge doketke ne.

¹⁴ Án si suge doketke ne sino bere es yeko futma wa gu Domba Gan, sarewo Domba Gan ne bere nggi wai kadit yeraja si suge ne o re, we Domba Gan ne anato Yekwesu gato nggi wai kadit yekwesu mwa ne sino. Domba Gan anato yeraja gato nggi wai kadit yeraja mwa ne sino. Domba Gan si bi rus-i gato An nai wa simo An pe sor, bere nggi wai kadit yeraja bok ne si suge doketke ne o re.”

¹⁵ Orete malaikat ne ki nai ji o do, ”Syur gato nan me ne, mo nat gato nggon gato ben siri mwa kem mone, wo syur bok ne anato tepsu yetu wisyo-wisyo e, yetu mwa mo buryo-buryo e, ayo-ayo e ne. {Nggon ne tepsu kota sye gato ye nggo mo syur bok ne de.}

¹⁶ Suge doketke si yeraja musyu dik gato nan sokme ne bere bariket nggon gato ben siri mwa ne. Bere án sino nai nggon ne bi suk mwa or wé kadit nggon ne, sane sor nggon ne kawarun. Bere án git nggon ne ku, ete syo bot git mom mukri ne wé.

¹⁷ Yeraja ge musyu dik ne ben suk su nggon sane, we Yefun Allah ben án bi sukjimnut sane sor án ben suk gato Yefun Allah fro wa án ben ne. Sane án ge musyu dik ne sino iwa syo án bi suktinggi wa án jom yetu su ne nai suge doketke ne, sane sor suk gato Yefun Allah ki ne bor re.

¹⁸ Nggon gato nan sokme anato tepsu kota sye gato nggi. Ben sato kota ne jom yeraja bok ne sino mo bur ré re.”