Matius 19 - Abun Scripture

Yefun Yesus bi sukduno subot yekra sombok kadit an bi nggon

¹ Yefun Yesus kibot suk bok ré, orete An mu kadit bur Galilea, ete An mu mo bur Yudea mo Syur Yordan deta.

² Yé mwa boribot An, ete An ben ye gato i ne ge.

³ Ye Farisi ge bok yo ma ku Yefun Yesus subere yé bok ne werwa meret os wa Yefun Yesus. Yé bok ne ndo mo Yefun Yesus do, ”Men simo Musa bi sukduno-i ne yo, yekra ku os wa an sombok an bi nggon wé tepsu pe gato an dakai imo bado?”

⁴ Yefun Yesus ki do, ”Musa duno men do, su ketke Yefun Allah ut yetu, Yefun Allah ut yebris, Yefun Allah ut nggon. Nin baca mó bado, nde tó e?

⁵ Yefun Allah duno men o do, ’Sane anato, yebris bere mu kadit an bi im si an bi ai, ete an si an bi nggon kem tepsu yetu ge dik sor, we ye we gato kra ne, an we tepsu dik it.’

⁶ An we yo tepsu yetu ge we o nde, wo an we tepsu dik it. Yefun Allah ben yebris si bi nggon tepsu dik, sane anato yetu sombok an we ne wé kadit yu nde.”

⁷ Ye Farisi ndo mo Yefun Yesus do, ”Sane, Musa duno men do, yekra gato iwa sombok an bi nggon wé ne yo, an krom mo surat do, an sombok an bi nggon wé it anare, orete an syogat nggon ne mu kadit an. Musa duno men sane wa suma ne?”

⁸ Yefun Yesus ki do, ”Musa misyar nin sombok nin bi nggon wé, we nin bariwa nin jammo sukduno gato ndo, nin onyar krat ware. Wo su ketke sane nde.

⁹ Ji ki sare do, ye gato sombok an bi nggon wé, wo nggon ne yo ben siri ses an mo nde, orete an kra nggon yi yo o it yo, an ben suk siri ses an bi nggon doketke anane.”

¹⁰ Sane Yefun Yesus bi pakon ki nai An do, ”Nan ki sukduno subot yebris si bi nggon gato an kra, sane it yo, sa ndo sa, men kra nde.”

¹¹ Yefun Yesus ki do, ”Yetu ge bok yo sor anato nggiwa an kra nde, sagato nin ki ne. Yefun Allah ben yé bok ne nggiwa sor.

¹² Án deyo kra nde, we án kaim yo tep wa sem su nggon nde kadit bi im kem su án ne it. Deyo o, yé tik koijo wé ete ben án kaim yo tepsu sem su nggon nde. Deyo o, dakai bariwa sem su nggon, subere án bi sukjimnut ne sye wa ben Yefun Allah bi suk-i. Ye gato nggiwa jom sukdu ré yo, ye ne jom ete benbot et.”

Yefun Yesus ak syim mo pa wokgan subere ri ma Yefun Allah ben sukndo su pa ne

¹³ Yetu ge bok yo gwat an bi pa wokgan ma mo Yefun Yesus subere Yefun Yesus ak syim mo pa ne, subere An benadi wa pa ne. Yefun Yesus bi pakon me yé gwat pa wokgan ne ma sa, pakon ne maskwa, pakon ndantom ye gato gwat pa wokgan ma ne.

¹⁴ Wo Yefun Yesus ki do, ”Nin misyar pa wokgan ma mo Ji sor, nin duyawa nde, we ye gato jammo Ji tepsu pa wokgan jammo bi ai, bere Yefun Allah jowa ye ne.”

¹⁵ Sane Yefun Yesus ak An syim mo pá bok ne sino, orete An mu kadit nat ne.

Pa yemsok gato bi suk mwa

¹⁶ Pa yemsok dik yo ma ku Yefun Yesus, ete pa ndo mo Yefun do, ”Yeguru, ji ben sukndo sato suma subere ji kem ndo to kapyo mato kapyo ne?”

¹⁷ Yefun Yesus ki do, ”Nan ndo Ji subot suk gato ndo ne wa suma ne? Yefun Allah sor ete ndo. Nan do iwa nan kem ndo to kapyo mato kapyo it yo, nan benbot An bi sukduno-i sor.”

¹⁸ Pa ne ndo do, ”Sukduno kwa u ne?” Yefun Yesus ki do, ”Nan gu ye yi kwop daret nde, nan ben siri daret nde, nan syimsi suk nde, nan ndak ye yi gum su sukkidar nde,

¹⁹ nan jammo nan bi ai si nan bi im, nan bi sukjimnut sye kas subot ye yi tepsu nan bi sukjimnut sye kas subot nan dakai et.”

²⁰ Pa yemsok ne ki do, ”Sukduno bok ne sino, ji benbot re, wo ji ben suma o ne?”

²¹ Yefun Yesus ki nai pa ne do, ”Nan iwa nan ben suk mwa ne ndo sino yo, nan mu nan so nan bi suk mwa gato nan ku ne, orete suk mwa ne bi sugum nan syo nai ye gato yo ku suk yo mo nde, sane bere nan ku suk mwa mo gu. Nan syo sugum ne nai ye gato yewa suk, orete nan ma simo Ji et.”

²² Pa yemsok ne jam sukdu gato Yefun Yesus ki ne sa, pa jimnutbot ndo nde. Pa mu kadit re, we pa bi sukjimnut sye mo an bi suk mwa ne.

²³ Sane Yefun Yesus ki nai bi pakon ne do, ”Suk gato Ji ki ré suksangge anare, ye gato bi suk mwa iwa an gum sok mo Yefun Allah bi rus-i ne yo, bergan os ne yé teker wa an re.

²⁴ Ji ki o sare do, te suge sye gato gum do unta sok ket sum parke wak mó bado, nde e? Yo sok mo nde, sukye teker ware. Sane dom yé gato bi suk mwa iwa án gum sok mo Yefun Allah bi rus-i yo, suk ne tepsu sukye teker wa án re.”

²⁵ Pakon jam sukdu ne sa, án yeket, án ndo do, ”Sane bere je u anato ku os wa sok mo Yefun Allah bi rus-i ne?”

²⁶ Yefun Yesus sokbot pakon ne, ete An ki do, ”Yetu yo bi os mo nde, wo Yefun Allah sa, bi os mó; mo suk mwa ne sino gato Yefun Allah iwa ben ne yo, Yefun nggiwa wai mó re.”

²⁷ Orete Petrus ki do, ”Men gare, men misyar men bi suk mwa gato men ku ne sino kem, ete men simo Nan, sane bere men ku suma ne?”

²⁸ Yefun Yesus ki nai bi pakon do, ”Suk gato Ji ki ré suksangge anare, kam sari ne ma ete suk mwa ne be ete Yetu bi Pa gum Yekwesu gato kok sye wai o re yo, bere nin ge musyu dik sop we gato simo Ji waii gum yekwesu dom. Bere nin ndobot ye Israel bi yewis ge musyu dik sop we mone.

²⁹ Yé mwa ne sino gato misyar bi nu e, bi nji e, bi nyanggon e, bi yenggras e, bi pa e, bi bur det e ne subere an mu ben Ji bi suk-i yo, bere Yefun Allah win suk mwa gato an misyar ne mu kom mo wam wotin dik yo, ete bere án kem ndo to kapyo mato kapyo.

³⁰ Wo yé mwa gato ben Ji bi suk-i nam, bere án ku suk wari, ete yé mwa gato ben Ji bi suk-i ne yo nam nde, bere án ku suk nyim.”