Lukas 6 - Abun Scripture

Ye ndobot ye Yahudi bi kam sye, kam Sabat

¹ Kam Sabat dik yo, ye Yahudi bi kam sye, ete Yefun Yesus si An bi pakon muket nggwe gandum mit. An bi pakon mubot nggwe ne saresa, pakon ne do gandum gro gato kom mone. Yefun Yesus bi pakon do gandum bo, án krut, orete án git.

² Ye Farisi deyo ki nai Yefun Yesus do, ”Suma ben anato nin ben suk su kam sye gato siri kadit men ye Yahudi bi sukduno-i ne?”

³ Yefun Yesus ki do, ”Suk gato yeraja Daud si yé gato sisu Daud ben sugato án sino on de ne te, nin baca mó bado, nde e?

⁴ Daud sok mo Yefun Allah bi nu, ete an si yé gato sisu an nai roti gato yé grem kwop wa som Yefun Allah mone. Daud git roti ne, sarewo suk gato an ben ne siri kadit men ye Yahudi bi sukduno-i, we men bi sukduno ki do, yesu gato ben suk mo Yefun Allah bi nu ne sor ete git roti ne. {Sarewo Yefun Allah yo maskwa Daud mo suk gato an ben ne nde.}”

⁵ Orge Yefun Yesus ki nai yé ne do, ”Yetu bi Pa to Ji ré gum Yekwesu wa kam Sabat, sane suk gato Ji ki ndo wa yetu ben su kam sye, kam Sabat ne, kem mone it.”

Ye gato syim deyo út

⁶ Kam Sabat dik yo o, ete Yefun Yesus sok mo ye Yahudi bi nu ari dik yo, orete An duno nje mone. Mo nu ari ne yetu ge dik yo gato syim ge út sok mone dom.

⁷ Ye Yahudi bi yeguru agama si ye Farisi mone, yé ne iwa meret os wa ki Yefun Yesus gum ibit mo suk gato An ben su kam Sabat ne. Sane yé ne sokwa Yefun Yesus pe, yé ne nut mo án syidem do, ”Te, Yefun Yesus ben ye yo ge su kam sye kam Sabat ne bado?” {Do Yefun Yesus ben ye ne ge yo, bere ye Farisi si yeguru ne ndak Yefun Yesus do, An ben suk siri kadit sukduno subot kam Sabat.}

⁸ Sarewo Yefun Yesus jam yé ne bi sukjimnut, sane An ki nai ye gato syim út ne do, ”Nan ma ti more, mo yé mwa gwem ré et.” Sane ye gato syim út ne ti, ete an ma ti mo yé mwa gwem.

⁹ Orete Yefun Yesus ndo mo yé mwa mone do, ”Te, men simo Yefun Allah bi sukduno sane yo, men ben suk sato suma su kam sye kam Sabat ne? Men ben suk gato ndo bado, men ben suk gato ibit e? Men nai nje kadit sukye bado, men gu nje kwop e?”

¹⁰ Yefun Yesus sokbot yé mwa mone, orete Yefun Yesus ki nai ye gato syim út ne do, ”Nan ron nan syim et!” Ye ne ron an syim sa, an syim gato út ne ndo satu.

¹¹ Yeguru agama si ye Farisi me suk gato Yefun Yesus ben mone sa, án on sa ndo nde. Sane án ki nai yu do, ”Men meret os sa u subere men ben sukye nai Ye ré ne?” Kadit kam gane, yeguru agama si ye Farisi meret os wa Yefun Yesus.

Yefun Yesus bes yerasul ge musyu dik sop we

¹² Kam dik yo o, Yefun Yesus mu it mo bobuk dik yo wa An ki suk su Yefun Allah mone. An ki suk su Yefun su noru ne sor, kom mo nombrak.

¹³ Nombrak ete An kendo An bi pakon ge bok yo ma mo An. Kadit yé mwa gato ma mo Yefun Yesus ne An bes yetu ge musyu dik sop we, gato An kendo gum do yerasul. {Yerasul bi sukjimnut do ye gato Yefun Yesus syogat mu wa ben An bi suk-i tepsu An mo bur ré.} Yerasul ge musyu dik sop we ne gum anare:

¹⁴ Simon gato Yefun Yesus syo gum dik yo do Petrus, sisu an bi nji Andreas, Yakobus sisu bi nji Yohanes, Filipus, Bartolomeus,

¹⁵ Matius, Tomas, Yakobus gato Alfeus bi pa, Simon gato sok mo yekweke,

¹⁶ Yudas gato Yakobus bi pa, si Yudas Iskariot gato ri ma meret os wa gwat yeko ma wa but Yefun Yesus.

Yefun Yesus duno nje, Yefun Yesus ben nje ge kadit bi suki

¹⁷ Orge Yefun Yesus si pakon ge musyu dik sop we ne is kadit bobuk mu kom mo bombras dik yo mone. Mo bombras ne, yé mwa gato simo Yefun Yesus si yé mwa kadit bur Yudea si kota Yerusalem si kota we mo sem de, tó kota Tirus si kota Sidon ne, yé mwa ne ma sum mone sino. Yé mwa yé re sum mone.

¹⁸ Yé mwa ma mone wa syaretwa Yefun Yesus bi sukdu. Án sino ma subere Yefun Yesus ben án ge kadit án bi suki dom. Ye gato semda bok nggwa mó, án ma dom, ete Yefun Yesus syun semda titi wé kadit án re.

¹⁹ Yé mwa mone werwa án rot Yefun Yesus, we án me Yefun Yesus bi suktinggi bor mone, án me Yefun Yesus ben yé mwa gato i ge kadit án bi suki ne.

Ye gato mit at si ye gato kwabom dek

²⁰ Yefun Yesus sokwa An bi pakon, orete An ki do, ”Nin yé gato yewa suk, nin mit at wa, we Yefun Allah anato nin bi Yekwesu gato mewa nin.

²¹ Nin yé gato on de su kam ré, nin mit at wa, we bere nin on ge mone tó. Nin yé gato wo su kam ré, nin mit at wa, we bere Yefun Allah ben nin sa o re.

²² Nin yé gato simo Yetu bi Pa to Ji ré, bere yé bariket nin, yé misyar nin, yé kabor nin, yé kiket nin gum ibit mone yo, nin mit at wa.

²³ Suga nyim tuya nin bi amui ben sukye nai yenabi saga bere nin ku ne dom. Sane yé do ben sukye sane nai nin it yo, sugane, nin wi nin ambre, we Yefun fro suk mwa gato ndo wa nin mo gu nim re.

²⁴ Sarewo nin yé gato ku suk mwa mo bur ré, nin kwabom dek wa sor, we bere suk mwa ne or kadit nin re, nin mit ndo mo suk mwa gato nin ku mo bur ré sor re.

²⁵ Nin yé gato bi sugit mwa su kam ré, nin kwabom dek wa sor, we bere nin on de mone tó. Nin yé gato sa su kam ré, nin kwabom dek wa sor, we bere nin wo mone tó.

²⁶ Nin yé gato yé mwa un ne, nin kwabom dek wa sor, we suga kam nyim tuya nin bi amui un yenabi gato kidar suk nggi dom, ete án sino ku sukye mone.”

Men ben sukndo su yeko gato ma wa gu men

²⁷ Yefun Yesus ki o do, ”Sarewo Ji ki nai nin gato syaretwa Ji bi sukdu sare do, nin ben sukndo su yeko gato ma wa gu nin, nin ben sukndo su ye gato bariket nin et.

²⁸ Nin ki suk su Yefun Allah subere Yefun ben sukndo su ye gato dufo mo nin. Nin ki suk su Yefun Allah subere Yefun ós ye gato ben sukye nai nin ne.

²⁹ Ye yo gwa nin kwanke yo, nin brek nin kwanke deyo o wa an gwa dom et. Ye yo nai nin bi sansun yo, nin misyar ye ne dakai nai nin bi san deyo dom et.

³⁰ Ye yo ndek suk mo nin yo, nin syo nai ye ne sor. Ye yo nai nin bi suk-i kadit nin it yo, nin mu syokom an syo suk ne satu nde.

³¹ Suk gato nin mit iwa ye yi ben su nin ne yo, nin ben suk sane su ye yi neya et.

³² Nin jimnotku ye gato jimnotku nin sor re, bere Yefun Allah syo sukndo nai nin wa suma ne? Ye gato jam nde Yefun, yé ne jimnotku ye gato jimnotku án dom fe!

³³ Nin ben sukndo mu nai ye gato ben sukndo ma nai nin sor re, bere Yefun Allah syo suk gato ndo nai nin wa suma ne? Ye gato jam nde Yefun ben bi suk-i sane dom.

³⁴ Nin syo nin bi suk nai ye gato bere bi nin satu sor re, bere Yefun Allah syo suk gato ndo nai nin wa suma ne? Ye gato jam nde Yefun, yé ne syo bi sugum nai yu dom, we án jam do, bere án ku sugum ne satu.

³⁵ Nin ben sukndo su ye gato ben sukndo su nin sor nde, wo nin jimnotku yeko gato ma wa gu nin, nin ben sukndo su ye gato bariwa nin ne dom et. Nin syo suk nai ye gato ndek suk mo nin sor. Bere ye ne syo suk ne satu o bado, yo syo nde yo, nin nutbot o nde. Sane, nin do ben sukndo su ye gato ben sukibit nai nin sane it yo, bere Yefun Allah syo suk mwa gato ndo nai nin, bere suk gato nin ben ne kadum do, nin anato Yefun Allah gato gum kok sye wai ne bi pá-i. Nin ben nin bi suk-i tepsu Yefun Allah ben ne, we Yefun Allah ben sukndo su ye gato ben sukibit si ye gato misyar An dom.

³⁶ Nin ben nin bi suk-i tepsu men bi Ai, Yefun Allah ben ne et! An yo ben suk su nin tepsu sukibit gato nin ben su An nde, wo An ben sukndo su nin sor. Sane dom ye yo ben sukibit su nin it yo, nin ben sukibit satu nde, wo nin ben sukndo su ye ne sor.”

Nin ki ye yi gum ibit nde

³⁷ ”Nin ki ye yi gum ibit nde, subere Yefun Allah yo ki nin gum ibit dom nde. Nin ki nai ye yi do ’Nan dakai bi sukibit kem pe mo nan,’ bere siri re, nin ki sane nde, wo nin do ki sane it yo, bere Yefun Allah waii ki nai nin do, nin bi sukibit kem pe mo nin dom re. Nin maskwa ye yi mo sukibit gato yé ne ben nai nin nde, nin nutbot o nde, subere Yefun Allah yo nutbot sukibit gato nin ben ne dom nde.

³⁸ Nin syo suk nai ye yi, sane bere Yefun Allah waii syo suk nai nin dom. Yé do ndek suk mo nin yo, nin syo wokgan nde, wo nin syo suk wai kadit yé ne ndek mo nin ne. Nin do ben sane it yo, bere Yefun Allah syo suk mwa nai nin, An syo suk mwa wai kadit suk gato nin mitmo ne. Nin bariwa ós ye yi yo, bere Yefun Allah waii bariwa ós nin. Nin syo suk mwa wa ós ye yi yo, bere Yefun Allah waii syo suk mwa nai nin.”

³⁹ Orge Yefun Yesus gwat sukamno sare do, ”Ye gato gro ndu gwat ye yi gato gro ndu bot os sa u ne? Ye gato gro ndu gwat ye yi gato gro ndu bot os yo, bere an we ne sino ges mo bur wak fe!

⁴⁰ Ye gato farkor yo jam suk wai kadit an bi yeguru nde. Yeguru duno ye ne sisu ndo yo, bere ye gato farkor ne ben an bi suk-i tepsu an bi yeguru ben an bi suk-i ne, bere ye gato farkor jam suk tepsu an bi yeguru ne.

⁴¹ Suma ben anato nin ki nin bi nji mo sukkwik wokgan mo an gro-i, sarewo nin misyar kwemuk gato yawa nin gro-i ne?

⁴² Nin ki nai nin bi nji do, ’Pa nji, ji kwa sukkwik kadit nan gro et.’ Sarewo kwemuk gato yawa nin dakai gro-i ne nin yo me nde wa suma ne? Nin tepsu ye gato ki suk su nin syokwet wik ko re go! Nin nai kwemuk ne wé kadit nin dakai gro-i et, subere nin gro-i rer, orete nin kwa sukkwik ne wé kadit nin bi nji gro-i ne.”

Kwe si i-bo

⁴³ ”Kwe gato kom ndo, bere yo bo ibit nde. Sane dom kwe gato kom ibit, bere yo bo ndo nde.

⁴⁴ Kwe mwa ne sino gato kom mo bur ré, men jam kwe ne ke kadit i-bo gato kom mo kwe ne. Kwe gato jak mwa mó, bere yo bo sato kwe ara bo-i nde. Es damen yo bo sato anggur bo-i nde.

⁴⁵ Men yetu tepsu kwe mwa ne dom. Ye gato mit si onyar kwo ndo, ye ne tepsu kwe gato kom ndo. Sane kadit sukndo mwa gato an sum mo an mit ne, suk gato an ki ne ndo dom. Wo ye gato mit si onyar ibit, ye ne tepsu kwe gato kom ibit. Kadit sukibit mwa gato an sum mo an mit ne, suk gato an ki ne ibit dom re. Suk gato men ki ne bere syesyar kadit men mit si men onyar fe!”

Ye we nggo bi nu, ye gato jam suk si ye gato jam nde suk

⁴⁶ ”Nin ki nai Ji do, ’Yenggras, Nan anato men bi Yekwesu,’ sarewo nin yo benbot suk gato Ji ki ne nde wa suma ne?

⁴⁷ Ye gato ma mo Ji, ete jammo Ji bi sukdu-i, orete benbot sukdu ne yo, ye ne ben an bi suk-i tepsu nje mo sukamno ré:

⁴⁸ Ye ne anato tepsu ye gato jam suk, ete an nggo an bi nu mo jok. An rom bur wak kru mu kom mo jok mo bur, ete an syut kwedi mo jok gato krat mone. Nu ne an nggo krat mo jok, sane syur syé do ma pet mo nu ne yo, nu ne yo e nde.

⁴⁹ Sarewo ye gato jam sukdu gato Ji ki ré, ete an yo benbot nde yo, ye ne tepsu ye gato jam nde suk, ete an nggo an bi nu mo bur sor re, nu ne yo krat nde. Sane syur syé do ma pet mo nu ne yo, nu ne e gwa mo bur sor, ete syur gu mu re, nu ne ibit or re.”