Lukas 4 - Abun Scripture

Biris bi yekwesu meret os wa Yefun Yesus

¹ Yefun Yesus satu ma kadit Syur Yordan saresa, Yefun Allah Gen bok nggwa mo An, ete Yefun Allah Gen gwat Yefun Yesus mu mo pe gato kwe yo kom mo nde.

² Yefun Yesus mu kom mone sa, biris bi yekwesu meret os wa Yefun Yesus, subere Yefun ben suk siri kadit Yefun Allah bi os-i mone. Noru musyu at, kam musyu at, biris bi yekwesu ne meret os wa Yefun Yesus ware, Yefun Yesus yo ges mo os ibit mone nde. Kam bok ne Yefun Yesus yo git sugit yo mo nde. Kom mo rut sa, An on de ndo nde.

³ Biris bi yekwesu ki nai Yefun Yesus do, ”Nan tepsu Yefun Allah bi Gan sangge it yo, Nan syogat jok ré tepsu roti wa Nan git et.”

⁴ Sane Yefun Yesus ki nai biris bi yekwesu ne do, ”Mo Yefun Allah bi sukdu, ye krom do, ’Men yetu git sugit sor, bere men yo kem ndo nde.’ ”

⁵ Orge biris bi yekwesu gwat Yefun Yesus mu mo pe gato kok. Biris bi yekwesu ne kadum pe mwa ne sino mo bur ré nai Yefun Yesus me, tepsu Yefun Yesus me or sino sare ya sor re.

⁶ Biris bi yekwesu kadum pe mwa ne sa, an ki nai Yefun Yesus do, ”Suk mwa gato ji jowa ré, bere ji syo dakai or wa Nan. Yé mwa gato kem mo pe mwa mo bur ré sino, suk mwa gato ndo mo bur ré sino, bere ji syo nai Nan wa Nan jom or re. Suk mwa ré sino sok mo ji, sane ji waii syo nai ye gato ji iwa.

⁷ Nan do bi Nan nggwa mo ji, Nan bes ji gum kok yo, bere ji syo suk mwa ré or sino mo Nan.”

⁸ Sane Yefun Yesus ki nai an do, ”Ye krom mo Yefun Allah bi sukdu do, ’Men bes men bi Yekwesu Yefun Allah ne gum kok et, men ben An bi suk-i sor re.’ ”

⁹ Orete biris bi yekwesu gwat Yefun Yesus mu mo Yerusalem, orge an grem Yefun Yesus ti kok mo Yefun Allah bi nu yu. An we ti mone sa, biris bi yekwesu ki nai Yefun Yesus do, ”Nan anato tepsu Yefun Allah bi Gan, sangge it yo, Nan bare Nan nggwa kadit ré mu bur et,

¹⁰ we ye krom mo Yefun Allah bi sukdu do, ’Yefun Allah syogat An bi malaikat mewa Nan. Bere malaikat mwa ma mewa Nan sisu ndo.

¹¹ Malaikat ne bes án syim wa bur wa Nan, subere jok yo wai Nan gwes nde.’ ”

¹² Sane Yefun Yesus ki nai biris bi yekwesu do, ”Mo Yefun Allah bi sukdu, ye krom o do, ’Men werwa men bi Yekwesu Yefun Allah kadum An bi suktinggi daret nde.’ ”

¹³ Biris bi yekwesu ne meret os wa Yefun Yesus ware, Yefun Yesus yo ben suk siri kadit Yefun Allah bi os-i mone nde. Sane biris bi yekwesu werwa meret os wa Yefun, orete an mu kadit Yefun Yesus re, an eswa bi kam-i gato ndo wa an meret os wa Yefun o et.

Yefun Yesus mu duno nje mo bur Galilea

¹⁴ Orge Yefun Yesus satu mu mo bur Galilea. Yefun Yesus mu kom mo Galilea sa, Yefun Allah Gen ben An nggiwa ben suk mwa. Sukdu subot suk gato Yefun Yesus ben ré, yé ki frekbot pe mwa mone sino.

¹⁵ Yefun Yesus duno nje mo ye Yahudi bi nu ari mo bur Galilea ne, ete yé mwa ne sino un An mo suk gato An ben ne.

Ye Nazaret bariket Yefun Yesus

¹⁶ Yefun Yesus mu mo An bi nat-i gato An sye mó, mo kota Nazaret. Kam Sabat, ye Yahudi bi kam sye ne, Yefun Yesus sok ari mo ye Yahudi bi nu ari sagana An ben ne. Mo nu ari mit ne, Yefun Yesus ti wa An baca Yefun Allah bi sukdu sa,

¹⁷ yetu ge dik yo syo yenabi Yesaya bi buku nai Yefun Yesus wa An baca mone. Yefun Yesus kak buku ne sa, An ku sukdu gato Yesaya krom sare do,

¹⁸ ”Yefun Allah Gen bok nggwa mo Ji, we Yefun Allah bes Ji wa Ji ki subot An bi suktaru gato ndo nai ye gato yewa suk jam An bi sukdu ne. An syogat Ji ma wa Ji ki nai yé gato ye rai ne do, ’Ji sombok nin wé kadit sukibit gato jom nin ne it!’ An syogat Ji ma wa Ji ós ye gato gro ndu, subere Ji ben án gro ndo satu. An syogat Ji ma wa Ji nai ye gato ku sukye wé kadit sukye ne subere án kem ndo satu.

¹⁹ An syogat Ji ma wa Ji ki nai nje do, Yefun Allah fro os ndo wa nai men wé kadit sukye it anare.” {Sane Yefun Yesus baca sukdu ne nai yé mwa mone jam.}

²⁰ Yefun Yesus rum buku ne satu or, An syo satu nai yesu mo nu ari ne, orete An kem satu subere An duno nje mone. Yé mwa mo nu ari mit ne sokwa An pe, yé mwa eswa Yefun Yesus ki bi sukdu-i.

²¹ Yefun Yesus kem mone sa, An ki do, ”Yefun Allah bi sukdu gato Ji baca wa nin jam ne bor mo Ji sugato nin jam sukdu ne it.”

²² Yé mwa mone sino un Yefun Yesus gum. Yé mwa mone yeket Yefun Yesus mo An bi sukdu ne. Yé ne ki do, ”An ki An bi sukdu-i ndo wai o re.” Orete yé ne ndo mo yu do, ”Ye gare te, An anato Yusuf bi gan, fe? {Ben sa u anato An ki An bi sukdu-i ndo teker sare ne?}”

²³ Yé mwa yeket Yefun Yesus mone, sane Yefun Yesus ki nai yé mwa ne do, ”Ji jam do, bere nin ki sukamno dik yo nai Ji sare do, ’Yewon bam, nan dakai kwa nan dakai ge sor.’ Sane suk gato men jam ye nukbot mo Kapernaum ne gato ben yé yeket mone, Nan waii ben mo Nan bi nat-i more dom et.”

²⁴ Yefun Yesus ki o do, ”Suk gato Ji ki ré suksangge anare, yenabi gato ki Yefun Allah bi suktaru nai nje mo an dakai bi nat-i yo, bere yé mone bariwa jammo an re.

²⁵ Nin jammo suk gato Ji ki ré et, tepsu kam nyim tuya Elisa kem mo bur Israel ré tó, nggonna mwa kem mone, wo an yo mu ku nggonna mwa ne nde. Sugane nokro, no yo gi mo nde mu kom mo tahun gri nap. Orge sukonde sye ben nje mwa mone.

²⁶ Sarewo Yefun Allah yo syogat Elisa mu ós nggonna mwa ne nde, wo Yefun Allah syogat Elisa mu ós nggonna dik yo mo kota Sarfat mo bur Sidon, mo yewis yi bi nat-i.

²⁷ Sane dom Elisa kem mo bur Israel tó, suki borbuk git yé mwa mo bur Israel ne. Sarewo Elisa yo ben yé mwa ne ge nde re, yetu ge dik dom nde re, wo Elisa ben Naaman ge sor re. Naaman sok mo yewis yi, an ye Siria.”

²⁸ Yé mwa gato mo nu ari mit jam Yefun Yesus bi sukdu subot yewis yi sa, yé mwa mone maskwa ndo nde.

²⁹ Yé ne ti ma, ete án syun Yefun Yesus kadit án bi kota. Yé mwa ne gwat Yefun Yesus mu mo bobuk yu, bobuk gato án nggo án bi kota mone. Yé gwat Yefun Yesus mo bobuk ne yu sa, yé mwa bi sukjimnut do án bam Yefun Yesus mo kwoye ne mu bur.

³⁰ Sarewo Yefun Yesus brek mu kadit án. Yefun Yesus mubot yé mwa miten ne, orete An mu kadit yé mwa ne re.

Sukdu subot ye gato semda ben ne

³¹ Orete Yefun Yesus mu mo kota Kapernaum mo bur Galilea. Ye Yahudi bi kam sye, kam Sabat, ete Yefun Yesus duno nje mone.

³² Yé bok yo gato jam sukdu ne, án yeket Yefun Yesus, we Yefun Yesus ki bi sukdu-i ne tepsu Yefun Allah dakai ki bi sukdu-i ne, Yefun Yesus ki bi sukdu-i ne pet mo nje. Yé mone iwa jammo Yefun Yesus bi sukdu-i ne sor.

³³ Mo ye Yahudi bi nu ari ne, yetu ge dik yo gato semda ben sok ari si yé mwa mone. Yefun Yesus duno nje mo nu ari mit ne saresa, ye gato semda ben ne saiye nai Yefun Yesus sare do,

³⁴ ”Ei! Yesus, ye Nazaret, Nan ma more wa suma ne? Te Nan ma more wa Nan gu men e? Ji jam do Yefun Allah fro Nan ma mo bur ré wa Nan gwat Yefun Allah bi suktaru.”

³⁵ Sane, Yefun Yesus ndantom semda ne do, ”Nan not se! Nan titi wé kadit ye ne tom!” Yefun Yesus ndantom semda ne sa, semda am ye ne ges gwa mo bur mo yé mwa gwem, orete semda titi wé kadit ye ne. Semda ne titi wé sa, semda yo gu ye ne kaim yó nde re.

³⁶ Yé mwa mone me suk gato Yefun Yesus ben ne, án yeket, án nutbot ndo nde, ete án ki nai yu do, ”Bei! Suma ré ne? Sukduno be yo bado? Ye gare ki bi sukdu-i pet mo nje it. Ye gare bi suktinggi nggi wai kadit semda dom. Ye gare syokom semda yo, semda jammo An, ete titi kekro.”

³⁷ Sane yé mwa ki sukdu subot suk gato Yefun Yesus ben ne mu frekbot peyo-peyo mone sino.

Yefun Yesus ben yé mwa ge kadit án bi suki

³⁸ Yefun Yesus mu kadit ye Yahudi bi nu ari sa, An mu mo Simon bi nu. Yefun Yesus do mu kom mo Simon bi nu sa, ye ki nai An do, ”Simon bi om ne i, mom kaim kam teker. Nan ma, Nan ós nggongras ne et.”

³⁹ Sane Yefun Yesus mu me nggongras mo pe gato mom sem mone. Yefun Yesus tibot nggongras ne, ete Yefun Yesus syogat suki ne sombok wé kadit nggongras. Yefun Yesus ki bi sukdu-i sa, nggongras kaim dek satu re. Nggongras ne ge re, sane mom sun, mom gwat sugit si syur wa nje mone git.

⁴⁰ Kam bok, ndendu re, yé mwa gwat ye gato i su suki wis bok yo ma mo Yefun Yesus. Sane Yefun Yesus ak An syim mo ye gato i ne kadik-kadik, orge yé mwa ne sino ge kadit án bi suki re.

⁴¹ Yé mwa gato semda ben ne dom, semda gane titi wé kadit yé mwa ne. Semda ne titi wé saresa, semda saiye do, ”Nan anato Yefun Allah bi Gan.” Sarewo Yefun Yesus ndantom semda ne. Yefun Yesus duyawa semda ne do, ”Nin du o nde,” we semda ne jam do, Yefun Yesus anato Yekwesu gato Yefun Allah syogat ma mo bur ré wa nai men yetu kadit sukye ete jowa men.

Yefun Yesus kibot Yefun Allah bi suktaru mo ye Yahudi bi nu ari

⁴² Nyotkwo re, ete Yefun Yesus mu nden kadit kota mu mo pe gato nje yo mo nde. Yefun Yesus mu mo nden sa, yé mwa meret An. Yé mwa ne do ku Yefun Yesus sa, yé mwa ne werwa Yefun Yesus subere Yefun si án kem mo án bi kota ne yei.

⁴³ Sarewo Yefun Yesus ki nai yé ne do, ”Ji mu mo nat yi wa Ji ki sukdu subot os ndo gato Yefun Allah fro wa nai yetu gum sok mo An bi rus-i, ete An tepsu yé bi Yekwesu mone. Yefun Allah syogat Ji ma mo bur ré wa Ji mu kibot sukdu ne, sane Ji mu wa Ji kibot mo kota yi neya dom it anare.”

⁴⁴ Sane Yefun Yesus mu kadit pe ne. Yefun Yesus mubot bur Yudea, ete An ki sukdu subot os ndo ne mo ye Yahudi bi nu ari bok ne sino mone.