Lukas 10 - Abun Scripture

Yefun Yesus syogat pakon ge musyu mufit mu ben An bi suk-i

¹ Orete Yefun Yesus bes yetu ge musyu mufit o wa án mu ben Yefun bi suk-i. Yefun Yesus syogat pakon ne gewe-gewe mu nyim mo kota si nat mwa gato bere Yefun Yesus mu mone sino.

² Pakon ne yo mu nde tó, Yefun Yesus ki nai án do, ”Yé mwa ne tepsu sugit mwa gato kri mo nggwe, sarewo ye gato fro wa nai sugit ne yo tep nde. Sane nin ki suk su ye gato bi nggwe ne subere An syogat yé bok yo o waii mu nai sugit ne. {Yetu mwa fro ndek wa jammo Ji, sarewo ye gato mu ki Ji bi sukdu-i nai yé mwa ne yo tep nde. Sane nin ki suk su Yefun Allah subere Yefun syogat yé bok yo o waii mu kibot Ji bi sukdu-i subere kar yé mwa ne sok mo Yefun bi rus-i et.}

³ Nin mu tom! Ji syogat nin mu. Nin tepsu jot gan gato mu mo pe gato ndar krok mwa mó.

⁴ Nin mu it yo, nin gwat sugum nde. Nin gwat yu su sugit nde. Nin gwat sandal nde. Nin mu, nin ku nje mo os mit, nin nuk sukdu su dom nde.

⁵ Nin mu ré, nin kom mo pe dik yo, ete nin sok mo ye yo bi nu mone yo, nin ki do, ’Yefun Allah ete uttok nin mo nu re.’

⁶ Ye to iwa nin si an kem not mo an bi nu yo, nin si an kem not mo nu ne. Bere Yefun uttok ye gato bi nu ne, wo ye gato bi nu ne bariwa nin si an kem not mone yo, nin was sukdu gato nin ki ne wé kadit an, we bere Yefun yo uttok ye ne nde.

⁷ Sane nin kem mo nu dik ne sor, sugit to yé fro wa nin git mone, nin git sor. Syur to yé gwat wa nin da mone, nin da sor, we ye gato ben suk, bere ye syo suk nai an tepsu an bi kamba mone. Nin kem mo nu dik ne sor. Nin mu sem mo nu yi neya nde.

⁸ Nin mu kom mo kota dik yo, ete yé mone do kak yé mit wa nin ma it yo, suk to yé fro wa nin git, nin git sor.

⁹ Ye gato i mone, nin ben yé ne ge, ete nin ki nai nje mone do, ’Yefun Allah ma wa An jowa nin tepsu nin bi Yekwesu it anare!’

¹⁰ Sarewo nin mu kom mo kota dik yo, ete yé mone do bariwa nin it yo, nin mu mo os sye mo kota mit, ete nin ki sare do,

¹¹ ’Nin bariwa wa men, sane bofuf kadit os ré gato út mo men gwes, bofuf ne men ndot ges wé kadit men gwes tak re, subere nin jam do, nin ben sukibit nai men re. Kapre nin ben sukibit nai men, nin jammo sukdu gato men ki ré et, Yefun Allah ma wa An jowa nin tepsu nin bi Yekwesu it anare!’

¹² Ji ki sare do, su kam gato bere Yefun Allah ma ndobot yetu mo bur ré sino, yé mo kota ne bere ku sukye wai kadit yé mo kota Sodom gato Yefun Allah syo bot git wé mo sukibit gato nje mone ben ne. {We sare, yé mo kota ne bariwa Ji bi pakon gato Ji syogat mu ki Ji bi suktaru ne}.”

Yetu mo kota bok yo gato bariwa jammo Yefun Yesus

¹³ Yefun Yesus kiket nje mone do, ”Ji ben ye gato i mo kota Korazim si kota Betsaida ne ge re, Ji syun semda titi wé kadit nje mone dom, sarewo yé yo kwet kadit sukibit gato yé ben ne nde. Sane bere Yefun Allah ben sukye nai nje mo kota we ne, we Ji do ben suk mwa gato ben yé yeket mo kota Tirus si kota Sidon yo, bergan sor ete yé mone kwet kadit sukibit gato yé ben ne kekro, orete án it san gato te, ete án krer bofuf mo án su subere yé jam do, án kwet kadit sukibit ne it.

¹⁴ Sarewo su kam gato bere Yefun Allah ma ndobot yetu mo bur ré sino, nin yé gato kem mo kota Korazim si kota Betsaida, bere nin ku sukye wai kadit yé mo kota Tirus si Sidon o re.

¹⁵ Sane dom, nin yé gato kem mo kota Kapernaum, bere yé bes nin gum kok wai kadit nje mo kota yi neya bado? Sane nde, bere Yefun Allah bare nin mo bot gesyos.”

¹⁶ Orge Yefun Yesus ki nai An bi pakon do, ”Ye gato jammo sukdu gato nin ki ne yo, tepsu ye ne jammo sukdu gato Ji ki ne dom. Ye gato bariwa nin bi sukdu-i yo, tepsu ye ne bariwa Ji bi sukdu-i dom. Sarewo ye gato bariwa Ji yo, tepsu ye ne bariwa Yefun Allah gato syogat Ji ma mo bur ré.” {Yefun Yesus ki An bi sukdu nai An bi pakon or, pakon ge musyu mufit ne mu re.}

Yefun Yesus bi pakon ge musyu mufit satu ma ku An

¹⁷ Yefun Yesus bi pakon ge musyu mufit satu ma sa, pakon ne mit ndo wai o re. Án ki do, ”Yenggras, men ki gum su Nan gum nai ye gato semda ben it yo, semda ne jammo men, semda ne nyu, ete titi or re.”

¹⁸ Yefun Yesus ki do, ”Ji jam re. Ji me biris bi yekwesu ges kadit gu tepsu nowarek re. {Semda sok mo biris bi yekwesu bi rus-i, sane semda jammo nin anato yekwesu ne ges kadit gu re.}

¹⁹ Ji syo suktinggi nai nin mó re. Kapre nin yakos kwis e, wi e ne, suk ne yo gu nin kwop nde. Ji syo suktinggi nai nin subere nin nggi wai kadit biris bi yekwesu o re. Biris bi yekwesu ne yo ku os wa ben nin ibit nde.

²⁰ Semda da jammo nin ete titi, sarewo nin mit at teker mone sor nde, wo ndo sa, nin mit at wa Yefun Allah krom nin gum mo An bi rus-i mo gu re.”

Yefun Yesus mit at ndo nde

²¹ Sugane Yefun Yesus mit at ndo nde, we Yefun Allah Gen pet mo An, ete Yefun Yesus ki nai Yefun Allah do, ”Ji bi Ai, Nan anato Yekwesu mo gu nim ne si bur ré, Ji ki ndo mo Nan, we Nan gurik sukdu gato Ji ki ne bi sukjimnut-i kadit yepasye gato jam suk mwa, ete Nan kadum sukjimnut ne nai ye gato ben nggwa sato pa wokgan. Ji bi Ai, Nan ben suk tepsu Nan mit anato Ji ki ndo mo Nan ne.” {Yefun Yesus ki suk su An bi Ai, orete An ki nai nje mone do:}

²² ”Ji bi Ai mo gu syo suk mwa ne sino gato Ji mitmo nai Ji subere Ji tepsu Yekwesu mo Yefun Allah bi rus-i. Yefun Allah sor anato jam An bi Gan to Ji ré, yetu jam nde. Ji dakai sor anato jam Yefun Allah, Ji bi Ai, kom mo mit, yetu jam nde. Sarewo ye gato Ji iwa Ji kadum Ji bi Ai nai ne, bere ye ne jam Ji bi Ai dom.”

²³ Orge Yefun Yesus brek ma sokme An bi pakon ne wadigan, ete Yefun Yesus ki nai An bi pakon do, ”Nin sa, nin me suk gato ndo, nin me suk gato ben yé yeket su nin gro re.

²⁴ Ji ki sare do, yenabi si yepasye bok ne sino, suga nyim neya án mit iwa me suk gato nin me su ré, sarewo án yo me nde; án mit iwa jam suk gato nin jam su ré ne, sarewo án jam nde re.”

Sukamno subot ye Samaria gato ben sukndo

²⁵ Orete yeguru agama ge dik yo gato owa duno nje su Musa bi sukduno-i ne meret os wa Yefun Yesus. An ma ti mo Yefun Yesus gwem, ete an ndo mo Yefun Yesus do, ”Yeguru, ji ben suma subere ji kem ndo to kapyo mato kapyo ne?”

²⁶ Yefun Yesus ki nai ye ne do, ”Mo Yefun bi sukdu, ye krom sukdu sa u subot suk gato men ben subere men mbau to kapyo mato kapyo ne? Nan bi sukjimnut sa u ne?”

²⁷ Yeguru agama ne ki do, ”Men bi sukjimnut sye kas subot Yefun Allah, Ye gato gesyos gato jom men ne et. Men bi men nggwa wa men ben An bi suk-i sisu men mit dik, men onyar dik, men bi sukjimnut dik et. Men bi sukjimnut sye kas subot ye yi tepsu men bi sukjimnut sye kas subot men dakai et.”

²⁸ Yefun Yesus ki do, ”Nan bi sukdu ne sangge. Nan benbot sor, subere nan kem ndo to kapyo mato kapyo.”

²⁹ Yeguru ne bariwa an damen mo yé mwa gwem, sane an waii ndo mo Yefun Yesus o do, ”Je u anato gum do, ’ye yi’ gato ji bi sukjimnut sye kas subot ne?”

³⁰ Sane, Yefun Yesus gwat sukamno dik yo do, ”Yetu ge dik yo mu kadit Yerusalem mu mo Yerikho. Ye ne mu kom mo os miten sa, yegitsi ge bok yo ma gu ye ne sane sor karowa an kwop rok. Yegitsi ne nai an bi san si an bi suk mwa ne sino, ete yegitsi misyar an kem mo os mit, yé ne mu kadit an re.

³¹ Yegitsi ne mu re, orete yesu ge dik yo gato ben suk mo Yefun Allah bi nu muket os ne. Yesu ne me ye ne mo os mit sa, yesu mu brekbot os de kadit, ete yesu ne mu re.

³² Sane dom, ye Lewi ge dik yo waii muket os ne o. An me ye ne sa, an ma, an sokbot, sarewo an brekbot os de kadit, ete an mu re.

³³ Ye Samaria ge dik yo waii muket os ne saresa, an mu kom mo pe gato ye ne sem mo. Ye Samaria do sokbot ye ne sa, an jimnotku ye ne. Ye Samaria iwa ós ye gato yegitsi gu ne.

³⁴ Sane, ye Samaria ma karowa ye ne. Ye Samaria syé manik si nau anggur mo ye ne wip, ete an far san det bot wip ne. Orete ye Samaria bes ye ne mo an bi keledai yu, an gwat mu mo nu pos. Ye Samaria mewa ye ne mo nu ne.

³⁵ Ik o, ye Samaria ré nai sugum det we, ete an syo nai ye gato mewa nu pos ne. Ye Samaria syo sugum ne saresa, an ki do, ’Nan mewa ye ré, ete sugum ré yo tep nde yo, bere ji satu ma, ete ji bi napta ne o.’ ”

³⁶ Orge Yefun Yesus ki nai yeguru ne do, ”Nan nutbot yetu ka gri ne te, je u anato ben bi suk-i tepsu ye gato bi sukjimnut sye kas subot ye yi gato yegitsi gu ne?”

³⁷ Yeguru ne ki do, ”Ye gato dakai jimnotku ye gato ku sukye ne.” Sane Yefun Yesus ki nai an do, ”Nan mu, nan bi sukjimnut sye waii kas subot ye yi ga sane et.”

Yefun Yesus mu me Marta si Maria

³⁸ Orge Yefun Yesus si An bi pakon mu o. Án mu kom mo kampung dik yo mo os mit sa, nggon dik yo gato gum do Marta kendo Yefun Yesus ma mo bi nu-i.

³⁹ Marta bi njim dik yo gum do Maria. Yefun Yesus ma mo nu ne sa, Maria kem ga mo bur mo Yefun Yesus gwem. Maria syaretwa sukduno gato Yefun Yesus duno mom su ne.

⁴⁰ Sarewo Marta jimnutbot suk mwa gato mom fro wa yekam gato ma ne. Sane Marta ma ku Yefun Yesus, mom ki do, ”Yenggras, Nan me ji bi njim misyar ji wadigan ben suk mwa ré, wo Nan yo syogat ji bi njim ma ós ji nde wa suma ne? Nan syogat Maria ma ós ji et.”

⁴¹ Yefun Yesus ki do, ”Marta, nan jimnutbot suk mwa ré teker eta,

⁴² wo suk dik sor anato ndo wa men yetu ben ne. Maria ré nai sukjimnut wa mom ben suk gato ndo ne, mom syaretwa Ji bi sukdu-i ne, kadit mom fro suk mwa neya, sane Ji duyawa mom mone nde.”