फिलिप्पियां 3 - बिलासपुरी नौआं नियमसच्ची धार्मिकता 1 इस खातर मेरे साथी विश्वासियो, प्रभु च मौज मनान्दे रौआ। तुहांजो भीं बार-बार तिन्हांई गल्लां जो लिखदे रैहणे ते मिन्जो कोई दुख नीं हुन्दा काँह्भई येई गल्लां तुहौं झूट्ठे शिक्षकां ते सुरक्षित रख गियां। 2 सै बुरै लोक सै जे कुत्तयां साई ये तिन्हांते सावधान रौआ, काँह्भई सै लोक बुरा काम्म कराँ ये कने मर्दां रा खतना करने पर जोर दें। 3 काँह्भई सच्चे खतने औल़े माहणु त अहें सै जे परमेशरा रिया आत्मा री अगवाईया ते अराधना कराँ ये कने मसीह यीशुये पर गर्व कराँ ये, कने अपणिया मेहणता पर भरोसा नीं रखदे। 4 पर हऊँ त अपणिया मेहणता पर बी भरोसा करी सक्कां। जे कोई होर अपणिया मेहणता पर भरोसा रखणे खातर सोच्चे तां हऊँ तिसते बी बधीने भरोसा रखी सक्कां। 5 ताहली जे हऊँ अट्ठां दिनां रा था, मेरा खतना हुया था। हऊँ इस्राएली लोकां चते आ, हऊँ बिन्यामीन रे गोत्रा रा; मेरे माता-पिता इब्रानी थे तां हऊँ बी इक इब्रानी आ; इक फरीसिये साई मैं मूसा री व्यवस्था रा ध्याना ने पालन कित्तिरा। 6 हऊँ इतणा बफादार था भई मैं मसीह विश्वासियां जो बौहत सताया, कने यहूदी व्यवस्था रा पालन करने च हऊँ धर्मी था काँह्भई मैं सारे हुक्मां रा पालन कित्या। 7 पर तिन्हां चीजां जो जे मैं पैहले बौहत कीमती समझया था, हुण हऊँ तिन्हां चीजां जो मसीह रिया वजह ने बौहत बेकार समझां। 8 होर बी जादा, हऊँ समझां भई तिस सब्बीं किजि री कोई कीमत नीं काँह्भई ताहली जे हऊँ इसरी तुलना जादा कीमता ने कराँ सै जे यीशु मसीह जो मेरा प्रभु बोलीने जाणना। तिसरिया वजह ने हऊँ सब किछ त्यागी चुक्कीरा कने हऊँ तिन्हांजो कूड़ा समझां ताकि हऊँ मसीह रा हुई सक्कूँ। 9 कने हऊँ तिस सौगी पूरी तरह ते इक हुई सक्कूं; कने ये इस खातर नींआ भई मैं व्यवस्था रा पालन कित्या तां परमेशर मेरे धर्मी हुणे री घोषणा कराँ, पर ये मसीह च विश्वास करने रिया वजह ते आ, कने सिर्फ मेरे मसीह च विश्वास करने रिया वजह नेई परमेशरे ये घोषणा कित्ती भई हऊँ धर्मी आ। 10 हऊँ मसीह जो जाणना चाँह कने तिसा सामर्था जो महसूस करना चाँह तिसे जे मसीह जो मूईरयां चते जिऊंदा कित्या। तिने सै जे दुख सैया हऊँ बी तेढ़ा इ दुख सैईने तिसरा सहभागी हूणा चाँह, कने तियां जे सै मरया तियां इ हऊँ बी मरना चाँह। 11 ताकि परमेशर मेरिया मौती ते बाद मिन्जो भीं ते जिऊंदा करगा। मकसदा रे पासे बधदे जाणा 12 हऊँ ये दावा नीं कराँ भई ये सब हऊँ पैहले तेई करी चुक्कीरा या हऊँ पूरा इ सिद्ध हुई चुक्कीरा। पर हऊँ मसीह साई बणने रे खातर बौहत कोशिश करीराँ, तिसरे खातर जे तिने मिन्जो चुणीरा। 13 मेरे साथी विश्वासियो, हऊँ ये दावा नीं करदा भई हऊँ तिसजो पाई चुक्कीरा, पर इक काम्म तिस्सो जे हऊँ कराँ भई अतीत रे बारे च भुल्लीने भविष्य पर ध्यान देआं। 14 तां हऊँ ईनाम जितने रे खातर सिधा मकसदा रिया तरफा दौड़ां, सै जे अनन्त जीवना रे खातर यीशु मसीह रे जरिये मिन्जो परमेशरा रा बुलावा। 15 ताकि तिन्हां लोकां जो, सै जे अहां चते आत्मिक तौर पर परिपक्व ये, इस तरिके ने सोचणा चाहिन्दा, पर जे तुहां चते कोई बी इसते अलग सोच्चां, तां परमेशर तिसजो समझणे च तुहांरी मदद करगा। 16 इस खातर अहांजो सच्चाईया रे मुतावक जीणा चाहिन्दा तिस्सो जे परमेशरे अहां पर पैहले तेई परगट करी तरा। 17 प्यारे साथी विश्वासियो, तुहें सारे मिलीने मेरे साई जीवन जिऊआ, कने तिन्हां लोकां रा बी ध्यान रखा सै जे मेरे व्यवहारा साई व्यवहार कराँ ये कने तिन्हांरा अनुशरण करा। 18 काँह्भई बौहत लोक येढ़ि चाल चलां ये तिन्हांरी चर्चा जे मैं तुहांजो बार-बार कित्ती कने हुण बी रोई-रोई ने कराँ भई सै अपणे चाल-चलना ते मसीह रे क्रूसा रे दुश्मण ये। 19 अन्त च परमेशरा तिन्हांरा नाश करना, सै लोक सिर्फ अपणी शारीरिक इच्छां जो पूरा करने रे खातर जीआं ये, कने सै अपणी बेशर्म गल्लां पर घमण्ड कराँ ये कने संसारा रिया चीजां पर मन लाई रखां ये। 20 पर अहांरी नागरिकता स्वर्गा ची, कने तित्थी तेई अहें अपणे छुटकारा देणे औल़े प्रभु यीशु मसीह रे औणे रा बेसब्रिया ने इन्तजार कराँ ये। 21 अपणी तिसा सामर्था रे जरिये तिसाते जे सारियां चिज़ां जो सै अपणे बशा च करी लेआं, अहांरे कमजोर शरीरा जो बदली देणा ताकि सै तिसरे प्रतापी शरीरा साई हूणा। |
This work is licensed under Creative Commons Attribution-ShareAlike 4.0 License.