मरकुस 1 - बिलासपुरी नौआं नियम

यूहन्ना बपतिस्मा देणे औल़े रा प्रचार

¹ ये यीशु मसीह रे बारे च खुशखबरिया री शुरुआत इ, सै जे परमेशरा रा पुत्र आ।

² तियां जे यशायाह भविष्यवक्ते कताबा च, परमेशरे अपणे पुत्र मसीह जो गलाया भई : “देख, हऊँ अपणा सनेहा देणे औणे जो तेरते पैहले भेज्यारां, सै माहणुआं जो तेरा स्वागत करने खातर त्यार करगा।

³ सुनसान जगह च इक माहणु हाक पांदा हुआ सुणया राँ भई प्रभुये रा स्वागत करने खातर अप्पूँजो त्यार करा।”

⁴ यशायाह भविष्यवक्ते जिस सनेहा देणे औल़े माहणुये रे बारे च लिखया था ये सै यूहन्ना था, तिसजो जे लोक बपतिस्मा देणे औल़ा बोलां थे। सै जे सुनसान जगह च बपतिस्मा देआं, कने लोकां जो ये प्रचार कराँ था भई “अपणे पापी स्वाभावा जो बदला कने मांह तुहांजो बपतिस्मा देणा, तां परमेशरा तुहांरे पाप माफ करने।”

⁵ यहूदिया प्रदेशा ते कने यरूशलेम नगरा ते बौहत लोक निकल़ीने यूहन्ने लौ गये, कने अपणे पापां जो मन्नीने यरदन नदिया च तिसते बपतिस्मा लेआ।

⁶ यूहन्ना ऊँटा रिया ऊन्ना रे बणीरे कपड़े पैहनां था कने अपणे लक्का पर चमड़े री पेट्टी बन्ही रक्खां था। सै टिट्टे कने जंगली शैहत खां था।

⁷ कने ये प्रचार कराँ था, भई “मेरते बाद प्रचार करने जो सै औणे औल़ा सै जे माहते जादा सामर्थी आ; कने हऊँ तिसरे मुकावले किछ बी नींआ, हऊँ इक्की सेवका रा सब्बीं ते छोट्टा काम्म तिस खातर करना चाऊँ, तां तिस बी लायक नींआ।

⁸ हऊँ तुहांजो पाणिये ने बपतिस्मा देआं पर तिस तुहांजो पवित्र आत्मा सौगी बपतिस्मा देणा।”

यीशुये रा बपतिस्मा कने परख

⁹ तिस वगत ताहली जे यूहन्ना प्रचार करीराँ था, यीशुये गलील प्रदेशा रे नासरत नगरा ते आईने, यरदन नदिया च यूहन्ना ते बपतिस्मा लैया।

¹⁰ ताहली जे यीशु पाणिये चते निकल़ीने बाहर आया, तां इकदम तिसजो स्वर्ग खुल्हीरा दुस्या कने तिस पर कबूतरा रे रुपा च पवित्र आत्मा उतरया।

¹¹ कने परमेशरे स्वर्गा ते यीशुये जो गलाया भई, “तू मेरा प्यारा पुत्र आ, तेरते हऊँ बड़ा प्रसन्न आ।”

¹² फेरी यीशुये रे वपतिस्मे ते बाद पवित्र आत्मे इकदम तिसजो सुनसान जगह च भेज्या।

¹³ कने तिसा जगह च चाल़ियां दिनां तक शैताने तिसरी परीक्षा कित्ती; कने सै जंगली जानबराँ रे बिच रैया; कने स्वर्गदूत तिसरी सेवा करदे रै।

यीशुये रे सेवा रे कम्मां री शुरुआत

¹⁴ किछ वगता ते बाद राजा हरोदेशे यूहन्ने जो पकड़ीने जेल्ला च पाया, इसते बाद यीशु गलील प्रदेशा च आया तित्थी तिने परमेशरा रिया खुशखबरिया रा प्रचार कित्या,

¹⁵ कने तिने गलाया, “हुण बगत आईग्या ताहली जे परमेशरा अपणयां लोकां पर राज करना; इस खातर अपणे पापी स्वभावा जो छड्डा कने खुशखबरिया पर विश्वास करा।”

मच्छुआरयां रा सद्दया जाणा

¹⁶ गलील समुद्रा रे कनारे-कनारे जान्दे हुये, तिने शमौन कने तिसरे भाई अन्द्रियासा जो समुद्रा च जाल़ पान्दे देख्या; काँह्भई सै मच्छुआरे थे।

¹⁷ यीशुये तिन्हांने गलाया, “मेरे सौगी औआ; तियां जे तुहें मच्छियां जो कठेराँ थे, मांह तुहांजो सखाणा भई लोकां जो मेरा चेला बणने खातर कियां कठेरना।”

¹⁸ सै इकदम मच्छियां पकड़ने रे तिस कम्मा जो छड्डिने तिसने सौगी चलीपे।

¹⁹ ताहली जे यीशु थोड़ा जेआ अग्गे गया, तां तिने जब्दिये रे बड्डे पुत्र याकूब, कने तिसरे छोट्टे भाई यूहन्ने जो, किश्तिया पर जाल़ां जो सधेरदे देख्या।

²⁰ यीशुये तिन्हांजो इकदम सद्दया; कने सै अपणे पिता जब्दिये जो मजदूराँ ने सौगी किश्तिया पर छड्डिने, तिसने सौगी चलीगे।

बुरीआत्मा रे सताईरे माहणुये जो चंगा करना

²¹ यीशु कने तिसरे चेले कफरनहूम नगरा च आये, कने सै इकदम विस्राम रे दिन, यहूदी सभा घरा च जाईने उपदेश देणे लगया।

²² कने लोक तिसरे उपदेशा ते हैरान हुईगे; काँह्भई सै तिन्हांजो व्यवस्था रे सखाणे औल़यां साई नीं, पर अपणे अधिकारा ने सखां था।

²³ ताहली जे यीशु शिक्षा देई ही कराँ था, तां अचानक तिन्हांरे यहूदी सभा घरा च इक माहणु आया, तिसच जे इक बुरीआत्मा थी।

²⁴ तिने चिल्लाई ने गलाया, “हे यीशु नासरी, अहांजो तेरते क्या काम्म आ? क्या तू अहांरा नाश करने आईरा? हऊँ तिज्जो जाणाँ, भई तू कुण आ, तू परमेशरा रा पवित्र पुत्र आ!”

²⁵ यीशुये तिस्सो थिड़की ने गलाया, “चुप रै! कने तिस चते निकल़ी जा।”

²⁶ फेरी बुरीआत्मा तिस्सो मरोड़ीने, कने बड़े जोरा ने रड़ांदे हुये तिस चते निकल़ीगी।

²⁷ येढ़ा देखीने यहूदी सभा घरा रे लोक बड़े हैरान हुये कने अप्पूँ चियें गलाणे लगे, “ये क्या गल्ल इ? ये कोई नौआं उपदेश आ! ये तां अधिकारा ने बुरीआत्मां जो बी हुक्म देआं, कने सै तिसरे हुक्मां जो मन्नां ये।”

²⁸ कने तिसरा नौं इकदम गलील परदेशा रे आसे-पासे रे सारे लाकयां च फैल्लीग्या।

मते सारे बमाराँ जो ठीक करना

²⁹ यीशु इकदम याकूब कने यूहन्ने सौगी यहूदी सभा घरा ते निकल़ीने शमौन कने अन्द्रियासा रे घरें गया।

³⁰ कने शमौना रिया सस्सा जो बौहत बुखार आईरा था, तिन्हें इकदम तिसारे बारे च यीशुये जो गलाया।

³¹ तां यीशुये तिसारे नजदीक जाईने तिसारा हात्थ पकड़ीने तिसाजो ठुआलया; तां तिसारा बुखार उतरीग्या। कने सै तिन्हांरी सेवा-टैहल करने लगी।

³² दिन घरने ते बाद संझा रे वगत किछ लोक येढ़यां लोकां जो यीशुये ले ल्याये सै जे बमार थे, कने तिन्हां च जे बुरीआत्मां थिआं।

³³ कने तिस नगरा रे मते सारे लोक दरवाजे रे सामणे कट्ठे हुईगरे थे।

³⁴ तिने बौहत लोकां जो सै जे कईयां बमारियां ते दुखी थे, ठीक कित्या, कने कई सारी बुरीआत्मां जो कड्डया; कने बुरीआत्मां जो बोलणे नीं दित्या, काँह्भई सै जाणा थिआं, भई यीशु परमेशरा रिया तरफा ते आईरा।

सुनसान जगह च यीशुये रा प्राथना करना

³⁵ सवेरे तड़के इ, ताहली जे हल्तियें अन्धेरा इ था, यीशु उट्ठीने घरा ते बाहर निकल़या, कने गाँवां ते दूर सुनसान जगह च जाईने प्राथना करने लगया।

³⁶ फेरी शमौन कने तिसरे साथी तिसरिया खोज्जा च गये।

³⁷ ताहली जे तिन्हांजो यीशु मिलीग्या, तां तिन्हें बोल्या, भई “गाँवां रे बौहत सारे लोक तिज्जो टोल़या रायें।”

³⁸ यीशुये तिन्हांजो गलाया, “औआ; अहांजो नेड़े-तेड़े रे नगराँ च जाणा चाहिन्दा, काँह्भई हऊँ संसारा च इसा इ वजह ते आईरा भई लोकां रे बिच खुशखबरिया रा प्रचार करूँ।”

³⁹ कने तिने गलील प्रदेशा रे बौहत सारयां लाकयां च कने तिन्हांरे यहूदी सभा घराँ च जाईने प्रचार कित्या कने बुरीआत्मां जो कड्डया।

कोढ़ा रे रोगिये जो चंगा करना

⁴⁰ इक कोढ़ी माहणुये तिसले आईने, तिसरे सामणे घुटने टेक्कीने तिसने विनती कित्ती, “जे तुहें चाओ तां मेहरवानी करीने मिन्जो इस रोगा ते ठीक करा।”

⁴¹ यीशुये तिस पर दया करीने हात्थ रख्या, कने तिस्सो छुईने गलाया, “हऊँ चाँह भई तू ठीक हुई जाओ।”

⁴² कने इकदम सै तिस रोगा ते ठीक हुईग्या।

⁴³ फेरी यीशुये तिस्सो ये चेतावनी देईने भेजित्या,

⁴⁴ कने तिस माहणुये ने गलाया, “देख, किसी ने इस बारे च किछ बी देहां बोल्दा, पर यरूशलेम जाईने अप्पूँजो याजका ले दास्स, कने अपणे ठीक हुणे रे बारे च सै जे किछ मूसे ठैहराईरा तिसजो भेंट चढ़ा, ताकि लोकां जो पता लगी जो भई तू रोगा ते ठीक हुईग्या।”

⁴⁵ तिसते बाद तिने सब्बीं लोकां जो दस्सीत्या भई यीशुये कियाँ तिस्सो रोगा ते ठीक कित्या, इस खातर यीशु लोकां रे सामणे गाँवां च नीं जाई सक्कया। तां सै गाँवां ते बाहर सुनसान जगह च रैहणे लगया, पर लोक तिस इलाके रे चऊँ पासयां ते तिसला जो औंदे रै।