2 कुरिन्थियों 9 - बिलासपुरी नौआं नियम

साथी विश्वासियां खातर सहायता

¹ हुण यरूशलेम च विश्वासियां जो मदद करने री सेवा रे बारे च मिन्जो तुहांजो लिखणे री जरूत नीं।

² काँह्भई हऊँ मदद रे खातर तुहांरिया इच्छा जो जाणाँ, जिस रिया वजह ने हऊँ तुहांरे बारे च मकिदुनिया प्रदेशा रे रैहणे औल़े विश्वासियां रे सामणे ये बोलदे हुये गर्व करी रां, भई तुहें अखाया प्रदेशा रे लोक त पिछले साल्ला तेई मदद करने जो त्यार थे कने तुहांरिया इसा इच्छा ते तिन्हां चते मतयां जो मदद करने रे खातर प्रेरणा मिली।

³ पर हऊँ इन्हा तिन्नां विश्वासी भाईयां जो तुहांले इस खातर भेज्जी राँ ताकि अहें तुहांरे बारे च सै जे गर्व दस्या, सै गल़त नीं साबित हो, पर तेढ़ा जे मैं बोल्या तियां इ तुहें यरूशलेम नगरा रे विश्वासियां री मदद करने जो त्यार रौआ।

⁴ येढ़ा नीं ओ, भई जे मकिदुनिया प्रदेशा ते किछ विश्वासी मेरे सौगी आओ कने तुहांजो दान देणे जो त्यार नीं पाओ, तां हुई सक्कां भई इस भरोसे रिया वजह ने अहें शर्मिन्दा ओ कने तुहें बौहत जादा शर्मिन्दा ओ।

⁵ इस खातर मैं ये जरूरी समझया भई हऊँ विश्वासी भाईयां ने ये विनती करूँ भई सै अहांते पैहले इ तुहांले जाओ कने तिस वायदा कित्ती रिया भेन्टा जो त्यार करी लो, ताकि ये जबरदस्ती नीं पर तुहांरिया इच्छा रे मुतावक दित्तिरा दान ओ।

दान कियां देणा

⁶ इसजो याद रखा, सै जे थोड़ा बाँह, सै थोड़ा इ कटगा; कने सै जे जादा बाँह, सै जादा कट्टां।

⁷ हर कोई बिणा किसी दुखा ते, या बिणा किसी जबरदस्तिया ते, उतणा इ देओ जितना तिसरे मने सोचया; काँह्भई परमेशर खुशिया ने देणे औल़यां ने जादा प्यार रखां।

⁸ कने परमेशर तुहांजो जरूरता ते जादा देणे च सामर्थी आ, ताकि तुहांले दुज्यां जो देणे खातर जादा ते जादा हूणा।

⁹ तियां जे भई पवित्रशास्त्रा च लिखिरा, “परमेशर खुशिया ने गरीब लोकां जो दान देआं, कने सै जे ठीक आ तिस्सो सै हमेशा कराँ।”

¹⁰ काँह्भई परमेशर इ करसाणां जो ब्यू देआं कने खाणे जो रोटी देआं। तियां इ तुहांले सै किछ जे हाया परमेशर तिसजो बधान्गा, ताकि सै जे जरूरत मन्द लोक ये तिन्हांजो तुहें होर बी जादा देई सक्को।

¹¹ तुहें हर तरफा ते धनी हुणे ताकि तुहें हर मौके पर दान्नी बणी सक्को, कने ताहली जे अहें तुहांरिया उदारता रा दान जरूरत मन्द लोकां जो देन्गे, तां सै लोक परमेशरा रा धन्यवाद करगे।

¹² काँह्भई दान देणे रिया सेवा जो पूरा करने ते नां सिर्फ परमेशरा रे लोकां री जरूरत पूरी हुआं इ, पर सै लोक खुशिया ने परमेशरा रा बौहत धन्यवाद कराँ ये।

¹³ तुहांरिया इस सेवा जो सबूत मनदे हुये तिन्हां परमेशरा री महिमा करनी, काँह्भई तुहें मसीह रिया खुशखबरिया जो मन्नीने तिसरे अधीन रैं, कने गरीब विश्वासियां री कने सब्बीं री मदद करने च उदारता दसदे रैं।

¹⁴ हुण सै तुहांरे खातर परमेशरा ने प्राथना करी राँये कने तुहांजो देखणा चाँये, काँह्भई परमेशरे तिन्हौं आशीषित करने रे खातर तुहांजो बौहत इस्तेमाल कित्या।

¹⁵ तिस दान्ना रे खातर तिसरा जे बखान नीं कित्या जाई सकदा, परमेशरा रा धन्यवाद ओ।