2 कुरिन्थियों 8 - बिलासपुरी नौआं नियमखुल्हे दिला ने दान देणा 1 देक्खा, मेरे साथी विश्वासियो, हुण अहें ये चायें भई तुहें परमेशरा रे तिस अनुग्रह रे बारे च जाणा सै जे परमेशरे मकिदुनिया प्रदेशा री कलीसियां रे विश्वासियां जो दित्तिरा। 2 ताहली जे बौहत संकटा ते तिन्हांरा इम्तेहान हुया था तां बी सै बौहत खुश हुये कने हलाँकि ये बौहत गरीब थे फेरी भीं तिन्हें उदारता ने दुज्जे विश्वासियां री मदद करने जो पैसा दित्या। 3 तिन्हारे बारे च मेरी ये गवाही भई सै जितना जे देई सक्कां थे तिन्हें उतणा दित्या; इतणा इ नीं बल्कि अपणिया सामर्थया ते बी जादा अपणिया इच्छा ने दित्या। 4 सै बड़िया नम्रता सौगी यहूदिया प्रदेशा च रैहणे औल़े परमेशरा रे पवित्र लोकां री मदद करने च शामिल होणे रे मौके खातर अहांने बिनती करदे रै। 5 तिन्हे अहांते तेढ़ी जे उम्मीद कित्ती थी, तेढ़ी नीं बल्कि पैहले खुद अप्पूँजो प्रभु जो समर्पित कित्या कने फेरी परमेशरा रिया इच्छा रे मुतावक सै अहांजो अर्पित हुईगे। 6 इस खातर अहें तीतुस ने विनती कित्ती भई तियां जे तिने पैहले अपणे कम्मां जो शुरु कित्या था, तियां इ इस दान्ना रिया सेवा जो पूरा करने खातर तुहांरी मदद करो। 7 कने तियां जे भई तुहें हर गल्ला च यनिके विश्वासा च, बाणिया च, ज्ञाना च, कने मदद करने रिया इच्छा च, कने तिस प्यारा च सै जे तुहें अहांने रक्खां ये, बधदे जांये, तियां इ इस दान्ना रिया सेवा च बी बधदे जावा। मसीह अहांरा आदर्श 8 हऊँ तुहांजो हुक्म नीं देईराँ बल्कि होर कलीसियां रे जोशा ने तुहांरे प्यारा रिया सच्चाईया जो परखणे खातर बोल्ली कराँ। 9 काँह्भई अहांरे प्रभु यीशु मसीह रे अनुग्रह जो तुहें जाणाँ ये; भई सै अमीर हुन्दे हुये बी तुहांरे खातर गरीब बणीग्या, ताकि तिसरिया गरीबिया ते तुहें अमीर बणी जो। 10 कने इसा गल्ला च ये मेरी सलाह इ; तुहांजो ये शोभा देआं, तुहें पिछले साल न सिर्फ दान देणे रिया इच्छा च सब्बीं ते अग्गे थे बल्कि दान देणे च बी सब्बीं ते अग्गे रै। 11 इस खातर हुण ये काम्म पूरा करा, ताकि जिस तरिके ने इच्छा करने च तुहें त्यार थे, तियां इ अपणिया-अपणिया सामर्थय रे मुतावक पूरा करा। 12 काँह्भई जे किसी च दान देणे री इच्छा हाई, तां सै जे किछ तिसले हाया, तिसरे मुतावक तिसरा दान ग्रहण हूणा, उसरे मुतावक नीं सै जे तिसले निआं। 13 अहें ये नीं चाहन्दे भई तुहें दुज्यां री मदद करो कने खुद अप्पूँ दुखा च रौ; बल्कि अहांरा मकसद येआ भई तुहांरा जीवन इक बराबर रौ। 14 अहांरी इच्छा येई भई तिन्हां रिया इसा कमिया रे बगत तुहांरी बढ़ती तिन्हांरी जरूरतां पूरी करो, ताकि जरूरत पौणे पर तिन्हांरी बढ़ती बी तुहांरिया कमिया जो दूर करी सक्को ताकि बराबरी बणीरी रौ। 15 तियां जे पवित्रशास्त्रा च लिखिरा, “तिने जे मता बटोरया तिसले मता नीं रैया, कने तिने जे थोड़ा बटोरया, तिसले थोड़ा नीं रैया।” तीतुस कने तिसरे सहकर्मी 16 परमेशरा रा धन्यवाद ओ तिने जे तीतुस रे दिला च तुहांरी सहायता रे खातर तेढ़ा इ जोश भरीत्या, तेढ़ा जे मेरे दिला च तुहांरे खातर आ। 17 काँह्भई ताहली जे अहें तीतुस ते तुहांजो मिलणे खातर विनती कित्ती, तां तिने अहांरी विनतिया जो स्वीकार कित्या कने सै बौहत जोशा ने कने अपणिया इच्छा ते तुहांले आया रां। 18 अहें तिस सौगी इक होर विश्वासी भाईये जो बी भेज्जी राँये, तिसरा खुशखबरिया रे प्रचारा च सारी कलीसियां रे विश्वासियां च यश फैली कराँ। 19 इसते इलावा इस सेवा रे कम्मां च कलीसियां रे विश्वासियें तिस्सो अहांरे सौगी यात्रा करने जो बी भेज्जिरा था। हुण ये सेवा अहें इस खातर कराँ ये भई प्रभुरी महिमा कने ये दसणे खातर भई अहें यरूशलेम नगरा च रैहणे औल़े विश्वासियां री मदद करने रे खातर उत्सुक ये। 20 अहें इसा गल्ला च चौकस रैं भई इस उदारता रे कम्मा रे बारे च तिसरी सेवा जे अहें कराँ ये, कोई अहां पर दोष नीं लगाई पाओ। 21 काँह्भई सै जे ठीक आ सैई करना अहांरा मकसद आ, वल्कि प्रभुये रिया नज़राँ ची नीं पर दुज्यां लोकां रिया नज़राँ च बी। 22 कने अहें तिन्हां सौगी इक होर विश्वासी भाईये जो बी भेज्जी राँये, तिसरी जे अहें बौहत बार कई गल्लां च जाँच कित्तिरी कने तिने कई बार अहांजो साबित कित्या भई सै मदद करने च बौहत उत्सुक आ। कने हुण तुहां पर तिस्सो बड़ा भरोसा, इसा वजह ने सै होर बी जादा जोशा चा। 23 जे कोई तीतुस रे बारे च पुच्छे, तां सै तुहांरे बिच सहायता करने च मेरा साथी कने सौगी-सौगी काम्म करने औल़ा रैया; कने तित्थी तक जे अहांरे साथी विश्वासियां रा स्वाल आ, सै त कलीसियां रे सनेहा देणे औल़े कने मसीह जो आदर देआंये। 24 इस खातर तुहें तिन्हांजो अपणा प्यारा दस्सा, कने कलीसियां च सारयां विश्वासियां जो साबित करा भई तुहांरे बारे च अहांरा घमण्ड सच्चा। |
This work is licensed under Creative Commons Attribution-ShareAlike 4.0 License.