2 कुरिन्थियों 3 - बिलासपुरी नौआं नियम

नौंईयां बाचा रे सेबक

¹ क्या अहें फेरी अपणी बडयाई करना शुरु करीती? या क्या अहौं दुज्यां लोकां साई सपारसा रियां चिट्ठियां तुहांले ल्यौणियां या तुहांते लेणियां? इसरी जरूरत नीं!

² तुहें खुद इक चिट्ठिया साई ये सै जे अहांरे दिला च लिखिरी, तिसजो जे सारे लोक पैहचाणां ये कने पढ़ां ये।

³ ये साफ आ भई तुहें मसीह रिया तरफा ते आईरे इक्की चिट्ठिया साई ये कने अहां रिया सेवकाईया रा नतीजा ये। ये स्याईया ने नीं कने पत्थरा रियां सिल्लां पर बी नीं बल्कि जिऊंदा परमेशरा रिया आत्मा ने माहणुआ रे दिलां पर लिखिरी।

पौलुस री काबलियत

⁴ अहें ये बोलां ये काँह्भई मसीह रे जरिये परमेशरा पर अहांरा भरोसा।

⁵ अहें ये नीं बोलां ये भई किछ बी करने खातर अहें खुद काविल ये। पर सिर्फ परमेशर इ हाया सै जे अहांजो ये काम्म करने रे काविल बणां,

⁶ तिने इ अहांजो नई वाचा रा सेवक हुणे रे काविल बी बणाया, ये कोई लिखिरी मूसा री व्यवस्था निआं बल्कि आत्मा री वाचा इ, काँह्भई ये व्यवस्था मौत ल्यौईं, पर परमेशरा रा आत्मा जीवन देआं।

नौंईयां वाचा री महिमा

⁷ ताहली जे मूसा री व्यवस्था अखराँ च पत्थरा पर खोदीने दित्ति गई थी, तां परमेशरा री महिमा दिखाई गई, भई इस्राएल रे लोक मूसा रे तिस तेजस्वी मुँआं जो देक्खी नीं सक्के, कने तिसरा सै तेज बाद बिच घटदा गया। जे व्यवस्था सै जे मौत ल्यौआं इ इतणी महिमा सौगी आई,

⁸ तां फेरी पवित्र आत्मा री वाचा होर बी जादा तेजोमय काँह नीं हुँणी?

⁹ कने फेरी जे दोषी बनाणे औल़िया वाचा च इतणा तेज था, तां तिसा नौंईयां वाचा च बौहत जादा तेज आ सै जे अहांजो परमेशरा रे सामणे धर्मी बणाईं।

¹⁰ हकीकत च नौंईयां वाचा रा इतणा तेज आ भई मूसा री व्यवस्था तेजोमय नीं रैई।

¹¹ काँह्भई जे व्यवस्था सै जे घटदी जां थी तेजोमय थी, तां नौईं वाचा सै जे हमेशा रैईं सै बौहत जादा तेजोमय इ।

¹² इस खातर अहें अपणिया इसा आशा रिया वजह ने भरोसे ने बोलां ये।

¹³ अहें मूसा साई नींये, तिने जे अपणे मुँआं पर परदा पाईरा था भई किति इस्राएल रे लोक तिस घटणे औल़े तेज्जा रे अन्ता जो नीं देक्खी लो।

¹⁴ पर इस्राएली लोकां रे मन कठोर हुईगरे थे, कने आज्ज तक ताहली जे सै पुराणिया वाचा जो पढ़ां ये, तां तिन्हांरे मना पर सैई परदा पैईरा रैयां, पर सै परदा सिर्फ मसीह पर विश्वास करने रे जरिये इ हटाया जां।

¹⁵ आज्ज तक ताहली जे कदीं मूसा री व्यवस्था पढ़ी जाईं, तां तिन्हांरे मनां पर पड़दा पैईरा इ रैयां, सै इसजो पूरे तरिके ने समझी नीं पान्दे

¹⁶ पर ताहली जे कदीं कोई प्रभु यीशु पर विश्वास कराँ, तां प्रभु तिस परदे जो हटाई देआं।

¹⁷ प्रभु त आत्मा: कने तित्थी जे किति प्रभुरा आत्मा, तित्थी अजादी।

¹⁸ पर ताहली जे अहें सब अपणे खुल्हे चेहरे ने प्रभुये री महिमा रा ध्यान कराँ ये, तां परमेशर अहौं हौल़यां-हौल़यां अपणे स्वरूपा च बधदी हुई महिमा सौगी बदल़ां, ये महिमा प्रभु तेई मिलां इ, सै जे पवित्र आत्मा।