उदुःतो कताकून 9 - Korwa Bible

¹ हनते पाँच नमारीग बराहील अनँयग मरंग सोहनाईए ओंगतेरा अरू ईंग सेरमो अते ओतरे मीटोंग इपील लोजोरनेना हना ईंग ञेलतेरा, अरू हाँयग इपील पतालपूरराः दुवारराः चाभीय पवावनेना।

² हाँय हना दुवारे गीगतेरा दो, हना डोडहाते भटा अते उडुंगगुःता हना सोकोल इया सोकोल उडुंगनेना। अरू हना सोकोलते बेर अरू सेरमो कड़ियायान।

³ हनते हना सोकोल अते पंपाकू उडुंगनेना अरू ओतरेकू सितरावयान। हँकुःआ पंपाकू ओतरिकुःआ लगड़ा चिडिंगकू इया मुरुक लार दोहोना।

⁴ हँकुःआ पंपाकूय कतावाड, “अपे चउंदीसराः बीर सहे हड़ियड़ बुदाकून सहे सींग दूबकून तोनोंगाः अलोपे हनीगे, मनदो समांगरे भगवानराः मोहर लगावतो कोवानेःआ हँननकुःआ होड़कू एकलापे हनीकू।”

⁵ हँकुःआ होड़कू गोएग एंडाकू लगा कोवान, मनदो पाँच महिना वरी मुनुरुक कटसिया एमेवाकू लगा पंपाकू हातपाते ओवाडकुःआ। अरू हँकुःआ होड़कूराः कटसिया, लगड़ा चिडिंगराः दघात इया दोहोना।

⁶ हना दिन होड़कू गुजुः लगाकू ञामता, मनदो हँकू ओरोकू गोएग अवेनेना। हँकू गुजुः लगाकू टकानता, मनदो गुजुः हँकू अते ञीरता।

⁷ हँकुःआ पंपाकू लड़ाइ लगा सपड़ावतो घोड़ाकू इयाकू ञिलुःआ। हँकूराः बोःरे सोनाराः पगरी इया दोहोना, अरू हँकूराः सुरइत होड़राः इया दोहोना।

⁸ अरू हँकूराः ऊब अइमीकूराः ऊब इया लंबी अरू तिरिंगतुकू कूलकूराः इया दोहोना।

⁹ हँकू लोहाराः झिलम कुड़ोमरेकू तुसिंगतेरा, अरू रंत सुदा तोलतो घोड़ाकू लड़ाइ लगाकू बतकाःता हना इया हँकूराः पंकीराः मुरुक सटी अरो अयमुःआ।

¹⁰ हँकूराः चड़रोम चिडिंगकूराः इया सुइ-सुइ दोहोना। अरू पाँच महिना वरी होड़कूके कटसिया एमे लगा हँकू एचेरे जंगर दोहोना।

¹¹ पतालपूरीग बराहील हँकूरीग राजाय दोहोना। हाँयराः ञाव इबरानी भासीरे अबादोन अरू उनानी भासीरे अपुलियोन इदा। (बनर लबदराः मतलोब लाय एंडायीग हवे।)

¹² मड़ंगाः बिपइत पारयना। रहा, अरू बारटोंग बिपइत दरवाःआ।

¹³ हनते छो नमारीग सेरमो देसरीग बराहील अनँयगराः मरंग सोहनाईए ओंगतेरा। हनमेला भगवानराः गदी मड़ंगरे इदा हना सोनाराः धामराः चाइरगोटोंग देरेंग इयाःआ खुंटीकून अते मीटोंग अरोयिंग अयूमतेरा।

¹⁴ मरंग सोहनाई साबतो छो नमारीग बराहील हना अरोय अयूमतेरा, “मरंग पुरात नई धरीरे तोलतो इदानकुःआ हँकुःआ चइरगोटोंग बराहीलकूम अड़ाःगोड।”

¹⁵ दो ननानाः बेला अरू दिन अरू महिना अरू बरिस लगा सपड़ाव दोहोतेडकुःआ हँकुःआ बराहीलकूय अड़ाःगोतेड। दो नुँहू हँकू पेय बंटारे मी बंटा चउंदीसरिकुःआ होड़कू ञेड गोएगकू लगाय अड़ाःगोतेडकुःआ।

¹⁶ हनते घोड़ाकू ओरा हना रंतकूनरेकू दुड़ुःनेना हँकुःआ सइना होड़कूराः गँड़ावतो ईंग अयूमकेरा। हँकू बीस करोड़ होड़कू दोहोना।

¹⁷ ईंग दरसनरे नाःआ इयायिंग ञेलतेरा; घोड़ा सलावदारकू झिलमकू तुसिंगतेरा। हँकूराः झिलमराः रंग सेंगेल इया लाल रंग, अरू दूमराकांत दिरि इया नीला रंग, अरू लेटे दिरि इया पियाड़ रंग दोहोना। हँकुःआ घोड़ाकूराः बोः कूलकूराः बोः इया दोहोना अरू हँकूराः आह अते सेंगेल, सोकोल अरू लेटे दिरिराः गुंडा उडुंगगुःआ।

¹⁸ सेंगेल अरू सोकोल अरू लेटे दिरिराः गुंडाराः पेयगोटोंग हइजा हँकूराः आहते उडुंगनेनखन चउंदीसरिकुःआ पेय बंटारे मी बंटा होड़कू गोएग एंडागोतेडकू।

¹⁹ हँकुःआ घोड़ाकूराः जंगर हँकूराः आहरे अरू चड़रोमरे दोहोना। हँकूराः चड़रोम बींगकू इया दोहोना अरू हना चड़रोमरे बोः हों दोहोना। हनानाःते होड़कूकू हनिःआ।

²⁰ हनते हों नाःआ हइजाते बनसावतो होड़कू अँननकू अँकूराः बेलूर बुताकून अड़ाःकेडखन जीव मेरकू कुदागाड, अरू भूतकूकू सेवाःआ। हँकू सोना अरू चाँदी अरू पितड़ अरू दिरि अरू कठवाराः मुरतीकूनराः सेवा मेरकू अड़ाःगाड। नाःआ मुरतीकून कहिसाः मेर ञेल अवेयता, मेर अयूम अवेयता अरू मेर सेने अवेनता।

²¹ हँकू होड़कू ञेड गोएग अते, पंगाड़ होड़ेंग अते, सनहा-सनही बुता अते अरू इइनिग बुता अते भगवान अगी अँकूराः जीव मेरकू कुदागाड।