मरकूस 11 - Korwa Bible

एरुसलेम सहररे ईसू बोलोयान

¹ ईसू अरू चेलाकूतेन एरुसलेम मरंग सहर अगी बतफेगा गाँव अरू बेतनिया गाँव गतररे जइतून पहाड़रेकू सेनेडा। हाँय चेलाकूतेन अते बार होड़ कतावाडखने वारगोतेडकिन,

² “मड़ंगराः गाँवरेबा सेन अरू हंडाबा बोलता हननमेला नुँहू वरी तोनोंगीग मेरेय दुडुःगना मीटोंग गदहा होन तोलतोबा ञेलेयता। दो हाँयग गदहा होन लड़ाकिडिगखन नाःआरेबा अगूगेय।

³ तोनोंगीग अबा एचेरेय होंबरे, नाँयग गदहा चिला लगाबा लड़ा गोःयायतना, माःआन। दो कतायबा परबूके नाँयग गदहाराः जरूरइत इदा, माःआन। अरू हाँय ओहेन नंडाय वारगोडेयता।”

⁴ दो हँकिन सेनेवाडखन हाँयग गदहा होन दुवार बहरी दोफा दूररे तोलतोकिन सेने ञामतिडिया।

⁵ अरूकिन लड़ागेय मेला हंडाकू चड़ाँकुःआ हँकुःआ होड़कू कताया, “अबा चिलाबा एचेयतना? नाँयग गदहा होन चिला लगाबा लड़ागेयतना?”

⁶ ईसू कतातेरा हान इया हँकुःआ होड़कू एचेरेकिन कतातेरा। दो होड़कू हँकिनकू सेने ओवातेरा।

⁷ हनते हँकिन गदहा होन ईसू एचेरेकिन गोः सोदोरतिरिया अरू अँनकूराः सोनहे गदहा होन चोटरेकू लतकातेरा। हनते ईसू गदहा होन चोटरेय दुड़ुःयान।

⁸ मुरुक बगरा होड़कू ईसूकू मान मरजइतगेय लगा अँनकूराः सोनहे दूररेकू बेल इदीया अरू एटाः होड़कू दोहोड़ अते डइड़कून तपेग अगूवाडखन दूररेकू बेलगोतेड।

⁹ हाँयराः मड़ंगकू सेना अरू हाँय देह दूरकू वेगा, हँकुःआ होड़कू खिररी घड़ीनकू कता इदीया, “होसनना!” “परबूराः ञावतेय वेगता हाँयग होड़राः जीव भगवान भलावायता।”

¹⁰ अबूरीग खुटिपरिया होड़ दाऊद राजाराः राइज इया, दरवाःआ हना राइज भल भलाय इदा। “सेरमो देसरीग भगवानके होसनना!”

¹¹ हनते ईसू एरुसलेम मरंग सहर सोदोरनेनखन भगवानराः ओड़ाःरेय वेजेडा। अयूबनेना हनालगा हाँय अउग-बउग जमा जिनिसकून ञेलवाडखन आँयगरिकुःआ बारहगोटोंग मूक चेलाकू सुदा बेतनियाय कुदा सेनेडा।

अकिरिंग होड़कूराः एचे उडुंग

¹² एटाः दिन बेतनिया सहरतेकू उडुंगनेन दो ईसू रंगेगतिडिया।

¹³ हनमेला ईसू मीटोंग हड़ियड़ दोहोना हना लुवा दूबे ञेलतेड अरू हना दूबरे जोःओत इदा माःआनते हंडा तोराय। दो हन जोःराः बेला मेर होयागान, हनालगा सनाकम एकला दोहोना।

¹⁴ हनते ईसू लुवा दूबे कतावाड, “तिसिंग वरीते आमराः जोःओ तोनोंगीग ओरोकू जोमतेरा।” अरू नाःआ बड़रा आँयगरिकुःआ मूक चेलाकू अयूमतेरा।

¹⁵ हनते ईसू एरुसलेम मरंग सहररेय सेनेडा अरू हाँय भगवान ओड़ाः तोराय। हंडा राचरे चिनचिलाकू किजा अकिरिंगा हँकुःआ होड़कू हाँय बहरीय एचे उडुंगकुःआ अरू हाँय ढिबुवाकू बदलाःआ हँकुःआ होड़कूराः टिबुलकून अरू पेरवाँ तितीगकूकू अकिरिंगा हँकुःआ होड़कूराः मसिलाकूने उलटाव एंडागोतेडा।

¹⁶ अरू तोनोंगाः जिनिसकून भगवान ओड़ाः राच अते मेरकू गोः पार ओवाःआ।

¹⁷ अरू हाँय चेडवाडखने कतावाडकू, “भगवानराः कागदरे नाःआ इया ओजाःतो कोवानेःआ जा? ईंगराः ओड़ाः जमा जइतकू लगा अरजीराः ओड़ाःकू कतायता, मनदो अपे इनिग होड़कूराः लातपे बड़ाँवगोतेडा।”

¹⁸ ईसूराः चेड अयूम घड़ीन जमा होड़कू बयाव जुवाःआ। हनालगा मूक पुजउरीकू अरू नियम चेडदार होड़कू ईसू मुरुककू बोरोवाया अरू हाँय ञेड एंडागेय लगा हाँयराः कसूरकू ञामा।

¹⁹ सिंगाड़ होनोयायान हनमेला ईसू अरू आँयगरिकुःआ चेलाकू हना सहर अते बहरी तोराकू।

गोसोत लुवा दूब

²⁰ दो अंगुः निंदावा हँकू एरुसलेम सहर अगीकू सेनेन मेला, हनानाः लुवा दूब जेरतो वरी गोएग गोसोतकू ञेलतेरा।

²¹ दो ईसू कतातेरा हना बड़रा पतरस उहियार अगूतेरा अरू हाँय ईसू एचेरेय कतातेरा, “ने गुरुजी, ञेलमे! आम नाःआ लुवा सींगमे कतावातेरा हनन इया झुरायना।”

²² ईसू हाँय एचेरेय कतातेरा, “भगवान एचेरेम बिसवासगे।

²³ अपे ईंगपे अयूम। तोनोंगीग होड़ मिनी जीवकियानखने बिसवासगे दो, हाँयराः बिसवास दोहोन, हनन इया हाँय लगा होया जुवाःता। हाँय तोनोंगाः पहाड़े कतावा, रेमकियानखन समुंदररे लोजोर जुवाः, माःआन दो हनन उड़ी होनोया जुवाःता।

²⁴ नननलगा ईंग अपे एचेरेयिंग कतायतना, तोनोंगाः अरजी घड़ीनपे असे अरू हना पवावकिया माःआन बिसवासगे दो पनावाव जुवाःतापे।

²⁵ अपे अरजीतान मेला, तोनोंगीग होड़ बदीरे, माँय ईंग सुदाय कसूरकेरा, माःआनमे ओंगलेतना दो हना बराव एंडागोडमे, अरू आमरीग सेरमोरीग अपांग आमराः कसूर होंय बराव एंडागोडता।

²⁶ [आम मेरेम बराव एंडाय दो आमरीग सेरमो देसरीग अपांग हों आमराः कसूर ओरोय बराव एंडातेरा।”]

ईसूराः हातपात बदीरे होड़कू होंबरेःआ

²⁷ ईसू अरू आँयगरिकुःआ मूक चेलाकूतेन एरुसलेम मरंग सहररेकू कुदा वेजेडा अरू हाँय भगवानराः ओड़ाःरेय दँड़ाःआ। दो मूक पुजउरी अरू नियम चेडदार होड़कू अरू एहूदा मूक होड़कू हाँय एचेरे वेगकियानखनकू होंबरेःआ,

²⁸ “आम नाःआ इया बुता इयेराः हातपाततेम एचेयता? अरू नाःआ एचेय लगा इये हातपाते ओवाडमेःआ?”

²⁹ मनदो ईसू हँकू एचेरेय कता कुदातेरा, “ईंग हों अपे एचेरे मीटोंग कतायिंग होंबोरता। ईंगपे उदुःवा दो ईंग हों अपेयिंग उदुःवाता, नाःआ बुता चिला हातपाततेयिंग एचेयतना, माःआन।

³⁰ एहुना बतिसमा एमेवाकू लगा इये हातपाते ओवातिरिया? भगवान जा मनुवाकू? नाःआ ईंगपे उदुःवा।”

³¹ हनते हँकू अँननकू अँकू कता होड़ेंगा, “अबू कताय, सेरमो होरते, दो हाँय कतायता, अपे हाँय एचेरे चिला लगा मेरपे बिसवासगाड, माःआन।

³² मनदो मनुवाकू होरते माःआनबू कताय दो?” (जमाकू सुदीया एहुना सतायरे भगवानराः बड़रा कतायीग होड़ हवे। हनालगा हँकू होड़कूकू बोरोवाःआ।)

³³ हनते हँकुःआ होड़कू ईसू एचेरेकू कताया, “अले मेरले सुदीयतना।” दो ईसू कताया, “नाःआ बुता चिला हातपाततेयिंग एचेयतना, हना हों ओरोयिंग उदुःवातेडपेःआ।”