मती ओजाःतेरा भगवानराः नपाय सरवन 16 - Korwa Bible

ईसू एचेरे मीटोंग चिनहाकू असेतेरा

¹ मी दिन फरीसी होड़कू अरू सदूकी होड़कू ईसू अंदजाव लगा हाँय एचेरे सेनेडखनकू कतातेड, “ने गुरुजी, आम सेरमो देसराः मीटोंग चिनहाम उदुःवाले।”

² दो ईसू हँकू एचेरेय कता कुदातेरा, “तिसिंग सिंगाड़ बदरी लाल इदान दो नपाय दोहोनता, माःआनपे कतायता।

³ मनदो निंदावा बदरी लाल अरू धुः-धुमइल दोहोन दो अपे कतायता, तिसिंगाः दिन ओरो ढोपो इदा, माःआन। नाःआ इया अपे दिन बदीरे रितापे सुदीबाःगोडता। मनदो नाःआ जूगरे भगवान चिलाय एचेयतना हनाराः चिनहा अपे ओरोपे कता उदुः अवेतेरा।

⁴ नाःआ जूगरिकुःआ बेलूर अरू सनहा-सनही होड़कू सेरमो अते चिनहाकूनकू ञामता। मनदो हँकू एवनाराः चिनहा अते अरू एटाः तोनोंगाः चिनहा ओरोकू पवावनेना।” हनते ईसू हँकू अड़ाःवाडखन एटाः अगीय सलावयान।

ईसू चेलाकूय सेतावतना

⁵ ईसूरिकुःआ चेलाकू हुडिंग समुंदर अते मार परोमकू सोदोरनेन दो हँकू रुटी गोगोः लगाकू लिडिंगयान।

⁶ दो ईसू हँकू एचेरेय कतातेड, “फरीसी होड़कू अरू सदूकी होड़कूराः सेबेल सोड़ा अते अपे सवासितीपे दोहोन।”

⁷ हनते चेलाकूतेन अँननकू अँकू कता होड़ेंगा, “अबू रुटी मेरबू अगूगरा। हनालगा नाँय नाःआ इयाय कतावाबूतना।”

⁸ दो ईसू नाःआ सुदीतेडखन चेलाकूतेने कतावाड, “ने गुनमिन बिसवास होड़कू, अपे अँननपे चिला लगापे ओंगलेतना, अबू एचेरे रुटी कोवानेःआ, माःआन।

⁹ अपे नुँहूमिन हों मेरपे बुझावगान जा? अपे मेरपे उहियारगेतना जा, ईंग पाँचगोटोंग रुटीते पाँच हजार होड़कू जोम लगायिंग एमेवातेडकुःआ दो तुमिन दउड़ा रुटी बनसावतो दोहोनेना?

¹⁰ अरू चइर हजार होड़कू जोम लगायिंग एमेवातेडकुःआ अरू हंडाःआ बनसावतो रुटी सातगोटोंग दउड़ारे मेरपे रेम जुमावगाड जा?

¹¹ अपे चिला लगा मेरपे बुझाःतना, ईंग अपे एचेरे रुटी बदीरे मेरिंग कतागरा। मनदो अपे फरीसी होड़कू अरू सदूकी होड़कूराः सेबेल सोड़ा अते सवासितीपे दोहोन लगायिंग कताया।”

¹² हनते हँकू बुझावयानकू, रुटीरेकू उपयोतगेता हना सेबेल सोड़ा बदीरे कोवान मनदो फरीसी होड़कू अरू सदूकी होड़कूराः चेड अते सवासितीबू दोहोन लगा ईसू कताया, माःआन।

ईसू, मसी हवे माःआन पतरस मनेवातिरिया

¹³ ईसू कइसरिया पिलिपी छतररेय सोदोरनेन दो हाँय अनँयग चेलाकूतेन एचेरेय होंबोरतेरा, “होड़कू मनुवारीग बेटात इये हवे माःआनकू कतायता?”

¹⁴ दो हँकू कतातेड, “अदोम होड़कू कतायता, आम बतिसमा एमेयीग होड़ एहुना हवे, माःआन। अरू अदोमकू कतायता, आम भगवानराः बड़रा कतायीग होड़ इलियाह हवे, माःआन। अरू अदोमकू कतायता, आम इरमिया सहे भगवानराः बड़रा कता होड़कू अते तोनोंगीग मी होड़ होड़ हवे, माःआन।”

¹⁵ दो ईसू हँकूय होंबोरतेड, “अपे ओंगोलरे ईंग इये हवे?”

¹⁶ दो सिमोन पतरस कता कुदातेरा, “आम मसी हवे, जीयत इदानिया हाँयग भगवानरीग बेटात हवे।”

¹⁷ हनते ईसू कता कुदातेरा, “ने एवनारीग बेटात सिमोन, भगवान आम जीवे नपायकेरा। तोनोंगीग मनुवा अगीते कोवान, मनदो सेरमो देसरे इदानिया ईंगरीग अपांग भगवान, नाःआ कता अनँयग आमे कता उदुःवाडमेःआ।

¹⁸ आम ईंगमे अयूम! आम परतस हवे, अरू नाःआ दिरिरे ईंग ईंगराः कलसियायिंग तुलाता अरू नरगराः तोनोंग इयाःआ जंगर हना अते ओरो जीताव अवेनेना।

¹⁹ ईंग आम लगा भगवानराः राइजराः चाभीकूनिंग एमेवामता अरू जे हों सकालाः नाःआ चउंदीसरेम तोल, हान सेरमो देसरे हों तोलतो दोहोनता। अरू जे हों सकालाः आम चउंदीसरेम गीगगे, हान सेरमो देसरे हों गीगतो दोहोनता।”

²⁰ हनते ईसू सेतावतेडकूखन चेलाकूतेन एचेरेय कतातेड, “अपे तोनोंगीग एचेरे ईंग बदीरे, माँय मसी हवे, माःआन अलोपे कताय।”

ईसू अनँयग गुजुः बदीरेय कताया

²¹ हना वरीते ईसू अनँयग चेलाकूतेने कता उदुःआ, “ईंग एरुसलेम सहररे सेन लगा इदा अरू एहूदाकूरिकुःआ मूक होड़कू, मरंग पुजउरीकू अरू नियम चेडदार होड़कू मुरुककू संतावगींगता अरूकू ञेड एंडागोडिंगता। मनदो ईंग पेय दिनरेयिंग जियाव रिमुःता।”

²² दो पतरस ईसू एटाः अगीय गोःयाडीग अरू डंटाव घड़ीने कताया, “ने परबू, नाःआ इया कोवान। आम सुदा नाःआ इया कहियो ओरो होयानेना।”

²³ दो ईसू ञेल उलटावतेडखन पतरसे कतावाड, “ने कलउ, ईंग मड़ंग अते तोरेनमे। आम ईंगराः दूरमे रेड लगा ओंगलेता। आम भगवानराः कता इया कोवान, मनदो होड़कूराः कता इयाम ओंगोलतना।”

ईसूराः तयोम ओतोंगराः मतलोब

²⁴ ईसू चेलाकूतेन एचेरेय कतातेड, “तोनोंगीग ईंग तयोम अगी वेग लगाय ओंगले दो, हाँय अनँयगराः जीव अड़ाःवाडखन अनँयग कुरूस रेमकेडखन ईंग देह दूरे ओतोंग वेग।

²⁵ मनदो तोनोंगीग अनँयग जीव बनसाव लगाय ओंगले दो, हाँय आँयगराः जीवे ञेल केड़े एंडागोडता अरू तोनोंगीग ईंग लगा अनँयग जीवे अड़ाःगोडता दो, हाँयराः जीव बनसाव जुवाःता।

²⁶ तोनोंगीग होड़ चउंदीसराः जमा जिनिसकूने पवाव जुवाः अरू अनँयग जीवे लायगोडता दो, हाँयके हनारे चिला नफा होयाःता? मी होड़ अनँयग जीव बदलारे चिलाय एमे अवेयता?

²⁷ मनुवारीग बेटात, सेरमो देसरिकुःआ बराहीलकू सुदा अपांग भगवानराः विड़चेड़तो मरसलरेय वेगता अरू हना बेला जमा होड़कू लगा अँनकूराः बुता बनीय एमेवाकूता।

²⁸ अपे ईंगपे अयूम! नंडा चड़ाँत इदानकुःआ नँकुःआ होड़कू अते अदोम होड़कू, मनुवारीग बेटातराः राइज बुँहड़ीत अरीनकू ञेल वरी ओरोकू गोएगनेना।”