लूका 11 - Korwa Bible

अरजी लगा चेड

¹ मी दिन ईसू मी ततेररेय अरजीःआ। हाँय अरजी उरियावनेन दो आँयगरिकुःआ चेलाकूतेन अते मी होड़ हाँय एचेरेय कतातेरा, “ने परबू, एहुना आँयग चेलाकू अरजीगे लगाय चेडतेडकुःआ, हान उड़ी अले हों अरजीगे लगाम चेडले।”

² ईसू हँकू एचेरेय कताया, “अपे अरजी मेलापे कताय, ने अपांग, आमराः ञाव सुद इदा, माःआनले मान मरजइत अवेय। आम अले तलारे राइजगे लगाम बुँहड़ीगे।

³ अलेराः सगर दिनाः जोम जिनिस मेमेड दिन अले लगाम एमेवाले।

⁴ अले एटाः होड़कूराः कसूरले बराव एंडाकेरा, हनन इया अलेराः कसूर होंम बराव एंडागोड। अरू कसूरराः रेनहारे अलोम पराव ओवाले।”

⁵ हनते ईसू हँकू एचेरेय कताया, “नाःआपे ओंगोल। अपेरीग मी होड़ सउंगता इदा अरू आम हाँय एचेरे हटिंग बरा रइतरे सेनेवाडखनमे कतायता,

⁶ ईंगरीग मी होड़ सउंगता सेन दुनूररे ईंग ओड़ाःरेय वेगकिया। हाँय एमेवा लगा ईंग एचेरे तोनोंगाः कोवानेःआ। हाँय लगा पेयटोंग रुटी पइंचाम ओवायिंग।

⁷ दो हाँय ओड़ाः पेंदातेय कतायता, ईंग रिमुः लगा अलोम कतावायिंग। ईंग दुवारिंग सींगकेरा अरू ईंगरिकुःआ लइंकू हों ईंग सुदाकू गेतेगकिया। हनालगा रेमकियानखन ओरोयिंग एमे अवेतेरा।”

⁸ हनते ईसू कतातेड, “ईंग अपे एचेरेयिंग कतायतना, हाँय आँयग सउंगताय दोहोना हों रेमकियानखन मेरेय ओवाय दो, हाँय घड़ी घड़ी बेगर गियुःतेय असेय अते रेमवाडखन हाँयके जेमीने चहाःता, हनामिन हाँये एमेवायता।

⁹ हनालगा ईंग अपे एचेरेयिंग कतायतना, अपे असेगोड ञवन दो भगवान अपे लगाय एमेयता, ञामगोड ञवन दो, अपेके पवाःता, दुवारपे टोकोःगोड ञवन दो भगवान अपे लगाय गीगगोडता।

¹⁰ असेयता हँकुःआ होड़कू पवाःता, सपायता हँकूके पवाःता, अरू दुवारकू टोकोःगोड ञवनता हँकू लगा दुवार गीग जुवाःता।

¹¹ अपे तलारे नाःआ इया तोनोंगीगरीग अपांग इदानिया जा, बेटात रुटी जोम लगाय असेय दो दिरिय एमेयता, हकूय असे दो बींगे एमेवायता,

¹² अरू सिम बिलीय असेय दो चिडिंगे एमेवायता जा? ओरो!

¹³ अपे कसूर होड़कू इदानपे हों अँनपे लइंकू लगा नपाय नपाय जिनिसकूनपे एमेयता। दो अपे अते अगम नपाय अपेरीग सेरमो देसरीग अपांग एचेरे सुद बिरुवापे असेय दो, अपे लगा चिला लगा मेरेय एमेकेःआ?”

भूतकू बदीराः चेड

¹⁴ तोनोंग दिनरे, मी होड़ भूत एचे कोंदातिरिया हाँयग होड़ अते ईसू भूते उडुंगतेरा। भूत उडुंगनेन दो हाँयग होड़ बड़राःआ अरू हना ञेलवाडखन होड़कू बयावयानकू।

¹⁵ मनदो अदोम होड़कू नाःआ इयाकू कताया, नाँय भूतकूरीग राजा दरहाराः जंगरते भूतकूय उडुंगता, माःआन।

¹⁶ अरू एटाः होड़कू ईसू अंदजावगेय लगा, आम सेरमो देसराः मीटोंग चिनहाम उदुःवाले, माःआनकू कताया।

¹⁷ दो ईसू हँकुःआ होड़कूराः ओंगोल सुदीतेडखन हँकू एचेरेय कताया, “मिनी देसरिकुःआ होड़कू अँननकू अँकू रेडेग होड़ेंग दो हना देस लाय जुवाःता। हनन उड़ी मिनी ओड़ाःरिकुःआ होड़कू अँननकू रेडेग होड़ेंग दो हँकू हों बेगराव जुवाःता।

¹⁸ हाँयग कलउ अरू आँयगरिकुःआ सइनाकू अँननकू रेडेग होड़ेंग दो, हाँयराः राइज करा उड़ी सलाः? अपे ईंग बदीरेपे कतायतना, नाँय कलउराः जंगरते भूतकूय उडुंगता, माःआन।

¹⁹ मनदो ईंग कलउराः जंगरते भूतकूयिंग उडुंगतान दो, अपेरिकुःआ चेलाकू इयेराः जंगरते भूतकूकू उडुंगता? हनालगा अपेरिकुःआ चेलाकू अँननपेरिकुःआ फड़ियावदारकू दोहोनता।

²⁰ ईंग भगवानराः जंगरते भूतकूयिंग उडुंगतान दो भगवान आँयगराः राइज अबू तलारेय बुँहड़ीकेरा।”

²¹ ईसू अरूय कताया, “मी होड़ जंगरदार होड़, कड़ीगराः अवजारकून साबवाडखन अनँयग ओड़ाःए अगुराता दो, आँयगराः जमा जइतकूने बनसावगोडता।

²² मनदो हाँय एचेरे आँयग अते बगरा जंगरदार होड़ वेगता दो, आँयग असरागेःआ हना कड़ीगराः अवजारकून बगरा जंगरदार होड़ लुड़ीगोःयाता अरू हाँय ओड़ाःराः जमा जइतकून गोःवाडखने हटिंगगोडता।

²³ ईंग सुदा कोवाया, हाँय ईंगरीग मुदइ होड़ हवे। अरू ईंग सुदा मेरेय सकलावगेता, हाँय सितिर-बितिरगोडता।”

²⁴ ईसू अरूय कतातेड, “मी होड़ अते मीटोंग भूत उडुंगगुःतान दो हाँयग भूत लोड़ोन लगा टयंगाब ततेरेय ञामगोड ञवनता। अरू हाँय तोनोंग ततेर मेरेय पवाःतान दो, अनँयग आँयगतेय बड़राता, ईंग उडुंगकिया हाँयग होड़ एचेरेयिंग कुदा सेनता।

²⁵ हाँय कुदा वेगतान दो, हाँयग होड़ मड़ी-मेलेंग ओड़ाः इयाय पवाःता।

²⁶ हनते हाँय सेनेवाडखन आँयग अते अरू बेलूर बेलूर सातटोंग भूतकूय अगूता अरू हाँयग होड़ एचेरेकू समसाव जुवाःता। हनते हाँयग होड़राः जीव मड़ंग अते बेलूर होया जुवाःता।”

इयेराः जीव नपाय दोहोनता?

²⁷ ईसू बड़रा मेला मी होड़ अइमी खिररीवाडखने कताया, “आमे जनमावकेरा अरू आम तुवाय एचे दुदुकेडमेःआ हाँयराः जीव भगवान नपायकेरा।”

²⁸ दो ईसू कताया, “नाःआ इया कोवानेःआ, भगवानराः सरवने अयुमेता अरूय मनाःता, हनाँयग होड़राः जीव-जहन भगवान भल-भलायवाता।”

चिनहा बदीरे

²⁹ ईसू एचेरे मुरुक बगरा होड़कू जुमावयान दो हाँय कताया, “नाःआ जूगरिकुःआ होड़कू मुरुक बेलूर इदानकुःआ अरू ईंग एचेरे चिनहा उदुःगे लगाकू असेयतना। मनदो एवनाराः चिनहा अते अरू एटाः तोनोंगाः चिनहा ओरोकू पवावनेना।

³⁰ एवना निनवे सहररिकुःआ होड़कू लगा चिनहाय दोहोना हान इया, मनुवारीग बेटात हों नाःआ जूगरिकुःआ होड़कू लगा चिनहा इयाय दोहोनता।

³¹ दखिन देसरीग रानी, मरंगीग राजा सुलइमानराः कनहून अयुमे लगा मुरुक लंकातेय वेगनेना। नुँहू सुलइमान राजा अते मरंगीग ईंग नंडा इदानिंगा। हनालगा फड़ियावराः दिनरे दखिन देसरीग रानी नाःआ जूगरिकुःआ होड़कूराः बदीरे चड़ाँवाडखन हँकूय जाःता।

³² निनवे सहररिकुःआ होड़कू एवनाराः परसार अयूमवाडखन कसूर अते जीवकू कुदातेरा। नुँहू एवना अते हों मरंगीग होड़ ईंग नंडा इदानिंगा। हनालगा निनवे सहररिकुःआ होड़कू फड़ियावराः दिनरे चड़ाँवाडखन नाःआ जूगरिकुःआ होड़कूकू जाःता।”

देहराः मरसल

³³ “तोनोंगीग होड़ ढिबरी सलगावकेडखन टुकुनूते ओरोय हरूब ओकोतेरा। मनदो ढिबरी भीट चोटरेय मंडवेता, जेमहा ओड़ाः पेंदाकू बोल हँकू मरसलकू पवाः।

³⁴ आमराः मेड देहराः ढिबरी इया इदा। आमराः मेड नपाय दोहोन दो जमा देह मरसलरे दोहोनता। आमराः मेड बेलूर दोहोन दो जमा देह अंदरारे दोहोनता।

³⁵ आम जीवरे मरसल इदा, हना मरसल अलो अंदरागुः लगा सवासितीम दोहोन।

³⁶ आमराः जमा देह मरसल दोहोन अरू तोनोंग अंदरा मेर दोहोन दो, ढिबरी मरसल एमेयता हनन इया आमराः जीव हों मरसलते पेरेग जुवाःता।”

फरीसी होड़कू बदीरे

³⁷ ईसू बड़रा उरियावनेन दो मी होड़ फरीसी होड़ आँयग ओड़ाःरे जोम लगा ईसूय राःतिरिया। दो ईसू हाँय ओड़ाःरे सेनेवाडखन जोम लगाय दुड़ुःनेना।

³⁸ दो ईसू एहूदाकूराः रिती-बिधी इया तिःई मेरेय अचंगान। हना ञेलतेडखन फरीसी होड़ बयावयाने।

³⁹ दो परबू ईसू हाँय एचेरेय कताया, “अपे फरीसी होड़कू डुभा अरू छिपी सेरमो सेरमो एकलापे मंजवेता। मनदो अपेराः इंदरीरे मुरुक ललची अरू बेलूर ओंगोल इदा।

⁴⁰ ने बोको होड़कू, होड़कूराः देहे तुलाकेरा हनाँयग भगवान, हँकूराः जीव होंय तुलाकेरा।

⁴¹ मड़ंग अपे एचेरे इदा हना जिनिसकून गरीब होड़कू लगापे एमेगोड। हनाते अपेराः जमा बरानाः सुद जुवाःता।

⁴² मनदो अपे फरीसी होड़कू, अपे दोपे ठीकयना। अपे फुदेना अड़ाः अरू सुदाब अड़ाः अरू एटाः अड़ाःकूनराः दस बंटारे मी बंटा भगवान लगापे एएमेतना। मनदो अपे सतायते मेरपे फड़ियावगेता अरू भगवान मेरपे दुलारगेयता। अपे सतायते फड़ियावकू लगा इदा अरू भगवान दुदुलार इदा अरू मड़ंगतेपे एमे अगूयतना हना हों एएमे इदा।

⁴³ ने फरीसी होड़कू, अपे दोपे ठीकयना। अपे अरजी ओड़ाःरे मरंग मरंग होड़कू दुड़ुःता हना ततेररे दुड़ुः लगापे ञामता। अरू बजाररे जमा होड़कू अलेकू सलामकेःआ, माःआनपे ओंगलेता।

⁴⁴ अपे ओकोत मड़गट इया इदानपेःआ। होड़कू हना मेरकू सुदीयता अरू हना सेरमोकू सेने पारता। हनालगा अपे दोपे ठीकयना।”

⁴⁵ दो इसराएल होड़कूरीग मी होड़ नियम चेडदार होड़ ईसू एचेरेय कताया, “आम नाःआ इयाम कतायतना दो अले होंम ओपतालेतना।”

⁴⁶ दो ईसू हाँय एचेरेय कताया, ने नियम चेडदार होड़कू, अपे होँपे ठीकयान। होड़कू मेरकू रेम अवेयता हना बोझा हँकू चोटरेपे मंडावगोडता। अरू अपे निःईमिन हों हँकू मेरपे संघरावाकूता।

⁴⁷ “अपे दोपे ठीकयना। अपेरिकुःआ खुटिपरिया होड़कू ञेड एंडातेडकुःआ हँकुःआ भगवानराः बड़रा कता होड़कू लगा मड़गटपे तुलाता।

⁴⁸ हँकुःआ खुटिपरिया होड़कू भगवानराः बड़रा कता होड़कूकू ञेड एंडातेरा अरू अपे भगवानराः बड़रा कता होड़कू लगा मड़गटपे तुलातेरा। हनालगा हँकुःआ होड़कूरिकुःआ हिदइतदारकू इदानपेःआ अरू हँकूराः बुतारेपे मेसायना।

⁴⁹ हनालगा भगवान आँयगराः कनहूनतेय कताकेरा, ईंग हँकू एचेरे ईंगराः बड़रा कता होड़कू अरू मूक चेलाकूयिंग वारता। अदोमकूकू ञेड एंडाकूता अरू अदोमकूकू संतावकूता।

⁵⁰ हनालगा चउंदीसराः बुँहड़ी वरीतेकू ञेड एंडाकेडकुःआ हँकुःआ जमा भगवानराः बड़रा कता होड़कूराः बलंगी बदीरे नाःआ जूगरिकुःआ होड़कूके आभा एएमे पराःता।

⁵¹ हाबील अते बेदी अरू मुनुरुक सुद ततेर तलारेकू ञेड गोएगतिरिया हाँयग जकरिया वरी जमा ञेड एंडात होड़कूराः बलंगी बदीरे नाःआ जूगरिकुःआ होड़कूके आभा एएमे पराःता।

⁵² ने नियम चेडदार होड़कू, अपे दोपे ठीकयान। होड़कू भगवान सुदीगेराः कनहूनकू पवाः अते हँकूपे रोंकावतेडकुःआ अरू अँननपे भगवान मेरपे सुदीगेयतना। अपे अँननपे सेरमो देसरे मेरपे बोलता अरू एटाः होड़कू हों सेरमो देसरे बोलो अतेपे रोंकावकूता।”

⁵³ हनते ईसू हना ओड़ाः अते तोराय दो हना दिन वरीते फरीसी होड़कू अरू नियम चेडदार होड़कू हाँय तयोमकू परावनेना अरूकू धिकि-मिकिगेया।

⁵⁴ अरू हँकू ईसू एचेरे झुरा-झार सवालकून होंबोर घड़ीन हाँय अनँयग बड़रारे बझावगेय लगा दोंगकू ञामा।