एहुना 2 - Korwa Bible

ईसू दाःते अंगूरराः रसे तुलातेरा

¹ पेय दिनरे गलील छतरराः काना सहररे तोनोंगीगराः बियाह दोहोना। ईसूरीग एंगात हों हंडाय दोहोना।

² दो ईसू अरू आँयगरिकुःआ चेलाकू हों हना बियाहरे टिवाकू एमेवातेडकुःआ।

³ दो रंजावतो अंगूरराः रस चबायान दो ईसूरीग एंगात ईसू एचेरेय कताया, “ने बेटा, बियाह ओड़ाःरे अंगूरराः रस चबायना।”

⁴ दो ईसू हाँय एचेरेय कताया, “ने अइमी, नाःआ लगा ईंग चिलायिंग एचे? ईंगराः बेला अरीन सुदरुःआ।”

⁵ दो ईसूरीग एंगात हंडाकुःआ सेवकिया होड़कू एचेरेय कताया, “हाँय कतायता हनन इयापे एचेय।”

⁶ दो हंडा छोगोटोंग कुंडाकूनकू मंडावतो दोहोना। हना मेमेडटोंग कुंडाकूनरे अंदांज अससी अते मी सव बीस लिटर वरी दाः सयोबा। नाःआ कुंडाकून एहूदाकू अँनकूराः रिती-बिधी इया बुहालगुः लगाकू उपयोतगेःआ।

⁷ दो ईसू हँकुःआ सेवकिया होड़कू एचेरेय कताया, “नाःआ कुंडाकूनरे दाःपे दूल पेरेगगोड।” अरू हँकू हना कुंडाकूनराः मुहका वरी दाःकू पेरेगगोतेड।

⁸ हनते हाँय हँकू एचेरे अरूय कताया, “गुनहोन दाः उडुंगगेपे अरू कोटवाड़ एचेरेपे इदीय।” दो हँकू गोःयाडकू।

⁹ हनते कोटवाड़ अंगूरराः रस बड़ाँवयान हना दाःए ञू सोतेडा अरू हाँयग होड़ मेरेय सुदी अवेगाड हना अंगूरराः रस करेःआ दोहोना। मनदो दाःकू उडुंगतेरा हँकुःआ सेवकिया होड़कू नाःआ बदीरेकू सुदीया। हनते कोटवाड़ बरबाबूय राःतेरा,

¹⁰ अरू हाँय एचेरेय कताया, “जमाकू मड़ंगरे अड़िजंग सेबेल अंगूर रसकू एमेयता अरू गुतियाकू ञू रंग झटायान तयोमते भोरोंडो इयाकू एमेयता। मनदो आम ननपाय रस नुँहू वरीम बनसावकेरा।”

¹¹ गलील छतरराः काना सहररे ईसू आँयगराः मड़ंगाः बयाव जुवाः इयाःआ बुता एचेतेडखन मान मरजइतगेयीग माःआने एचे उदुःनेना अरू आँयगरिकुःआ चेलाकू हाँय एचेरेकू बिसवासतेरा।

¹² हना तयोमते ईसू आँयग एंगात, बोपोहकू अरू चेलाकू सुदा कपरनहूम सहर तोराकू। अरू हँकू हंडा तोनोंग दिन वरीकू दोहोना।

भगवानराः ओड़ाः अते फेरवइत होड़कूराः एचे उडुंग

¹³ दो एहूदाकूराः पसहा परोब लेनेसान निचकाःआ दो ईसू मरंग सहर एरुसलेम अगीय रकबनेना।

¹⁴ उरिगकू, भेड़ाकू अरू पेरवाँ तितीगकूकू अकिरिंगा अरू ढिबुवाकूनकू बदलाःआ हँकुःआ होड़कू एरुसलेमरे भगवानराः ओड़ाःराः राचरेकू दुड़ुःकुःआ।

¹⁵ हनते ईसू डोराराः मीटोंग गुरुंदे तुलातेड अरू जमा भेड़ाकू अरू उरिगकू हाँय भगवानराः ओड़ाः अतेय जोः उडुंगगोतेडकू। अरू ढिबुवाकूनकू बदलाःआ हँकुःआ होड़कूराः टिबुलकून उलटाव एंडागोतेडखन ढिबुवाकूने छितियाव एंडागोतेड।

¹⁶ पेरवाँकूकू अकिरिंगा हँकुःआ होड़कू एचेरे ईसू कतातेरा, “नँकू नाःआ अते गोःयाकूपे। ईंग अपांगराः ओड़ाः हाट बजार अहापे तुलाय।”

¹⁷ दो हनमेला भगवानराः कागदरे ओजाःतो इदा हना कता हाँयरिकुःआ चेलाकू उहियार अगूतेरा, “आमराः ओड़ाःराः ओंगोलते ईंगराः जीव मेर सिडाःतना।”

¹⁸ हनते एहूदाकूरिकुःआ मूक होड़कू ईसू एचेरेकू कतातेरा, “नाःआ इया एचेय लगा आम इये हातपाते ओवाडमेःआ अरू हना अले सुदीबाःका लगा चिला चिनहाम उदुःवालेता?”

¹⁹ दो ईसू कतातेड, “भगवानराः ओड़ाःपे एचे रूबगोड दो ईंग पेनेय दिनरे अरूयिंग तुलागोडता।”

²⁰ दो हँकू कता कुदातेरा, “भगवानराः नाःआ ओड़ाः तुतुला लगा छेयालिस बरिस लगावनेना अरू आम पेनेय दिनरेम तुलागोडता जा?”

²¹ मनदो ईसू भगवानराः ओड़ाःराः अउल-तउलरे अनँयगराः देह बदीरेय कतातेरा।

²² ईसू गोएगतो अतेय जियाव रेमनेना हना तयोमरे आँयगरिकुःआ चेलाकू नाःआ कताकू उहियार अगूतेरा। हँकू हनमेला भगवानराः कागदरे नाःआ बदीरे ओजाःतो दोहोना हना कताकून अरू ईसू कता उदुःतेरा हना जमाकूनकू बिसवासतेरा।

ईसू जमा होड़कूराः ओंगोले सुदीयता

²³ ईसू पसहा परोब मेला एरुसलेमरेय दोहोना अरू हाँय मुरुक बयाव जुवाः इयाःआ बुताय एचेतेरा। हना ञेलतेडखन मुरुक होड़कू हाँय एचेरेकू बिसवासतेरा।

²⁴ अरू हाँय जमा होड़कूय सुसुदीःआ। हनालगा हाँय तोनोंगीग एचेरे मेरेय भरसागाड।

²⁵ मनुवाकूराः जीवरे चिनचिला ओंगोल इदा हना जमाय सुसुदीःआ। हनालगा तोनोंगीग होड़ एटाः होड़ बदीरे हाँय एचेरे ककता लगा कोवानेःआ।