एकूब 3 - Korwa Bible

अबूराः आह संभाड़गे लगा इदा

¹ ईंगरिकुःआ अजी बोपोहकूतिंग, अपे सुनुदीयतना भगवान अले चेडदार होड़कू, एटाः होड़कू अते कड़ातेय फड़ियावलेता। हनालगा अबू अते मुरुक होड़कू चेडदार होड़कू अहाबू बड़ाँः।

² अबू जमाकू मुरुक गारबारबू एचेयतना। मनदो अनँयग आहे संभाड़ अवेयता हाँयग होड़ बेगर गारबारीग होड़ दोहोनता। अरू उरिगकूराः तोतोँड़ाकू तोलकूता हनन इया हाँय अनँयग आँयगराः जमा देहे संभाड़ अवेयता।

³ तोनोंगीग होड़ घोड़ा अअसूल लगा इदान दो, हाँय अनँयग घोड़ाराः आहरे लगामे लगावता अरू गोगोः लगाय चहाःता हना अगीय गोः अवेयता।

⁴ समुंदराः जहाज बदीरेपे ओंगले। हना जहाज मरंग इदा अरू होयते सलाःता। मनदो हना जहाजरीग सलावदार हुडिंगाः पोतवारते जहाज गोः लगाय ओंगलेता हना अगीय किंदराव गोः अवेयता।

⁵ ओंगोलगेपे, मीटोंग तिलिंगीते जमा पहाड़कून लो जुवाःता। हनन इया अबूराः आह हों इदा। आह देहराः हुडिंगाः दगली हवे, मनदो मुरुक बड़वार बड़रा कतायता।

⁶ मी होड़राः आह सेंगेल इया इदा। अबू देहराः जमा दगलीकून अते आह बेनेलूर इदा। सेंगेलते तोनोंगाः जिनिस लो जुवाःता, हनन इया आह होड़कूराः लूर-नेवन आडगोडता अरू नरगराः सेंगेलते हँकूराः जमा जीव आडगोडता।

⁷ जमा बरानाः जानरकू अरू तितीगकू अरू समुंदररिकुःआ हकूकू, मनुवा असूल अवेकूता अरू मनुवा हँकूकू असूलकेडकुःआ।

⁸ मनदो तोनोंगीग होड़ होड़कूराः आह ओरोय संभाड़ अवेतेरा। हना आह बेनेलूर बित-बित होड़ इया अरू महुराते पेरेगतो इया इदा।

⁹ अबूराः आहते परबू अरू भगवानबू जागतना अरू हनानाः आहते अबू भगवान आँयग इयाय तुलाकेडकुःआ हँकुःआ होड़कूबू सती-सरापतना।

¹⁰ मिनी आहते जाग बड़रा अरू सती-सरापतो बड़रा हों अबू उडुंगगेतना। ईंग अजी बोपोहकूतिंग, नाःआ इया अहा होयाः।

¹¹ मिनीटोंग सोरते सेबेल दाः अरू बुलुंग दाः उबकाःता जा?

¹² ईंग अजी बोपोहकूतिंग सनातायरे लुवा दूबरे जइतून जोःओ ओरो जोनेना अरू अंगूर लरंगरे लुवा जोःओ ओरो जोनेना। हनन इया बुलुंग दाःराः सोरते सेबेल दाः ओरो उबकावनेना।

बार इयाःआ कनहून

¹³ अपे अते कनहूनदार अरू सुदीगे इयायीग होड़ इये हवे? दो हँकुःआ होड़कू अँननकू अँकू हुडिंग ओंगोलकियानखन कनहून सुदा नपाय लूर-नेवनते जियाः लगा इदा।

¹⁴ मनदो अपेराः जीवरे एटाः होड़कू बदीरे हिनइस-बिनइस अरू इरा पेरेगतो दोहोन दो, अपे हना बदीरे अहापे बड़वारगुः अरू सताय कता बदीरे अहापे लबरा।

¹⁵ नाःआ इयाःआ कनहून भगवान अगीते मेर होयाःता, मनदो नाःआ चउंदीसरिकुःआ होड़कूराः हवे। नाःआ इयाःआ ओंगोल मनुवाकूराः अरू कलउराः ओंगोल हवे।

¹⁶ हिनइस-बिनइसते अरू इरातेकू दोहोनता, हँकुःआ होड़कू गोड़ावयनाकू अरू जमा इयाःआ बेलूर बुताकू एचेयता।

¹⁷ मनदो भगवान अबू लगाय एमेयता हना कनहूनते मी होड़ सुद अरू सलसतिया होड़े बड़ाँःता। हाँय सोगायीग होड़े दोहोनता अरू एटाः होड़कूराः कताय मनाःता। हाँय मयादार अरू बेगर गारबारराः बिसवास अरू बेगर पाचपटी सुदा नपाय बुता एचे लगा हों मंजूरे दोहोनता।

¹⁸ सलसतिया होड़कू होड़कूकू राजू नमागोडता अरू हनाते हँकुःआ होड़कू भगवानराः ओंगोल इया नपाय लूर-नेवनराः जीवकू जियाःता।