मूक चेलाकू 7 - Korwa Bible

इसतपनूसराः परसार

¹ हनते मूक पुजउरी इसतपनूस एचेरेय होंबोरतेरा, “नँकुःआ होड़कू कतायतना हना कता सताय हवे जा?”

² दो इसतपनूस कतातेड, “ईंगरिकुःआ वपक बोपोहकूतिंग अरू इसराएल होड़कूराः मरंग पंचाइतरिकुःआ होड़कू, अपे ईंगपे अयूम। अबूरीग खुटिपरिया होड़ इबराहीम मेसोपोटोमिया देसरेय दोहोन मेला भगवान हाँय एचेरे दरसननेनखने कतातेरा,

³ अनमराः देस अरू ओड़ाःरिकुःआ होड़कूम अड़ाःगोड अरू ईंग उदुःवामता हना देसमे सलाव जुवाः, माःआन।”

⁴ हनालगा हाँय कसदी होड़कूराः देस अड़ाःवाडखन हरान सहररेय बसावनेना। हाँयरीग अपात गोएगनेन तयोमरे भगवान हाँय ननानाः देस अगीय वारतिरिया, अरू नाःआ देसरे अपे नुँहूपे दोहोनतना।

⁵ भगवान हाँय लगा नंडा तोनोंगाः इताड सहे चड़ाँन लगा हों ओत मेरेय एमेवागाडीग। मनदो भगवान हाँय एचेरेय जबानतेरा, नाःआ देस आम अरू आमरिकुःआ लइंकूराः होया जुवाःता। मनदो हनमेला हाँय एचेरे तोनोंगीग लँइग मेरेय दोहोगान।

⁶ हनारे हों भगवान हाँय एचेरे नाःआ इयाय कतातेरा, आमरिकुःआ लइंकू एटाः देसरे दुरीन देसरिकुःआ होड़कू इयाकू दोहोनता। हंडाकुःआ होड़कू एचेरे हँकू चइर सव बरिस बेगारीरेकू दोहोनता अरूकू एचे बेग-हतागोडकूताकू।

⁷ मनदो हना देसरिकुःआ होड़कूयिंग डंडियावकूता अरू हना तयोमरे अपेरिकुःआ खुटिपरिया होड़कू हना देस अते उडुंगकियानखन नाःआ देसरे ईंगकू जागता।

⁸ हनते खतना बदीरे भगवान इबराहीम सुदाय कता-जमकावतेरा। दो इबराहीमरीग बेटात इसहाक जनमावनेना हना आठ दिन तयोमरे इबराहीम हाँये खतनातेरा। हनन इया हना तयोमरे इसहाक एकूबरीग अपाते बड़ाँवनेना अरू एकूबरिकुःआ बारहगोटोंग बेटाकू होयानेना। हँकू अबूराः बारहगोटोंग गोतोररिकुःआ अआपकू दोहोना।

⁹ एकूबरिकुःआ बेटाकू अते मी होड़ दोहोना उसूप। हाँयरिकुःआ वपक बोपोहकूतेन हाँय मुरुककू इरावाया। हनालगा हँकू हाँय मिसिरी देस अगी बेगारी होड़ इयाकू अकिरिंगगोतेडीग। मनदो भगवान हाँय सुदाय दोहोना,

¹⁰ अरू हाँयराः जमा कटसियातेय सडावतिरिया। भगवान हाँयग उसूप कनहूने एमेवातिरिया अरू मिसिरी देसरीग राजा पिरोनराः ओंगोलरे हाँय नपाय दोहोन लगा भगवान संघरावाया। हाँयग राजा अनँयग ओड़ाःराः अरू जमा मिसिरी देसरीग जिमेवारी होड़ उसूपे तुलातेरा।

¹¹ हनते मिसिरी देस अरू कनान देसरे मुरुक कतकाल होयानेन अरू होड़कूके मुरुक कटसिया होयानेन। अबूरिकुःआ खुटिपरिया होड़कू जोजोम लगा तोनोंगाः मेर दोहोगान।

¹² मिसिरी देसरे हुड़ू इदा माःआन एकूब अयूमतेरा दो हाँय अनँयगरिकुःआ बेटाकू, अबूरिकुःआ खुटिपरिया होड़कू, हुड़ू अगू लगा मिसिरी देस अगीय वारतेडकुःआ।

¹³ हँकू बार पुरती मिसिरी देसरेकू सेनेडा दो उसूप हँकू एचेरेय कतातेरा, ईंग उसूप हवे, माःआन अरू मिसिरी राजा पिरोन उसूपरिकुःआ मइछुवाकू बदीरेय सुदीगोतेड।

¹⁴ हनते उसूप आँयग अपांग एकूब अरू जमा ओड़ाःरिकुःआ होड़कू अगूकू लगा कतावातेडकूखने वारगोतेडकू। हाँय ओड़ाःरिकुःआ होड़कू जमाकू पछतरगोटोंग होड़कूकू दोहोना।

¹⁵ दो एकूब अरू आँयग ओड़ाःरिकुःआ जमा होड़कू मिसिरी देस अगी तोराकू अरू हना ततेररे हाँय अरू अबूरिकुःआ अआपकू गोएगनेना।

¹⁶ तोनोंग बरिस तयोमरे हँकूराः मुरदाकून अँननबूराः देस अगी सेकेम सहरकू गोःयाड अरू इबराहीम सेकेमरीग हामोरीकुःआ लइंकू अतेय किजातेरा, हना मड़गटरेकू तीलतेरा।

¹⁷ मनदो भगवान इबराहीम एचेरेय जबानतेरा हना जबान पुरावगुःराः बेला सोदोरनेन दो अबू इसराएल होड़कू मिसिरी देसरे मुरुकबू बगरायान।

¹⁸ हनते मुरुक बरिस तयोमरे उसूप बदीरे तोनोंग इया मेरेय सुदीया हाँयग एटाः राजा, मिसिरी देसरीग राजाय बड़ाँवनेना।

¹⁹ हाँय अबूरिकुःआ होड़कू अँकूरिकुःआ डेंबाकू गोएग जुवाः लगा हँकू अँननकूरिकुःआ डेंबाकू बहरीकू एचे उडुंगगोतेडकू। नाःआ इया हाँयग मिसिरी राजा हँकू अडिगतेडकूखन मुरुक गराह गिराह कटसियाय एमेवातेडकुःआ।

²⁰ हननमेला मोसेस जनमावनेना, अरू हाँय भगवानराः ओंगोलरे सुघरे दोहोना। पेय महिना वरी हाँय अनँयग अपातराः ओड़ाःरेकू पला दरीतिरिया।

²¹ हाँय बहरीकू उडुंग एंडागोतेडीग दो पिरोन राजारीग बिटीत अनँयग बेटा इयाय पला दरीतिरिया।

²² मिसिरी होड़कूराः रिती-बिधी इया मोसेसकू चेडतेरा अरू हाँय जमा बरानाःए एचे अवे अरू बड़रा लगा कनहूनदारे बड़ाँवनेना।

²³ मोसेसराः चालीस बरिस होयानेन दो हाँय अनँयग जइत इसराएल होड़कू सुदा जुमाः लगाय सेनेडा।

²⁴ मी दिन मी होड़ मिसिरी होड़ मी होड़ इसराएल होड़े बेग-हतावाःआ हना मोसेस ञेलतेरा। दो हाँय इसराएल होड़ सडावतेडखन मिसिरी होड़े ञेड एंडागोतेडीग।

²⁵ मोसेस ओंगोलतेरा, इसराएल होड़कू बुझाःता, भगवान मिसिरी होड़कू अते हँकूय सडाव लगा ईंगे उपयोतगिंगता माःआनकू ओंगलेता। मनदो हना इया मेर होयागान।

²⁶ एटाः दिन बार होड़ इसराएल होड़किन कड़ीगतोय ञेलतेरा। हाँय हँकिन मंदराव लगा ओंगोलतेडखने कताया, “ने होड़किन, अबा वपक बोपोहकिन हवे। चिला लगाबा कड़ीगतना?”

²⁷ एटाः होड़े एचे बेग-हतावातेरा हाँयग होड़ मोसेस ढोकलावतेडखने होंबोरतिरिया, “आम अले एचेरे हातपातगे लगा इये आम फड़ियावदारे तुलाकेडमेःआ?

²⁸ चिला, होला हाँयग मिसिरीम ञेड एंडातेरा हनन इया ईंग ञेड एंडा लगाम ओंगलेतना जा?”

²⁹ नाःआ कता मोसेस अयूमतेरा दो हाँय मिदान देस अगीय ञीरयान अरू हंडा दुरीन देसरीग होड़ इयाय जियाःआ। हंडा हाँय लगा बार होड़ बेटाकिन होयानेना।

³⁰ चालीस बरिस तयोमरे, सेरमो देसरीग बराहील मोसेस एचेरे सीनाई पहाड़ गतर टयंगाब ततेररे सलगाःतो बुदारेय एचे ञेलनेना।

³¹ हाँय नाःआ इयाय ञेलतेड दो हाँय बयावयाने। हाँय नपायतेय ञेल लगा हंडाय सेनेडा दो हाँय परबूराः बड़राय अयूमतेरा,

³² ईंग आमरिकुःआ खुटिपरिया होड़कूरीग भगवान हवे; इबराहीमरीग, इसहाकरीग अरू एकूबरीग भगवान। दो मोसेस बोतोरतेय कलपाःआ अरू हाँय हना अगी ञेल लगा मेरेय डीड़ अवेगाड।

³³ हनते परबू हाँय एचेरेय कताया, आमराः चाटीम लड़ागे; आम चड़ाँकिया हना ततेर सुद इदा। मिसिरी देसरे ईंगरिकुःआ होड़कूराः संताविंग ञेञेलतना।

³⁴ हँकूराः फिकीरिंग अयूमकेरा अरू हँकू सडाव लगायिंग वेगकिया। दो नुँहू आम मिसिरी देस अगीयिंग वार कुदामेता।

³⁵ अले एचेरे हातपातगे लगा इये आम फड़ियावदारे तुलाकेडमेःआ, माःआन इसराएल होड़कू मड़ंगरे आड-बेकारवाडिगखनकू कतावाया हाँयग होड़ ननाँयग मोसेस हवे। हाँयग मोसेस हँकुःआ होड़कूरीग हातपात होड़ अरू सडावदार होयाः लगा भनगवान आँयग बराहीलतेय वारतेरा अरू हाँयग मोसेस एचेरे सलगाःतो बुदारेय एचे ञेलनेना।

³⁶ हाँयग मोसेस हँकू मिसिरी देस अतेय एचे उडुंगतेडकुःआ अरू लाल समुंदररे अरू चालीस बरिस वरी टयंगाब ततेररे बयाव जुवाः इया बुताकूने एचेःआ।

³⁷ ईंग इया मी होड़ भगवानराः बड़रा कतायीग होड़ अपे अँननपे होड़कू लगा भगवान वारेयता, माःआन इसराएल होड़कू एचेरेय कतातेरा हाँयग होड़ ननाँयग मोसेस हवे।

³⁸ सेरमो देसरीग बराहील सीनाई पहाड़रे मोसेस एचेरेय बड़रानेन मेला मोसेस टयंगाब ततेररे भगवानरिकुःआ होड़कू दोहोना अबूरिकुःआ खुटिपरिया होड़कू सुदाय दोहोना। अरू हाँयग मोसेस भगवान अगीते अबूय एमेवा लगा जीयत सरवने पवावकिया।

³⁹ मनदो अबूरिकुःआ खुटिपरिया होड़कू हाँयराः कता मेरकू मनावगान अरू हँकू अँननकू अँकू जीवरे मिसिरी देस कुदा सेन लगाकू ओंगलेःआ।

⁴⁰ अरू हँकू मोसेसरीग वगात हारून एचेरेकू कतातेरा, अले अगुवाइवाले लगा मुरतीकूनमे तुला। हाँयग मोसेस अबू मिसिरी देस अते एचे उडुंग अगुःबुःआ, मनदो नुँहू हाँय लगा चिला होयायना, हना अले मेरले सुदीयतना।

⁴¹ दो हनानाः दिनरे हँकू हारूनतेकू एचे तुलातेरा मीटोंग पठरू होनराः मुरती। हँकू हना मुरती लगा बलिदानकू देगा अरू हँकू हरूनतेकू एचे तुलातेरा हना मुरती लगा रीझ रंग घड़ीनकू सूना।

⁴² हनालगा भगवान हँकूय अड़ाःगोतेड अरू हँकू बेर, बांगो अरू इपीलकू जाग लगाय जिमागोतेडकू। नाःआ कता भगवानराः बड़रा कता होड़कूराः कागदरे ओजाःतो इदा हना कताते मेसा जुवाःता; ने इसराएल होड़कू, अपे चालीस बरिस टयंगाब ततेररेपे दोहोन मेला इनिंग लगा जानरकूराः बलिदानकून अरू सराराः बलिदानकूनपे अगूकेरा जा?

⁴³ अपे सेनेडा हंडा अपे मुरतीकून जाग लगापे तुलातेरा, मोलेक देवताराः टपइर ओड़ाः, अरू रिफान देवताराः इपीलराः चिनहा, अरू एटाः एटाः मुरतीकून होँपे गोःतेरा। हनालगा ईंग अपे मुरुक लंकारे बाबील देस अते मना परोम बेगारी होड़कू इयायिंग वार एंडापेता।

⁴⁴ अबूरिकुःआ खुटिपहार होड़कू लगा टयंगाब ततेररे भगवान सुदा जुमाःराः टपइर ओड़ाः दोहोना। हना टपइर ओड़ाः भगवान कता उदुःतेरा हनानाः अउल-तउल इया मोसेस तुलातेरा।

⁴⁵ तयोमरे अबूरिकुःआ खुटिपहार होड़कू अँकूरिकुःआ अअपाकूते हना टपइर ओड़ाःकू पवावनेन अरू एहोसूराः अगुवाइते हँकू अँकू सुदा हना ओड़ाःकू अगूतेरा। हना तयोमरे भगवान एटाः एटाः जइत होड़कू हँकू मड़ंग अते एचे ञीरतेडकुःआ अरू हँकू नाःआ देसरेकू बसावनेना अरू हना टपइर ओड़ाः दाऊद राजाराः जूग वरी हों दोहोना।

⁴⁶ दाऊद राजा भगवानराः ओंगोलरे नपाये दोहोना अरू हाँय भगवान एचेरेय असेतेरा, ईंग अले इसराएल होड़कू बदीरे आम दोहोन लगा मीटोंग नपाय मरंग ओड़ाः तुतुलायिंग अवेयता जा, माःआन।

⁴⁷ मनदो दाऊदरीग बेटा सुनुलइमान राजा हमा भगवानराः ओड़ाःए तुलातेरा।

⁴⁸ हनारे हों भाबी भगवान होड़कू तुलायता हना ओड़ाःरे मेरेय दोहोनता। भगवानराः बड़रा कतायीग होड़ कतातेरा हान इया,

⁴⁹ भगवान होंबरेतना, “सेरमो देस ईंगराः गदी हवे, अरू ओत ईंगराः काट चोड रोपाःराः ततेर हवे। दो करा इयाराः ओड़ाः ईंग लगापे तुलायता? अरू ईंग लोड़ोन लगा ततेर करे दोहोनता?

⁵⁰ ईंग इनिंग नाःआ जमाकूनिंग तुलाकेरा।”

⁵¹ दो इसतपनूस अरूय कताया, “अपे तुड़ेंग-तपेग होड़कू हवे अरू मुरुक हेहेर होड़कू इदानपेःआ। अपे भगवानराः तोनोंगाः बड़रा अयूम लगा सहे मनाव लगा अपे मेरपे चहाःतना। अपे अपेरिकुःआ खुटिपरिया होड़कू इया इदानपेःआ। अपे सुद बिरुवा भगवानराः बड़रा कता होड़कू एचेरे कतातेरा, हना कतापे एरंगवाःआ।

⁵² अपेरिकुःआ खुटिपरिया होड़कू भगवानराः बड़रा कता होड़कू जमाकूकू संतावतेरा। अपेरिकुःआ खुटिपरिया होड़कू बेगर गारबार होड़राः बदीरे मड़ंगरेकू कतातेरा हँकुःआ होड़कू होंकू ञेड गोएग एंडातेडकुःआ। अरू नुँहू अपे ईसू चुबिलीतेडखनपे एचे ञेडतिरिया।

⁵³ भगवान सेरमोरिकुःआ बराहीलकूते अपे एचेरे नियमकूने एमेकेरा, मनदो अपे हना नियमकून मेरपे मनावगान।”

इसतपनूस दिरितेकू एचे ञेडतिरिया

⁵⁴ नाःआ बड़रा हँकू अयूमतेरा दो हँकू रीसनेनखन तिरिंग रेटेग-रेटेगकू कड़रावगेःआ।

⁵⁵ मनदो इसतपनूस, भगवानराः सुद बिरुवाते पेरेगनेनखन सेरमो अगीय संगीलतेरा। दो हाँय भगवान अगीतेःआ मरसले ञेलतेरा अरू ईसू भगवानराः खउना गतर चड़ाँतेय ञेलतिरिया।

⁵⁶ अरू हाँयग इसतपनूस कतातेरा, “मन ञेलपे! ईंग सेरमो देसराः दुवार गीगतो अरू मनुवारीग बेटात भगवानराः खउना गतररे चड़ाँतिंग ञेञेलतना।”

⁵⁷ नाःआरे मरंग पंचाइतरिकुःआ होड़कू अँकूराः लुतूर दाबतेडखन हुमइसकेकू खिररीःआ अरू हाँय एचेरेकू बतकाव सेनेडा।

⁵⁸ हनते हँकू हाँय हना सहर अते बहरीकू ओर उडुंगतिरिया अरू हाँय चोटरे दिरिकून हाँय तेके गोजेय लगाकू तेकेया। दो हंडा मी होड़ डिंघा होड़ दोहोना। हाँयराः ञाव दोहोना साहूल। दो इसतपनूस चोटरे दिरिकू तेकेःआ हँकुःआ होड़कू, हाँयग साहूल एचेरे हँकूराः सेरमो तुसिंगतो सोनहेकू जिमाःतेरा।

⁵⁹ हँकुःआ होड़कू इसतपनूस दिरितेकू तेकेया हनमेला हाँय अरजीतेरा, “परबू ईसू, ईंग आम तिःईरे ईंगराः हनसायिंग जिमागेतना।”

⁶⁰ हनते हाँय उकुड़ोमनेनखने खिररीःआ, “परबू, नँकुःआ होड़कूराः कसूर अँननकू बदीरे अलोम ओंगोल दोहोगे।” नाःआ कतावाडखन हाँय गोएगयाने।