मूक चेलाकू 17 - Korwa Bible

पउलूस अरू सिलास तिसलूनिका सहररे

¹ हना तयोमरे पउलूस अरू सिलास अंपिपुलिस सहर अरू अपोलोनिया सहर पारनेनखन तिसलूनिका सहररेकिन सोदोरनेना। अरू हना सहररे एहूदाकूराः मीटोंग अरजी ओड़ाः दोहोना।

² पउलूस मड़ंगरेय एचेतेरा हनन इया पेय हपता वरी लोड़ोनराः दिनरे एहूदाकू सुदा भगवानराः नियमकूनते हँकूय चेडगोड ञवना।

³ हाँय हँकू एचेरेय कताया, “मसी मुरुक कटसिया सहावतेडखने गोएगनेन तयोमरे गोएगतो होड़कू अतेय जियाव रिमुः लगा दोहोना। दो ईंग परसार उदुःगेतना हाँयग ईसू, मसी हवे।”

⁴ तोनोंग तोनोंग एहूदाकू अरू भगवानकू मान मरजइतता हँकुःआ बेगर एहूदाकू अरू हना सहररिकुःआ तोनोंग तोनोंग मरंग मरंग अइमीकू हों नाःआ कता बिसवासकेडखन पउलूस अरू सिलास सुदा बिसवासी होड़कूराः गउदारेकू मेसायान।

⁵ मनदो तोनोंग एहूदाकू इराते पेरेगनेनखन तोनोंग तोनोंग बेलूर होड़कूकू एचे जुमावतेरा अरू जमा सहररे कड़ीगकू एचे रेमतेरा। अरू आसोन ञावीग होड़राः ओड़ाः अगीकू सेनेडा अरू पउलूस अरू सिलास होड़कू तलारे अगूकिन लगाकू ओंगलेःआ।

⁶ मनदो हँकू हँकिन मेरकू ञामगाडकिन दो आसोन अरू एटाः बिसवासी होड़कू हना सहररिकुःआ हातपात होड़कू एचेरेकू ओर अगूतेडकुःआ। अरू हँकू खिररी घड़ीनकू कताया, जमा चउंदीसरिकुःआ होड़कू हना नाःआ अगीकू एचे हड़ाःकूतना हँकुःआ होड़कू नंडा होंकू वेगकिया।

⁷ अरू आसोन हँकुःआ होड़कू अनँयग ओड़ाःरेय नेत-नेवारतेडकुःआ। नँकू अबूरीग कइसर मरंग राजाराः हुकुमकूनकू टड़ावगोडता अरूकू कतायता, मी होड़ एटाः राजा इदा अरू हाँयग होड़राः ञाव दो ईसू हवे, माःआन।

⁸ नाःआ कताकू अयूमतेड दो हना सहररिकुःआ होड़कू अरू हातपात होड़कू मुरुककू रीसनेना।

⁹ हनालगा आसोन अरू एटाः बिसवासी होड़कू अते जबानतेडकूखन हँकूकू सेने ओवातेरा।

पउलूस अरू सिलास बिरिया सहररे

¹⁰ रइत होयानेन दो ओहेन तिसलूनिका सहररिकुःआ बिसवासी होड़कू पउलूस अरू सिलास बिरिया सहर अगीकू वारगोतेडकिन। हंडाकिन सोदोरनेन दो हँकिन एहूदाकूराः अरजी ओड़ाःरेकिन सेनेडा।

¹¹ बिरिया सहररिकुःआ होड़कू तिसलूनिका सहररिकुःआ होड़कू अते नपाय होड़कूकू दोहोना। नँकुःआ होड़कू भगवानराः सरवन मिनी जीवतेकू अयुमेःआ अरू सगर दिन भगवानराः कागद अते पउलूस कतातेरा हना कता सताय हवे जा कोवान, हनाकू जासतेरा।

¹² मुरुक एहूदाकू अरू मुरुक मरंग मरंग बेगर एहूदाकू, मरदकू अरू अइमीकू हों ईसू एचेरेकू बिसवासतेरा।

¹³ तिसलूनिकारिकुःआ एहूदाकू पउलूस बिरिया सहररे भगवानराः सरवने परसारगेतना माःआनकू अयूमतेरा दो हँकू हंडाकू सेनेडा अरू पउलूस बदीरे होड़कूकू एचे जुमावतेडखन कड़ीगकू रेमा।

¹⁴ दो हंडाकुःआ बिसवासी होड़कू ओहेन पउलूस समुंदर धरीराः छतर अगीकू अगूगोतेडीग। मनदो सिलास अरू तिमुतियूस बिरियारेकिन दोहोयान।

¹⁵ पउलूस सुदाकू सेनेडा हँकुःआ होड़कू हाँय एतेनस सहर वरीकू पइड़घाव अटूतिरिया अरू हँकू कुदा वेग मेला पउलूस हँकूय कतावातेरा, “सिलास अरू तिमुतियूस ईंग सुदा ओहेनकिन जुमाः लगा अपे हँकिनपे कता उदुःगोडवा।”

पउलूस एतेनस सहररे

¹⁶ पउलूस एतेनस सहररे सिलास अरू तिमुतियूसे तंगीःआ मेला, हाँय हना सहररे मुरुक मुरतीकून ञेलतेडखन हाँय जीव मुरुक कुंभलावयान।

¹⁷ हनालगा हाँय एहूदाकूराः अरजी ओड़ाःरे एहूदाकू अरू भगवानकू मान मरजइतता हँकुःआ बेगर एहूदाकू सुदा भगवानराः सरवने कता उदुः ञवना अरू सगर दिन हाँय बजाररे जुमाःतो होड़कू एचेरे भगवानराः सरवने कता उदुःतेरा।

¹⁸ तोनोंग तोनोंग इपिकुरी अरू इसतोइकी गउदारिकुःआ कनहून चेडदार होड़कू पउलूस सुदाकू अड़ा-चउकीःआ। हँकू अते अदोम होड़कू होंबोरतेरा, “नाँयग बेलूर बउकाः होड़ चेले माःआन कताय लगाय चहाःतना?” एटाः होड़कू कतातेरा, “नाँय दो एटाः देसरिकुःआ होड़कूराः तोनोंग देवताराः बदीरेय कतायतना।” पउलूस, ईसूराः नपाय सरवन अरू गोएगतो होड़कूय जियाव रेमता हना कताय परसार उदुःतेरा, हनालगा हँकुःआ होड़कू नाःआ इयाकू कतातेरा।

¹⁹ हनते हँकू हाँय अरियूपगुसराः मरंग पंचाइतरेकू अगूतिरिया अरू हाँय एचेरेकू कतातेरा, “आम चेड उदुःगेतना हना नँवा चेड अले होंम कता उदुःवा हान चिला हवे, माःआन।

²⁰ अले लगा अनसिनहार इया तोनोंग तोनोंग कताम कतायतना अरू हनाराः मतलोब सुदीगे लगाले चहाःतना।”

²¹ (दो एतेनसरिकुःआ होड़कू अरू एटाः देस अते वेगनेनखन हंडाकू दोहोना हँकुःआ होड़कू हों मुरुक बेला वरी नँवा नँवा कताकूनकू अयूम अते अरू कता होड़ेंग अते एटाः तोनोंगाः बुता हँकू मेरकू बुताःआ।)

²² दो पउलूस अरियूपगुसरे पंचाइतरिकुःआ होड़कू तलारे चड़ाँनेनखने कताया, “ने एतेनसरिकुःआ होड़कू, ईंग सुदीयतना, अपे अँननपेरिकुःआ देबी-देवताकूराः सेवा लगा ओसताजतो इदानपेःआ, माःआन।

²³ ईंग नाःआ सहररेयिंग दँड़ा मेला अपेराः मुरतीकून तिंगीड घड़ीनिंग ञेलतेरा। हनमेला ईंग मीटोंग धामिंग ञेलतेरा अरू हना चोटरे नाःआ इया ओजाःतो इदा; होड़कू मेरकू सुदीयता हाँयग भगवान लगा। अपे बेगर सुदीतेपे जागगेयतना हनाँयग भगवानिंग परसार उदुःतना।

²⁴ भगवान नाःआ चउंदीस अरू चउंदीसराः जमा जिनिसकूने तुलाकेरा। हाँय जमा सेरमो अरू ओतरीग मालिक हवे अरू हाँय होड़कू तुलायता हना तोनोंगाः मंदिररे मेरेय दोहोनता।

²⁵ हाँय जमाकू लगा जीव अरू सहेड अरू जमाकूने एमेयता। हनालगा भगवान लगा तोनोंगीग होड़ सेवाकिडिगखन संघरा एएमे लगा कोवानेःआ।

²⁶ भगवान मिनी होड़ते चउंदीसरे दोहोन लगा चउंदीसरिकुःआ जमा जइत होड़कूय तुलाकेरा अरू हाँय हँकुःआ होड़कू करा देसरे अरू तुमिन बेलामिन दोहोन लगा इदा, हना जमाकूने ओंगोल दोहोकेरा।

²⁷ भगवान अबू अते तोरेरे कोवाया। हनालगा होड़कू मिनी जीवकियानखन भगवानकू ञाम अरू होनोयाःकून करे हँकू हाँय सुदा जुमाः लगा नाःआ इयाय एचेकेरा।

²⁸ हाँय अबू सुदा इदानिया, हनालगा अबू जियाःता, सेनता अरू हनाँय अते इदानबुःआ। अपेरिकुःआ ओजाःदारकू अते मी होड़ ओजाःतेरा हन इया, अबू हों भगवानरिकुःआ लइंकू हवे।

²⁹ अबू भगवानरिकुःआ लइंकू हवे दो अबू अहाबू ओंगलेय हाँय मनुवाकूराः ओंगोल अरू कड़िगाड़तेकू तुलाकेरा हना तोनोंगाः सोना सहे चाँदी सहे दिरिराः मुरती इया इदानिया, माःआन।

³⁰ नानाः लगा होड़कू अनसिनहारकू दोहोना हना बेला भगवान मेरेय उहियारगाड। मनदो नुँहू हाँय चउंदीसरिकुःआ जमा होड़कू कसूर अते जीवकू कुदा लगाय हुकुमगेतना।

³¹ अरू आँयगरीग सुनावतो होड़ते, चउंदीसरिकुःआ जमा होड़कू सतायते फड़ियावकू लगा, भगवान मीटोंग दिने तोल दोहोकेरा। हाँयग सुनावतो होड़, भगवान गोएगतो होड़कू अते जियाव रेमकिडिगखन, नाःआ कता सताय हवे माःआन जमा होड़कूय उदुःवारा।”

³² हँकुःआ होड़कू गोएगतो होड़कू जियाव रिमुःता माःआनकू अयूमतेरा दो, अदोम होड़कू लंदावाःआ। मनदो अदोमकू कतातेरा, “नाःआ कता अले तोनोंग दिन आम अते अरूले अयुमेता।”

³³ हनते पउलूस हना पंचाइत अते तोराय।

³⁴ तोनोंग तोनोंग होड़कू पउलूसराः कताकून मनेवाडखन ईसूरिकुःआ चेलाकूकू बड़ाँवनेन। मरंग पंचाइतरीग होड़े दोहोना हाँयग दियुनुसियूस अरू दमरीस ञावीग अइमी अरू एटाः एटाः होड़कू होंकू बिसवासतेरा।