1 कुरिंती 8 - Korwa Bible

मुरतीकून मड़ंगरे मंडावतो जोम जिनिसकून बदीरे चेड

¹ दो नुँहू मुरतीकून मड़ंगरे मंडावतो जोम जिनिसकून बदीरेयिंग कतायतना। मनदो अपे कतायतना, नाःआ कता बदीरे अले कनहूनदारकू इदानलेःआ, माःआन। दो नाःआ बदीरे ईंग कतायतना, कनहूनते अबू बड़वारता मनदो दुलारते अबू एटाः होड़कूबू संघरावाता।

² तोनोंगीग होड़ ओंगलेता, ईंग कनहूनदार इदानिंगा, माःआन दो हाँय निःईमिन कहिसाः मेरेय सुदीयता।

³ मनदो तोनोंगीग भगवाने दुलारता दो, भगवान हाँये सुदीता।

⁴ मुरतीकून मड़ंगरे मंडावतो जिनिसकून जोम बदीरे अबू सुसुदीतना, सतायरे चउंदीसराः मुरतीकूनरे हनसा कोनोवानेःआ अरू एनेकला मिनीटोंग भगवान इदानिया।

⁵ सेरमो अरू ओतरे मुरुक जिनिसकून होड़कू देवताकू अरू परबूकू माःआनकू कतावाकूता, मनदो सतायरे कोनोवाकुःआ।

⁶ अबू लगा मिनीटोंग भगवान इदा अरू हनाँय हवे अबूरीग अपांग। हाँय जमाकूने तुलाकेरा अरू अबू हाँय लगाबू जियाःता। अरू अबू लगा मिनीटोंग परबू इदा। हनाँय हवे ईसू मसी। हाँय जमाकूने तुलाकेरा अरू हनाँयते अबू जीयत इदानबुःआ।

⁷ मनदो जमा होड़कू नाःआ बदीरे मेरकू सुसुदीतना। हँकू ओंगलेता, सतायरे मुरतीकूनरे जीव इदा, माःआन। दो हँकू हना मुरतीकून मड़ंगरे मंडावतो जिनिसकूनकू जोमता। अरू हँकू अबड़ जीव होड़कू दोहोनतान अते, हँकूराः जीव मइलाव जुवाःता।

⁸ जोम जिनिस अबू भगवान एचेरे मेर इदी सोदोरबूता। अबू मेरबू जोम दो अबूराः कही ओरो आडनेना अरू अबू जोम हों कही नफा ओरो होयानेना।

⁹ अपे जमालेःआ अँननपेराः ओंगोल इयापे एचे अवेयता। मनदो अबड़ जीव होड़कू एचे कसूरकू अते सवासितीपे दोहोन।

¹⁰ आम सुदीयतना मुरतीकूनरे हनसा कोनोवानेःआ। हनालगा आम मुरती मड़ंगरे मंडावतो जोम जिनिसमे जोम दो कही ओरो होयानेना। मनदो अबड़ जीव होड़कू ओंगलेता, मुरती मड़ंगरे मंडावतो जोम जिनिस जोम लगा कोवानेःआ। नँकुःआ होड़कू आम मुरतीराः मंदिररे हना मुरती मड़ंगरे मंडावतो जोम जिनिस जोजोमतोकू ञेलमे दो, हँकू कतायता, अले होंले जोम अवेयता, माःआन।

¹¹ अयुमेपे! ईसू मसी नँकुःआ अबड़ जीव होड़कू लगा होंय गोएगनेना। अरू आमराः कनहूनते हँकूम आडगोडता।

¹² ननन इया आम अबड़ जीव होड़कूराः इंदरीम एचे एटेग दो आम ईसू मसी बदीरेम कसूरगेता।

¹³ हनालगा ईंग जोजोम अते वपक बोपोहकूतिंग अते तोनोंगीगिंग एचे कसूरगेय दो ईंग मास कहियो ओरोयिंग जोपेडा।