Zacarías 9 - Li Santil hu

Ta̱rakekꞌ a̱tin saꞌ xbe̱neb li tenamit li ma̱cuaꞌeb aj judío

¹ Li Ka̱cuaꞌ quixye re laj Zacarías li raylal li teꞌxcꞌul li tenamit Hadrac ut li tenamit Damasco. Li Ka̱cuaꞌ naxnau cꞌaꞌru nequeꞌxba̱nu chixjunileb laj Israel ut naxnau ajcuiꞌ cꞌaꞌru nequeꞌxba̱nu li jalan tenamit.

² Ut teꞌtzꞌako̱nk ajcuiꞌ riqꞌuin li raylal li cuanqueb saꞌ li tenamit Hamat li cuan saꞌ li este li na-el cuiꞌ chak li sakꞌe. Joꞌcan ajcuiꞌ li tenamit Tiro ut li tenamit Sidón usta kꞌaxal cuanqueb xnaꞌleb.

³ Li cuanqueb saꞌ li tenamit Tiro queꞌxyi̱b xnaꞌajeb re xcolbaleb rib. Ut queꞌxtu̱b lix biomaleb. Li plata li queꞌxtu̱b chanchan chic li poks. Ut li oro queꞌxtu̱b, chanchan chic li sulul saꞌ eb li be.

⁴ Abanan li Ka̱cuaꞌ tixmakꞌ chiruheb li biomal ut tixjucꞌ li cab li xeꞌxyi̱b re xcolbaleb rib ut tixcut saꞌ li palau. Ut cꞌatbil nak ta̱osokꞌ li tenamit.

⁵ Nak teꞌril li cꞌaꞌru xcꞌul li tenamit Tiro, eb li cuanqueb saꞌ li tenamit Ascalón teꞌxucuak. Joꞌcan ajcuiꞌ li cuanqueb Gaza. Cꞌajoꞌ nak ta̱rahokꞌ xchꞌo̱leb. Joꞌcan ajcuiꞌ li cuanqueb Ecrón teꞌchꞌina̱nk xchꞌo̱leb riqꞌuin li cꞌaꞌru yo̱queb chixcꞌoxlanquil xba̱nunquil. Ut eb li cuanqueb Gaza teꞌcana̱k chi ma̱cꞌaꞌ chic xreyeb. Ut ma̱ jun chic cristian teꞌcana̱k aran Ascalón.

⁶ Jalan chic xtenamiteb teꞌcua̱nk aran Asdod. Riqꞌuin aꞌin tincubsi xcuanquileb laj filisteo.

⁷ La̱in tinba̱nu re nak incꞌaꞌ chic teꞌxtzaca li quicꞌ ut incꞌaꞌ chic teꞌxtzaca li tzacae̱mk mayejanbil chiruheb li jalanil dios. Ut la̱in chic tineꞌxlokꞌoni li joꞌ qꞌuial chic teꞌcana̱k. Aꞌanakeb chic laj cꞌamol be saꞌ xya̱nkeb laj Judá. Ut eb laj Ecrón chanchanakeb chic laj jebuseo li queꞌcana rubel xtakl li rey David.

⁸ La̱in tincua̱nk riqꞌuineb laj Israel ut la̱in tincolok reheb chiruheb li xicꞌ nequeꞌiloc reheb. Ut ma̱ ani chic ta̱rahobtesi̱nk reheb xban nak la̱in yo̱kin chi iloc reheb.

Resil lix cꞌulunic li tzꞌakal Rey

⁹ Chisahokꞌ taxak saꞌ le̱ chꞌo̱l la̱ex li cuanquex saꞌ li tenamit Sión. Chexbicha̱nk xban xsahil le̱ chꞌo̱l, la̱ex li cuanquex Jerusalén xban nak yo̱ chak chi cha̱lc le̱ rey. Aꞌan ti̱c xchꞌo̱l ut tu̱lan. Aꞌan laj Colonel. Cꞌojcꞌo chak chirix jun chꞌina bu̱r. Chirix jun chꞌina ral bu̱r yo̱ chak chi cha̱lc.

¹⁰ Chixjunil li nacꞌanjelac re pletic tixsach ru. Lix carruaje laj Efraín tixsach ruheb joꞌ ajcuiꞌ lix cacua̱yeb laj Jerusalén. Ut tixtoki ajcuiꞌ lix tzimajeb. Tixqꞌueheb li tenamit chi cua̱nc saꞌ tuktu̱quil usilal. Ut aꞌan chic cua̱nk xcuanquil saꞌ xbe̱neb chixjunileb li naꞌajej li naticla cuan cuiꞌ li palau Mar Muerto ut nacuulac toj cuan cuiꞌ li palau Mediterráneo xcꞌabaꞌ. Ut aꞌan ajcuiꞌ cua̱nk xcuanquil saꞌ chixjunil li ruchichꞌochꞌ.

Li Ka̱cuaꞌ tixcol cuiꞌchic lix tenamit chiruheb li xicꞌ nequeꞌiloc reheb

¹¹ Joꞌcaꞌin quixye li Ka̱cuaꞌ: —La̱ex aj Jerusalén, xeqꞌue xcuanquil li contrato riqꞌuin xquiqꞌuel li xul li xemayeja. Joꞌcaꞌin nak la̱in texincol chiru li raylal. Chanchan nak texcuisi saꞌ jun li chamal jul li ma̱cꞌaꞌ haꞌ chi saꞌ.

¹² Sukꞌinkex cuiqꞌuin la̱ex aj Israel, li toj yo̱quex chi yoꞌoni̱nc cuiqꞌuin, usta rahobtesinbilex xbaneb li jalan tenamit. La̱in ninye e̱re nak usta nabal li raylal xecꞌul, abanan anakcuan kꞌaxal cuiꞌchic nabal le̱ rosobtesinquil tinqꞌue.

¹³ Chanchanakex li tzimaj ac cauresinbil re pletic, la̱ex li ralal xcꞌajol laj Judá. La̱ex li ralal xcꞌajol laj Efraín chanchanakex li flecha li nacutman. Ut la̱ex laj Sión, chanchanakex lix kꞌesnal chꞌi̱chꞌ li cui̱nk cau rib chi pletic. Che̱junilex la̱ex texinqꞌue chi pletic riqꞌuin li tenamit Grecia, chan li Ka̱cuaꞌ.

¹⁴ Li Ka̱cuaꞌ ta̱cꞌamok be chiruheb lix tenamit nak teꞌxic chi pletic. Chanchanak rakꞌ ca̱k nak tixcut lix flecha. Li Ka̱cuaꞌ Dios tixya̱basi lix trompeta. Chanchanak li cacuil ikꞌ li nachal saꞌ li sur nak ta̱xic chi pletic.

¹⁵ Li nimajcual Dios tixcoleb lix tenamit Israel. Ut aꞌaneb teꞌnumta̱k saꞌ xbe̱neb li xicꞌ nequeꞌiloc reheb ut teꞌxyekꞌi saꞌ rokeb li pec li teꞌcutekꞌ cuiꞌ. Teꞌsachekꞌ chi junaj cua li xicꞌ nequeꞌiloc reheb laj Israel joꞌ nak nacamsi̱c li xul li nequeꞌxmayeja. Nequeꞌxxoc lix quiqꞌuel saꞌ jun li secꞌ ut nequeꞌxqꞌue saꞌ xxuc li artal.

¹⁶ Saꞌ eb li cutan aꞌan li Ka̱cuaꞌ Dios tixcoleb lix tenamit joꞌ nak narileb lix queto̱mk junak laj ilol xul. Nak cua̱nkeb cuiꞌchic saꞌ li naꞌajej li ta̱qꞌuehekꞌ reheb xban li Ka̱cuaꞌ, teꞌqꞌuehekꞌ xlokꞌal. Chanchanakeb chic li terto̱quil pec li naqꞌueheꞌ chiru junak corona.

¹⁷ Cꞌajoꞌ lix rahom ut li rusilal li Dios saꞌ xbe̱neb lix tenamit. Nabalak li ru li trigo ut lix yaꞌal li uvas ta̱cua̱nk. Sahak saꞌ xchꞌo̱leb li sa̱j cui̱nk ut li sa̱j ixk.