Zacarías 8 - Li Santil hu

Li Ka̱cuaꞌ quixye nak tixcol lix tenamit ut tixqꞌueheb cuiꞌchic chi cua̱nc Jerusalén

¹ Li Ka̱cuaꞌ li nimajcual Dios quia̱tinac cuiꞌchic cuiqꞌuin.

² Joꞌcaꞌin quixye cue: —Kꞌaxal ninra lin tenamit Jerusalén (Sión). Joꞌcan nak nachal injoskꞌil saꞌ xbe̱neb li xicꞌ nequeꞌiloc re.

³ La̱in tincꞌameb cuiꞌchic lin tenamit Jerusalén saꞌ usilal ut tincua̱nk riqꞌuineb. “Tenamit Ti̱c Xchꞌo̱l” ta̱yehekꞌ reheb. Lix tzu̱l li Dios li cuan cuiꞌ li templo “Santil Tzu̱l” tixcꞌabaꞌin.—

⁴ Joꞌcaꞌin xye li Ka̱cuaꞌ li nimajcual Dios: —Eb li ti̱xil cui̱nk ut eb li ti̱xil ixk telajeꞌcꞌojla̱k cuiꞌchic saꞌ eb li be. Cua̱nkeb xxukꞌ saꞌ rukꞌeb xban nak ac ti̱xeb chic chi us.

⁵ Nabalakeb li cocꞌal teꞌbatzꞌu̱nk saꞌ eb li be.

⁶ Ut li Ka̱cuaꞌ quixye ajcuiꞌ: —La̱ex li joꞌ qꞌuial chic texcana̱k, te̱cꞌoxla nak incꞌaꞌ ta̱ru̱k xba̱nunquil li sachba chꞌo̱lej aꞌin. Abanan chicuu la̱in ma̱cꞌaꞌ chꞌaꞌaj xba̱nunquil.

⁷ La̱in tincoleb lin tenamit chiruheb li tenamit li cuanqueb saꞌ eb li naꞌajej bar na-el cuiꞌ chak li sakꞌe ut chiruheb li cuanqueb saꞌ li naꞌajej bar na-oc cuiꞌ li sakꞌe.

⁸ Tebincꞌam cuiꞌchic saꞌ lix naꞌajeb Jerusalén ut aran chic teꞌcua̱nk. Aꞌanakeb lin tenamit ut la̱inak lix Dioseb. La̱in tintakla̱nk saꞌ xbe̱neb saꞌ ti̱quilal ut saꞌ xya̱lal, chan.

⁹ Joꞌcaꞌin xye li Ka̱cuaꞌ, li nimajcual Dios: —Cacuubresihomak le̱ chꞌo̱l chixyi̱banquil lin templo. La̱ex ac querabi li cꞌaꞌru queꞌxye li profeta chalen nak queꞌxtiquib chak xqꞌuebal li cimiento, chan.

¹⁰ Nak toj ma̱jiꞌ queꞌxtiquib xyi̱banquil lin templo, ma̱cꞌaꞌ xtojbaleb li cui̱nk, chi moco cuan xtojbal rix li cꞌanjel nequeꞌxba̱nu li xul. Ut xiu xiu cuanqueb li tenamit xbaneb li xicꞌ nequeꞌiloc reheb. Ut la̱in ajcuiꞌ quinba̱nun re, re nak incꞌaꞌ teꞌxcꞌam ribeb saꞌ usilal.

¹¹ Joꞌcan quinba̱nu junxil. Abanan anakcuan moco joꞌcan ta chic tinba̱nu riqꞌuineb li tenamit Israel, li joꞌ qꞌuial chic xeꞌcana, chan li Ka̱cuaꞌ li nimajcual Dios.

¹² —La̱in tinqꞌueheb chi cua̱nc saꞌ tuktu̱quil usilal. Ut ta̱u̱chi̱nk cuiꞌchic li racui̱mkeb saꞌ li chꞌochꞌ aꞌan ut ta̱u̱chi̱nk ajcuiꞌ li uvas. Ut lix chuꞌque ta̱tꞌakresi̱nk re li racui̱mkeb. Chixjunil aꞌin tinqꞌue reheb li tenamit Israel, li joꞌ qꞌuial chic teꞌcana̱k.

¹³ La̱ex li ralal xcꞌajol laj Judá ut li ralal xcꞌajol laj Israel, junxil majecuanbilex ut tzꞌekta̱nanbilex xbaneb li jalanil tenamit. Abanan, anakcuan texincol ut saꞌ e̱cꞌabaꞌ la̱ex nak osobtesinbilakeb li jalanil tenamit. Mexxucuac. Cacuubresihomak ban e̱chꞌo̱l chi cꞌanjelac.—

¹⁴ Quixye ajcuiꞌ li Ka̱cuaꞌ li nimajcual Dios: —La̱in quincꞌoxla xqꞌuebaleb chixtojbal lix ma̱queb le̱ xeꞌto̱nil yucuaꞌ nak queꞌxchikꞌ injoskꞌil ut incꞌaꞌ quinjal incꞌaꞌux riqꞌuin li quincꞌoxla xba̱nunquil.

¹⁵ Abanan anakcuan saꞌ eb li cutan aꞌin, xincꞌoxla nak texcuosobtesi cuiꞌchic la̱ex aj Jerusalén, joꞌ ajcuiꞌ che̱junilex la̱ex aj Judá. Joꞌcan nak mexxucuac.

¹⁶ Aꞌan aꞌin li tento te̱ba̱nu la̱ex. Ya̱l chex-a̱tinak riqꞌuineb le̱ ras e̱ri̱tzꞌin. Ut chexrakok a̱tin saꞌ ti̱quilal ut saꞌ xya̱lal re nak cua̱nk li tuktu̱quil usilal saꞌ e̱ya̱nk.

¹⁷ Ma̱ jun ta e̱re tixcꞌoxla xba̱nunquil raylal re li ras ri̱tzꞌin. Ut incꞌaꞌ te̱patzꞌ incꞌabaꞌ yal riqꞌuin ticꞌtiꞌ, xban nak aꞌan xicꞌ nacuil la̱in, chan li nimajcual Dios.

¹⁸ Li Ka̱cuaꞌ li nimajcual Dios quia̱tinac cuiqꞌuin ut quixye cue:

¹⁹ —Li ayu̱n li nequeba̱nu rajlal chihab saꞌ xca̱ li po, saꞌ roꞌ li po, saꞌ xcuuk li po ut saꞌ xlaje li po ta̱sukꞌisi̱k chokꞌ ninkꞌe re sahil chꞌo̱lejil chokꞌ e̱re la̱ex li ralal xcꞌajol laj Judá. Joꞌcan nak qꞌuehomak e̱chꞌo̱l chi cua̱nc saꞌ xya̱lal ut saꞌ tuktu̱quil usilal, chan li Ka̱cuaꞌ.

²⁰ Aꞌan aꞌin li quixye li Ka̱cuaꞌ li nimajcual Dios: —Ta̱cuulak xkꞌehil nak teꞌcha̱lk nabaleb li cristian saꞌ lix ni̱nkal ru tenamit chi cua̱nc arin, chan li nimajcual Dios.

²¹ Li cuanqueb saꞌ li junju̱nk chi tenamit teꞌxye reheb li cuanqueb saꞌ jalan tenamit: —Yoꞌkeb. Toxic Jerusalén chixsicꞌbal li Ka̱cuaꞌ. Aran takatzꞌa̱ma chiru li nimajcual Dios nak torosobtesi.— Ut eb aꞌan teꞌchakꞌok ut teꞌxye: —Toxic Jerusalén la̱o, chaꞌkeb.

²² Nabaleb teꞌcha̱lk saꞌ eb li xni̱nkal ru tenamit chixsicꞌbal li Ka̱cuaꞌ arin Jerusalén, ut teꞌxtzꞌa̱ma chiru nak teꞌosobtesi̱k.

²³ Saꞌ eb li cutan aꞌan, laje̱b chi cui̱nk jalan jala̱nk xtenamiteb ut jalan jala̱nk ra̱tinoba̱leb teꞌcha̱lk ut teꞌxchap chi rakꞌ junak aj judío ut teꞌxye re: —La̱o takaj xic che̱rix la̱ex aran Jerusalén xban nak nakanau nak li Ka̱cuaꞌ Dios cuan e̱riqꞌuin la̱ex aj judío, chaꞌkeb.