Zacarías 6 - Li Santil huLi ca̱hib chi carruaje li quicꞌutbesi̱c chiru laj Zacarías saꞌ li visión 1 Quicꞌutbesi̱c jun chic li visión chicuu. Quicuil ca̱hib li carruaje re pletic yo̱queb chak chi e̱lc saꞌ xya̱nk cuib li tzu̱l kꞌan chꞌi̱chꞌ nak quicuil. 2 Li xbe̱n carruaje quelonbil xbaneb li cacua̱y cak rixeb; li xcab, aꞌan quelonbil xbaneb li cacua̱y kꞌek rixeb. 3 Ut li rox carruaje, aꞌan quelonbil xbaneb li cacua̱y sak rixeb; ut li xca̱, quelonbil xbaneb li cacua̱y repex rixeb. 4 Ut la̱in quinpatzꞌ cuiꞌchic re li ángel: —At Ka̱cuaꞌ, ¿cꞌaꞌru xya̱lal li ca̱hib chi carruaje li yo̱quin chirilbal? chanquin. 5 Li ángel quichakꞌoc ut quixye cue: —Li ca̱hib chi carruaje li yo̱cat chirilbal, aꞌaneb li retalil li ca̱hib chi musikꞌej li nequeꞌcꞌanjelac chiru li Ka̱cuaꞌ, laj e̱chal re li ruchichꞌochꞌ. 6 Li carruaje li quelonbil xbaneb li cacua̱y kꞌek rixeb yo̱queb chi xic saꞌ li norte, ut li carruaje li quelonbil xbaneb li cacua̱y sak rixeb yo̱queb chi xic saꞌ li oeste li na-oc cuiꞌ li sakꞌe ut li quelonbil xbaneb li repex rixeb yo̱queb chi xic saꞌ li sur.— 7 Ut eb li cacua̱y teꞌraj ru xic chixsutinquil li ruchichꞌochꞌ. Ut li ángel quixye reheb: —Ayukex ut te̱suti chak li ruchichꞌochꞌ, chan. Ut eb aꞌan queꞌxsuti chak li ruchichꞌochꞌ joꞌ quiyeheꞌ reheb. 8 Chirix aꞌan li ángel quixjap re ut quixye: —Il, li xeꞌco̱eb saꞌ li norte xeꞌxqꞌue li tenamit chixtojbal rix lix ma̱queb. Ut xrisi xjoskꞌil li Ka̱cuaꞌ saꞌ xbe̱neb, chan li ángel. Li Dios quixye nak ta̱qꞌuehekꞌ li corona saꞌ xjolom laj Josué li xyucuaꞌil aj tij 9 Li Ka̱cuaꞌ quia̱tinac cuiqꞌuin ut quixye cue: 10 —Ta̱xoc li oro ut li plata li xeꞌxcꞌam chak laj Heldai, laj Tobías ut laj Jedaías li xeꞌsukꞌi chak Babilonia. Saꞌ ajcuiꞌ li cutan aꞌan tatxic saꞌ li rochoch laj Josías li ralal laj Sofonías. 11 Ta̱cꞌam li oro ut li plata li ac xaxoc. Ta̱yi̱b li corona ut ta̱qꞌue saꞌ xjolom laj Josué li xyucuaꞌil aj tij, li ralal laj Josadac. 12 Ut ta̱ye re: Joꞌcaꞌin xye li Ka̱cuaꞌ li nimajcual Dios: Li sa̱j cui̱nk li nequeꞌxye “Xtux Cheꞌ” re, aꞌan chanchan jun xtux li cheꞌ li na-el chak saꞌ xya̱nk li xeꞌ. Li cui̱nk aꞌan ta̱yi̱ba̱nk re lix templo li Ka̱cuaꞌ. 13 Aꞌan ta̱yi̱ba̱nk re lix templo li Ka̱cuaꞌ ut aꞌan ta̱qꞌuehekꞌ xlokꞌal. Aꞌan ta̱cꞌojla̱k saꞌ lix cꞌojariba̱l ut aꞌan chic ta̱takla̱nk saꞌ xbe̱n li ruchichꞌochꞌ. Aꞌanak li tzꞌakal Rey ut aꞌanak ajcuiꞌ li tzꞌakal aj tij. Ma̱cꞌaꞌak chꞌaꞌajquilal saꞌ li cuib chi cꞌanjel li tixba̱nu. Us ta̱e̱lk lix cꞌanjel chiru. 14 Li corona li ta̱yi̱b ta̱cana̱k saꞌ lix templo li Ka̱cuaꞌ re xjulticanquileb laj Heldai Helem, laj Tobías, laj Jedaías ut laj Josías Hen li ralal laj Sofonías. 15 Li cuanqueb chak chi najt teꞌcha̱lk chi tenkꞌa̱nc re xyi̱banquil lix templo li Ka̱cuaꞌ. Riqꞌuin aꞌin te̱qꞌue retal nak li Ka̱cuaꞌ li nimajcual Dios, aꞌan li quitaklan chak cue saꞌ e̱ya̱nk. Ut chixjunil aꞌin talajcꞌulma̱nk nak la̱ex te̱rabi ut te̱ba̱nu li cꞌaꞌru naxye li Ka̱cuaꞌ li kaDios.— |
© 2019, Wycliffe Bible Translators. All rights reserved.
Wycliffe Bible Translators, Inc.